[මෙය NATO goes to war against Russia යන මැයෙන් 2022 මාර්තු 1 පල වූ ලිපියේ පරිවර්තනයයි.]
යුද්ධයන්හි අතිමූලික හේතූන් සහ අවශ්‍යතා බොහෝ විට මුලින්ම දැකගත නොහැකිය. ඒවා ප්රචාරක කුනාටුවකින් සැඟවී ගොසිනි. කෙසේ වෙතත්, ඉක්මනින් හෝ පසුව, ගැටුමේ සැබෑ සහ වඩාත් ගැඹුරු ගාමක බලවේග සහ වැදගත්කම ඉස්මතු වීමට නියමිත ය.
යුක්‍රේනයේ ගැටුම සම්බන්ධයෙන් ගත් කල, යුද්ධයේ ස්වභාවය සැලකිය යුතු වේගයකින් හෙලිදරව් වෙමින් පවතී. යුක්‍රේනය යනු සරලව මෙන්ම සත්‍ය වශයෙන්ද නේටෝව සහ රුසියාව අතර යුද්ධයක ආරම්භක භෞතික යුද පිටියක් පමනි.
වසර ගනනාවක් තිස්සේ යුක්‍රේනය නේටෝවේ සාමාජිකත්වය නොගැනීම බොහෝ දුරට ප්‍රබන්ධයකි. දැනටමත් සැලකිය යුතු ලෙස සන්නද්ධව සහ ගලා එන ආයුධ සහිතව යුක්‍රේනය, මොස්කෝවේ පාලන තන්ත්‍ර මාරුවක් හා රුසියාව නේටෝවට මුලුමනින්ම යටත්කර ගැනීම අරමුනු කරගත් යුදුධයේ පෙරටු ඇනිය වන්නේ ය.
පසුගිය දින කිහිපයේ වර්ධනයන් එය පැහැදිලි කරයි. එම වර්ධනයන් පහතින් දැක්වේ:
පලමුවෙන්, එක්සත් ජනපදය හා යුරෝපීය බලවතුන් විසින් පනවන ලද දැවැන්ත ආර්ථික සම්බාධක, සමස්ත රුසියානු ආර්ථිකය අඩපන කිරීම ඉලක්ක කර ගනී. පසුගිය පැය 24 තුල රුසියාවේ ප්‍රධාන බැංකු ස්විෆ්ට් (SWIFT) යන ජාත්‍යන්තර ගෙවීම් පද්ධතියෙන් විසන්ධි කර ඇති අතර, රුසියාවේ මහ බැංකුවේ වත්කම් ක්‍රියාත්මක තලයේම අත්හිටුවා ඇත.
රුසියානු මහ බැංකුවට එරෙහි පියවර සමස්ත රුසියානු ආර්ථිකයට විශේෂයෙන් විනාශකාරී සහ ක්ෂනික බලපෑමක් කරනු ඇත. බයිඩන් ආන්ඩුවේ ජ්‍යෙෂ්ඨ නිලධාරියෙක් සඳුදා පැවසුවේ, මෙම ක්‍රියාව මගින් “ඩොලර් බිලියන සිය ගනනක්” වන වත්කම් වෙත ප්‍රවේශය අවහිර කරනු ඇති බවයි. “රූබලය එක එල්ලේ පහත වැටෙමින් ඇති අතර ඉක්මනින් උද්ධමනය වැඩිවීමක් සහ ආර්ථික කටයුතුවල හැකිලීමක් ඔබට පෙනෙනු ඇතැ” යි ඔහු සතුටින් පැවසීය. ඔහු සම්බාධක හැඳින්වූයේ, රුසියාවට එරෙහිව 'ඉමහත් බලයක් යෙදවීම සඳහා අපගේ කැපවීම' ලෙසය.
අධිරාජ්‍යවාදී බලවතුන්ගේ එක් ගනන් බැලීමක් නම්, රුසියානු ආර්ථිකය හා රූබලය විනාශ වීම, රුසියානු කතිපයාධිකාරය තුල බෙදීම් ගැඹුරු කරන අතර, සමාජ අතෘප්තිය අවුලුවමින් පාලන තන්ත්‍ර මාරුවකට සහ රට කැබලි කිරීමට පවා කොන්දේසි නිර්මානය කරනු ඇතැයි යන්නය. 'මිනිසුන් මුදල විශ්වාස කරන්නේ නම්, රට පවතී', නිව් යෝර්ක් ටයිම්ස් ස්ටැන්ෆර්ඩ් විශ්ව විද්‍යාලයේ හූවර් ආයතනයේ පර්යේෂකයෙකු වන මයිකල් එස්. බර්න්ස්ටම් උපුටා දැක්වීය. 'ඔවුන් එසේ නොකරන්නේ නම්, එය විනාශවී යනු ඇත.'
දෙවැන්න, නැටෝ රටවල් යුක්‍රේනයට සෘජුවම නවීන දියුනු ආයුධ පද්ධති ලබා දීමයි. එක්සත් ජනපදය පසුගිය වසරේ යුක්‍රේනයට ඩොලර් බිලියන 1 ක මිලිටරි ආධාර යවා ඇති අතර, ඒ එක්සත් ජනපද රාජ්‍ය ලේකම් ඇන්ටනි බ්ලින්කන් විසින් ඉරිදා පොරොන්දු වූ ඩොලර් මිලියන 350 ක මෑත වාරිකය සමඟ ය. පොලවේ සිට ගුවනට විදින ස්ටිංගර් මිසයිල සහ ජවලින් යන යුද ටැංකි නාශක මිසයිල වලින් වොෂින්ටනය සෘජුවම යුක්‍රේනය සන්නද්ධ කර ඇත. යුක්‍රේන හමුදා දැනටමත් රුසියානු ටැංකි වලට එරෙහිව දියුනු ෆයර් ඇන්ඩ් ෆොගෙට් (fire-and-forget) යන ජවෙලින් තාක්ෂනය භාවිතා කරන අතර, ඒවා ආක්‍රමනයට පෙර ජනවාරි මාසයේදී එක්සත් ජනපදය විසින් ඔවුන්ට සපයන ලදී.
ජර්මානු චාන්සලර් ඔලාෆ් ස්කොල්ස් ඉරිදා නිවේදනය කලේ, ජර්මානු මිලිටරිය සඳහා ඩොලර් බිලියන 110 ක අතිරේක අරමුදල් සපයනු ඇති බවත්, එය එහි වාර්ෂික අයවැය මෙන් දෙගුනයක් පමන වන බවත්, ජර්මනිය යුක්‍රේනයට සෘජු මිලිටරි ආධාර සපයන බවත් ය. දෙවන ලෝක සංග්‍රාමයේදී සෝවියට් සංගමයට එරෙහිව බලමුලු ගැන්වූ ජර්මානු අධිරාජ්‍යවාදයේ මෙවලම් යලිත් වරක් යුක්‍රේන භූමිය හරහා රුසියාව දෙසට ගමන් කරමින් සිටී.
ප්‍රථම වතාවට යුක්‍රේනයට ආයුධ මිලදී ගැනීම සහ බෙදා හැරීම සඳහා යුරෝපා සංගමය මූල්‍යාධාර සපයයි.
තෙවනුව, ආන්ඩුවල අනුග්‍රහය ඇතිව, නැටෝ රටවලින් යුක්‍රේනයට පෞද්ගලික භට හමුදා යවනු ලැබේ. රුසියාවට එරෙහි යුද්ධය සඳහා යුක්‍රේනය ජාත්‍යන්තර හමුදාවක් පිහිටුවන බව යුක්‍රේන ජනාධිපති වොලොඩිමියර් සෙලෙන්ස්කි ඉරිදා ප්‍රකාශ කලේය, “යුක්‍රේනය, යුරෝපය සහ ලෝකය ආරක්ෂා කිරීම සමඟ සම්බන්ධ වීමට කැමති ඕනෑම කෙනෙකුට පැමින, රුසියානු යුද අපරාධකරුවන්ට එරෙහිව යුක්‍රේනියානුවන් සමඟ උරෙනුර ගැටී සටන් කල හැකිය.”
එක්සත් රාජධානියේ විදේශ ලේකම් ලිස් ට්‍රස් ඉරිදා ප්‍රකාශ කලේ සටන්කරුවන් ලෙස සේවය කිරීම සඳහා යුක්‍රේනයට යන බ්‍රිතාන්‍ය පුරවැසියන්ට තමන් “සම්පූර්නයෙන්ම” සහාය දුන් බවයි.
කුලී සොල්දාදුවන් යෙදවීමේ ජාලයන් 2014 සිට පැවතී ඇත. ඔවුන් යුක්‍රේනයට සහ ඔවුන්ගේ මව් රටවලට අන්ත දක්ෂිනාංශික කොටස් ගෙන ගොස් ඇත, එහිදී ඔවුන් සුදු ආධිපතිවාදී ත්‍රස්තවාදයට වැරදිකරුවන් වී ඇත. යුක්‍රේනයේ හමුදා අසෝව් බලඇනිය සහ ජෝර්ජියානු ජාතික සේනාංකය සමඟ කටයුතු කර ඇත. මෙම ජාලවලට දැන් බ්‍රිතාන්‍ය සහ ඇමරිකානු ආන්ඩුවල විවෘත සහාය ලැබේ. වැඩි දෙනෙක් විශ්‍රාම ගිය විශේෂ මෙහෙයුම් බලකා සෙබලුන් වන එවැනි පුද්ගලයින් 60කට වඩා වැඩි පිරිසක්, පසුගිය සතිය තුල එක්සත් රාජධානියෙන් පිටත් වී අති අතර අවම වශයෙන් එවැනි හය දෙනෙකු එක්සත් ජනපදයෙන් පිටත් විය.
සිව්වැන්න ලෙස, එක්සත් ජනපද හා යුරෝපීය නිලධාරීන් රුසියාව සමග සෘජු යුද්ධයකට සැලසුම් කරන බවට වඩ වඩාත් යුදවාදී ප්‍රකාශ නිකුත් කර ඇත. පසුගිය සතියේ බයිඩන් පරිපාලනය විසින් නිවේදනය කරන ලද නැගෙනහිර යුරෝපයට එක්සත් ජනපද භටයන් 7,000 එක් කිරීම සමඟින් මහාද්වීපයේ සමස්ත එක්සත් ජනපද භට සංඛ්‍යාව 100,000 ඉක්මවයි.
සිකුරාදා සක්‍රීය කරන ලද නැටෝවේ “වේගවත් ප්‍රතික්‍රියා බලකායට” අතිරේක හමුදා එකතු කරන්නේ දැයි සඳුදා විමසූ විට, ආරක්ෂක දෙපාර්තමේන්තු ප්‍රකාශක ජෝන් කර්බි පැවසුවේ, “එය සක්‍රිය කල යුතු නම්, අපි සූදානම් බව සහතික කර ගැනීමට අවශ්‍ය” බවයි.
යුක්‍රේනයට ඉහලින් පියාසර තහනම් කලාපයක් පැනවිය යුතු ද යන්න ගැන ද නේටෝව සහ යුක්‍රේනය සාකච්ඡා කරමින් සිටින අතර, එහිදී එක්සත් ජනපද මිලිටරි බලකායන් සෘජුවම රුසියානු ගුවන් යානා වලට වෙඩි තබනු ඇත. යුක්‍රේනයේ සැලකිය යුතු ප්‍රදේශයකට පියාසර තහනම් කලාපයක් පැනවීමට බටහිර කටයුතු කිරීම අවශ්‍ය බව යුක්‍රේන ජනාධිපති වොලොඩිමියර් සෙලෙන්ස්කි පැවසීය. රිපබ්ලිකන් කොන්ග්‍රස් සභික ඇඩම් කිංසිංගර් ඇතුලු එක්සත් ජනපද කොන්ග්‍රසයේ සාමාජිකයින් මෙන්ම එක්සත් රාජධානියේ දේශපාලනඥයන් ද එක්සත් ජනපදය හා නේටෝව යුක්‍රේනයට ඉහලින් පියාසර තහනම් කලාපයක් පනවන ලෙස ඉල්ලා ඇත.
පස්වනුව, මාධ්‍ය තුල සම්බන්ධීකරනය කල රුදුරු රුසියානු විරෝධී උද්ඝෝෂන ව්‍යාපාරයක් පවතී. සංගත මාධ්‍යවල සිට සමාජ මාධ්‍ය දක්වා පවතින යුද ප්රචාරක ප්‍රවාහය, සිරුර ලොමුදැහැගන්වන සුලුය. රුසියානු ම්ලේච්ඡ ක්‍රියාවන් චෝදනා එල්ලෙ කෙරෙන යුද බිමේ වාර්තාවක් සීඑන්එන්, හුස්මක් කටක් නොගෙනම ඉදිරිපත් කරන අතර, නිව් යෝර්ක් ටයිම්ස් සිය පිටුවලින් බහුතරයක් මේවා මුද්‍රනය කර ප්‍රකාශ කිරීමට කැප කරයි. සඳුදා, එන්බීසී වාර්තාකරු රිචඩ් එංගල් ට්විටර් හරහා ඇමරිකාව සහ නේටෝව විසින් කියෙව් නගරයෙන් පිටත රුසියානු රථ පෙලක් විනාශ කරනු ඇත් ද යන්න මතු කලේය, මෙයින් අදහස් කරන්නේ 'රුසියාවට එරෙහිව සෘජු ගැටුමක්' වුව ද සිදුවිය හැකිය යන්නයි.
යුක්‍රේන මිලිටරිය අන්ත දක්ෂිනාංශික හා ෆැසිස්ට් බලවේගවලින් පිරී ඇති බව නොතකා හරින අතරම, පහසුවෙන් රැවටෙන හා වංක යන දෙඅංශයෙන්ම විද්වතුන් විසින්, පුටින්ට සහ රුසියාවට එල්ල කරන ලද ප්‍රකාශ වලින් ට්විටර් පිරී ඉතිරී යයි.
මාධ්‍ය විසින් රුසියාව සහ රුසියානුවන් වෙත එල්ල කෙරෙන වෙඩි වරුසා රුසියාව හා රුසියානුවන්ට එරෙහිව වෛරී වාතාවරනයක් ඇති කිරීම ඉලක්ක කර ගෙන ඇත. රුසියානු සංගීතඥයින් සහ මලල ක්‍රීඩකයින් ජාත්‍යන්තර ඉසව්වල ප්‍රසංග පැවැත්වීම සහ තරඟ කිරීම වැලැක්වීමේ ව්‍යාපාරය මගින් එක්සත් ජනපදය රුසියානු ජනතාව ඉලක්ක කර නොගන්නා බවට කරන ප්‍රකාශයන්ගේ පල්ල යයි. මෙය රුසියානු භාන්ඩ රාක්ක වලින් ඉවත් කල යුතු යයි කියන ප්‍රකාශ සමඟ ඒකාබද්ධ වේ.
මෙම ප්රචාරක ප‍්‍රහාරයේ කේන්ද්‍රීය අරමුන වන්නේ, සමාජ අර්බුදයෙන්, ඉහල යන මිල ගනන්වලින් සහ වසංගතයෙන් සිදුවන මරන සංඛ්‍යාවේ කම්පනකාරී මට්ටම් වලින් ජනතාවගේ අවධානය වෙනතකට යොමු කිරීම හා මහජන කෝපය අධිරාජ්‍යවාදී යුද ධාවනය පිටුපස යොමු කිරීමට උත්සාහ කිරීමයි.
රුසියානු ආන්ඩුව යුක්‍රේනය ආක්‍රමනය කිරීමට එරෙහිව ලෝක සමාජවාදී වෙබ් අඩවියේ විරුද්ධත්වය මේ කිසිවකින්, කිසිඳු ආකාරයකින් වෙනස් නොවේ. රුසියානු කතිපයාධිකාරයේ කන්ඩායමක අවශ්‍යතා නියෝජනය කරන පුටින් තන්ත‍්‍රය, ප‍්‍රතිගාමී රුසියානු ජාතිකවාදය ප‍්‍රවර්ධනය කිරීම හරහා සෝවියට් සංගමය විසුරුවා හැරීමේ ව්‍යසනකාරී ප‍්‍රතිවිපාකවලට ප‍්‍රතිචාර දක්වමින්, න්‍යෂ්ටික ශිල්ප දැක්වීමේ අවදානම් සහගත සෙල්ලම් සහ තර්ජන ඒකාබද්ධ කරමින්, ඇමරිකානු සහ යුරෝපීය අධිරාජ්‍යවාදය සමග යම් ආකාරයක ගිවිසුමක ඇති කිරීමේ මංමුලා සහගත උත්සාහයක් දරයි.
ඇමරිකාව සහ නේටෝව විසින් යුද්ධය සඳහා තම සැලසුම් ඉදිරියට ගෙන යාමට ගසා කනු ලබන, මජහන ව්‍යාකූලත්වයක් සහ අවමංගත කිරීමක් අධිරාජ්‍යවාදී රටවල් තුල නිර්මානය කරමින්, රුසියානු හා යුක්‍රේන කම්කරු පන්තිය බෙදීම සඳහා පමනක් යුක්‍රේන ආක්‍රමනය සේවය කරනු ඇත.
රුසියාව කැබලි කිරීම සඳහා එක්සත් ජනපද හා යුරෝපීය අධිරාජ්‍යවාදයේ දිගුකාලීන අරමුනු, දැන් යුද උන්මාදය පිටුපස ඇති කේන්ද්‍රීය ගාමක බලවේගය වන වොෂින්ටනයේ සහ අනෙකුත් අගනුවරවල දැවැන්ත සමාජ හා ආර්ථික අර්බුදය සමග අන්තර්ඡේදනය වේ.
මෙම යුද්ධයේ උත්සන්න වීම මානව වර්ගයා ව්‍යසනයකට ඇද දැමීමට තර්ජනය කරයි. එවන් තතු යටතේ අවශ්‍ය වන්නේ, ධනේශ්වර ආන්ඩුවල සහ ජන මාධ්‍යවල ප්‍රචාරනයේ රැල්ලට ගසාගෙන යන චිත්තවේගයන් නොව, සිදුවෙමින් ඇති හා වර්ධනය වන දේ පැහැදිලිව විශ්ලේෂනය කර, එම පදනම මත, ක්ම්කරු පන්තිය සඳහා ස්වාධීන දිශානතියක් වර්ධනය කර ගැනීමයි.
ජාත්‍යන්තර කම්කරු පන්තිය මත පදනම් වූ නව මහජන යුද විරෝධී ව්‍යාපාරයක් තිබිය යුතුය. කෙසේ වෙතත් මෙම විරුද්ධත්වය, සමාජවාදය සඳහා දැනුවත් දේශපාලන ව්‍යාපාරයක් ලෙස වර්ධනය කල යුතුය. මෙයින් අදහස් කරන්නේ හතරවන ජාත්‍යන්තරයේ ජාත්‍යන්තර කමිටුව සහ එයට අනුබද්ධ සමාජවාදී සමානතා පක්ෂ සෑම රටකම ගොඩනැගීමයි.