ලංකාව තුල කොවිඩ්-19 වසංගත ව්‍යාප්තියේ “ප්‍රමුඛම ප්‍රභේදය” ඔමික්‍රෝන් බවට පත්වෙමින් පවතින බව ශ්‍රී ජයවර්ධනපුර විශ්වවිද්‍යාලයේ ප්‍රතිශක්ති විද්‍යාව සහ සෛල විද්‍යායතනයේ වෛද්‍ය චන්දිම ජීවන්දර සෙනසුරාදා පැවසීය. එය සනාථ කරමින් එදිනම රුධිර සාම්පල 182 කින් තවත් ඔමික්‍රෝන් ආසාදිතයින් 160 ක් හඳුනා ගැනිනි.
ඒ අනුව දෙසැම්බර් 3 වනදා සිට මේ දක්වා හඳුනාගත් මුලු ඔමික්‍රෝන් ආසාදිතයින් සංඛ්‍යාව 200 ඉක්මවා ගියේය. කෙසේ වෙතත් මෙම සාම්පල වලින් බහුතරයක් ලබාගෙන ඇත්තේ ගුවන්තොටුපල ආශ්‍රිතව රටින් පිටව යාමට සිටින පුද්ගලයන්ගෙනි. දිවයින පුරා දැවැන්ත පරිමානයෙන් පරීක්ෂන සිදු කෙරෙන්නේනම් වසංගතයේ සැබෑ ව්‍යාප්තිය, නිල සංඛ්‍යා වලින් දැක්වෙන තත්වයට වඩා ව්‍යසනකාරී බව අනාවරනය වන බැවින්, ආන්ඩුව දෛනික පරීක්ෂන සංඛ්‍යාව 5000 ට ආසන්න ඉතා සීමිත අගයක පවත්වාගෙන යයි.
ඔමික්‍රෝන් දැනටමත් ලෝකය පුරා ආසාදනයන් හා රෝහල් ගත කිරීම් ඉහල නංවමින් නව රැල්ලකට මග පාදා ඇත. ජනවාරි 9 දක්වා සතියේදී ගෝලීය ආසාදිතයින් සංඛ්‍යාව පෙර සතියට සාපේක්ෂව සියයට 53 කින් ඉහල ගියේය. අසල්වැසි ඉන්දියාවේ ඔමික්‍රෝන් ප්‍රභේදය වේගයෙන් පැතිරෙන අතර සියයට 524 ක ආසාදනයන් වැඩිවීමක් වාර්තා කර ඇත. බදාදා දිනය වනවිට එක්සත් ජනපදයේ රෝහල්ගතකිරීම් 1,40,000 ඉක්මවා ගියේය.
ලංකාව තුල ද ඔමික්‍රෝන් ප්‍රභේදය වේගයෙන් පැතිරෙමින් රට පුරාම ආසාදනයන් ඇති කිරීමට අවශ්‍ය පසුබිම දැනටමත් සම්පාදනය කොට ඇත. විශේෂඥ වෛද්‍ය ආනන්ද විජේවික්‍රම සන්ඩේ ටයිම්ස් වෙත සඳහන් කලේ ඔමික්‍රෝන් ප්‍රභේදයෙන් ආරක්ෂා වීමට අනෙකුත් සෞඛ්‍ය ආරක්ෂන පියවර වලට අමතරව “මහජන ඒකරාශීවීම් වැලැක්වීම වඩා තීරනාත්මක” බවයි.
“ආසාදනයන් වැඩි වීමක ප්‍රවනතාවයක්” පවතින බව ඔහු වැඩි දුරටත් සඳහන් කරයි. මේ හේතුවෙන් පර්යේෂන හරහා රට තුල සිදුවන්නේ කුමක්දැයි දැනගැනීම “ඕනෑම තත්වයකට සූදානම් වීමක් සඳහා අත්‍යාවශ්‍ය බව” විජේවික්‍රම එහිදී වැඩි දුරටත් අවධාරනය කලේය.
ඩෙල්ටා ප්‍රභේදයට වඩා ප්‍රබල ඔමික්‍රෝන් ප්‍රභේදය, පවතින කොන්දේසි යටතේ ලංකාව ඉක්මනින් වෙලා ගනිමින් රෝහල් පිරී ඉතිරී ගොස් ඛේදවාචකයක් ජනිත කිරීමට ඇති ඉහල අනතුර ගැන වෛද්‍ය විශේෂඥයන් යලියලිත් අනතුරු අඟවන නමුත් ආන්ඩුව මෙම අනතුරු ඇඟවීම් නොතකමින්, සියලු මහජන සෞඛ්‍ය ආරක්ෂන පියවර ඉවත දමා වෛරසයට රිසිසේ පැතිරීමට ඉඩ හැර ඇත.
ආන්ඩුවේ මෙම සාපරාධී පිලිවෙත පිටුපසින් ඇත්තේ, මහ ධනපතියන්ට තම ලාභ උත්පාදනය අඛන්ඩව පවත්වාගෙන යාම සඳහා කම්කරුවන් අබාධිතව වැඩට ගෙන්වා ගැනීමට අවශ්‍ය සියලු කොන්දේසි සකසා දීමයි. ජනවාරි 3 වනදා සිට සියලු රාජ්‍ය සේවකයන් සේවයට කැඳවීමට පියවර ගැනිනි. වසංගතය සීඝ්‍රයෙන් පැතිරෙන පාසල්, අත්‍යාවශ්‍ය නොවන කම්හල් විවෘතව තබා ඇති අතර විනෝදාස්වාද කටයුතු සඳහා මහජන ඒකරාශී වීම් කිසිදු සීමාවකින් තොරව සිදු කෙරේ.
ආන්ඩුවේ මිනීමරු ආකල්පය කැටිකොට දක්වමින් ඊයේ එප්පාවල රෝහලේ සිදුකල නිරීක්ෂන චාරිකාවකදී ඖෂධ පිලිබඳ රාජ්‍ය අමාත්‍ය චන්න ජයසුමන සඳහන් කලේ “ඔමික්‍රෝන් ප්‍රභේදයත් එක්ක කොරෝනා වෛරසය ලෝකයෙන් තුරන්ව යාමේ යම්කිසි හැකියාවක්” පවතින බවයි. මින් ගලා එන නිගමනය වනුයේ, වෛරසය ලෝකයෙන් තුරන් වීමක් දෙසට යන්නේ නම් වසංගතය තුරන් කිරීමට තීරනාත්මක පියවර අත්‍යාවශ්‍ය නොවන බවයි.
ජයසුමනගේ ප්‍රකාශයට පටහැනිව සැබැවින්ම සිදුවෙමින් පවතින්නේ, ධනපති ආන්ඩු වල සාපරාධී ප්‍රතිචාරය හේතුවෙන්, වෛරසයේ නව ප්‍රභේද ජනිත කරවමින් වසංගතය ව්‍යසනකාරී ලෙස ලොවපුරා පැතිර යාමයි.
එම තතු තුල පාලකයන් විසින් වසංගතය සාමාන්‍යකරනය කරනුයේ සහ එහි අනතුර අඩු තක්සේරු කරනුයේ, කලින් පෙන්වාදුන් පරිදි, ආර්ථිකය මුලුමනින්ම විවෘතව තබා ගනිමින් ධනපති ලාභ උත්පාදනයට අවශ්‍ය ප්‍රශස්ත කොන්දේසි සම්පාදනය කරදීමටයි. අත්‍යවශ්‍ය නොවන නිෂ්පාදන සහ පාසල් වසා දැමීම ඇතුලු අත්‍යවශ්‍ය මහජන සෞඛ්‍ය ආරක්ෂන පියවරයන්ට එරෙහිව එන්නත්කරනය එකම විසඳුම ලෙස උත්කර්ෂයට නංවනුයේ ද එහි කොටසක් ලෙසය.
2021 අගෝස්තු මාසයේ දී ඩෙල්ටා ප්‍රභේදය පැතිරීමේ උච්ඡතම අවස්ථාව පැමිනිවිට මෙම පිලිවෙතෙහි ව්‍යසනකාරීත්වය පැහැදිලිවම ප්‍රකාශයට පත් කෙරුනි. ජාතික පරිමාන අගුලු දැමීමක් කරන ලෙස වෛද්‍ය විශේෂඥයන් කරන ලද ඉල්ලීම ආන්ඩුව ප්‍රතික්ෂේප කලේය. එම මාසයේ අගදී අගුලු දැමීම පැනවීමට සිදුවූයේ රෝහල් පිරී ඉතිරී ගොස් විශාල ඛේදවාචකයකට මග පාදා මහජන විරෝධය වැඩෙන තතු තුලය.
වසංගතය සාමාන්‍යකරනයේ කොටසක් ලෙස ජන මාධ්‍ය විසින් වසංගතය පිලිබඳ සංඛ්‍යා ලේඛන ඉදිරිපත් කරන්නේ ඉතාමත් සීමිත ආකාරයකට සහ එහි අනතුර අඩු කොට දක්වමිනි. ඒ ඔස්සේ යමින්, ලංකාවේ වැඩිම අලෙවියක් සහිත බවට පම්පෝරි ගසන ලංකාදීප පුවත්පතේ වෙබ් අඩවිය පසුගිය සතියේ පටන් කොවිඩ් ආසාදිතයින් පිලිබඳ සංඛ්‍යා ලේඛන සහ ආසාදනයන් පිලිබඳ නව තොරතුරු ඉස්මතු කෙරෙන කොටස ඉවත් කර ඇත.
නව ප්‍රභේදය පැතිරීම වැලැක්වීමට එකදු සීමාවක් හෝ පනවා නොමැති ආන්ඩුව වසංගතයේ පැතිරීමේ වගකීම මහජනයාගේ ඇඟ මතට කපමින් සිටී. වෛරසයේ පැතිරීම පිලිබඳ වගකීම මුලුමනින්ම ගත යුත්තේ ආන්ඩුවයි. “නව සාමාන්‍යය” යටතේ මහජනතාවට වැඩපලවල, අධ්‍යාපන ආයතන වල සහ පොදු ප්‍රවාහන සේවය තුල තදබදයෙන් යුතුව වෛරසයේ පැතිරීමට තුඩු දෙන අයුරින් එදිනෙදා වැඩකටයුතුවල නිරත වීමට සිදුව ඇත.
එසේ විවෘත කර ඇති අධ්‍යාපන ආයතන තුල විශාල වශයෙන් ආසාදිතයින් වාර්තා වෙමින් පවතී. සිකුරාදා ලංකාදීප පුවත් පත වාර්තා කලේ දින තුනක් තුල නැගෙනහිර සරසවියේ සිසුන් 31 දෙනෙක් වෛරසයට ආසාදනය වී ඇති බවයි. අනෙකුත් ක්ෂේත්‍ර වලද ඇත්තේ මේ හා සමාන තත්වයකි.
එන්නත්කරනය මගින් නිපදවන ප්‍රතිශක්තියට ඔමික්‍රෝන් ප්‍රභේදය බාධා පමුනුවන බැවින්, වසංගතයේ පාලනය හුදු එන්නත්කරනය මගින් පමනක් සිදු කල නොහැකි බව ලොවපුරා වෛද්‍ය විශේෂඥයන් පෙන්වා දෙමින් සිටියදී, ආන්ඩුව එන්නත්කරනය උත්කර්ෂයට නංවමින්, ජනවාරි 11 වනදා සිට එන්නත්කරන සතියක් නිවේදනය කලේය.
රාජපක්ෂ ආන්ඩුවේ මෙම සාපරාධී පිලිවෙත් හේතුවෙන්, ලංකාව තුල දැනටමත් 595,657 ආසාදනයට ලක් කොට ඇත. බිලිගෙන ඇති ජීවිත සංඛ්‍යාව 15,197 කි. ආසාදනය වී සුව වූවන්ගෙන් සැලකිය යුතු පිරිසක් දිගු කාලයක් තිස්සේ බලපාන දීර්ඝ කොවිඩ් තත්වයට මුහුන දෙති. ඩෙල්ටා ප්‍රභේදයට වඩා ප්‍රබල ඔමික්‍රෝන් වෛරසය පැතිරෙන තතු යටතේ මෙම ව්‍යසනයට වහාම තිත තැබීම අත්‍යාවශ්‍ය කාරනාවකි. එය කල හැක්කේ ධනපති ආන්ඩුවට සහ සමස්ත ධනපති ක්‍රමයට එරෙහි දේශපාලන අරගලයකින් පමනකි.