மொழிபெயர்ப்பின் மூலக் கட்டுரையை இங்கே காணலாம்

கடந்த வெள்ளியன்று பைனான்சியல் டைம்ஸுக்கு அளித்த பேட்டியில், அமெரிக்க இந்தோ-பசிபிக் ஆணையகத்தின் தலைவர் அட்மிரல் ஜோன் அக்விலினோ, தைவான் தொடர்பாக மீண்டும் ஒருமுறை சீனாவைத் தாக்கினார், உக்ரேன் மீதான ரஷ்ய படையெடுப்பு, இந்தப் பிராந்தியத்தில் 'ஆம், இது உண்மையில் நடக்கலாம்' என அடையாளம் காட்டுவதாக அறிவித்தார். 'மனநிறைவு கொள்ளவேண்டாம்... நாம் எப்போதும் தயாராக இருக்க வேண்டும்.' என அவர் அறிவித்தார்,

கடந்த ஆண்டு காங்கிரஸின் உறுதிப்படுத்தல் விசாரணையின் போது, தைவான் மீது சீனாவுடனான போர் 'பெரும்பாலானோர் நினைப்பதை விட மிக நெருக்கமானது' என்று அக்விலினோ எச்சரித்தார். அவரது முன்னோடியான அட்மிரல் பில் டேவிட்சன் சில நாட்களுக்கு முன்பு, அமெரிக்கா ஆறு ஆண்டுகளுக்குள் சீனாவுடன் மோதலை எதிர்கொள்ளக்கூடும் என செனட் ஆயுத சேவைக் குழுவிடம் கூறியிருந்தார்.

போர் விமானங்கள், போர்க்கப்பல்கள், நீர்மூழ்கிக் கப்பல்கள் மற்றும் சமீபத்திய ஆயுதங்களுடன் ஆயுதம் ஏந்திய சுமார் 380,000 இராணுவ துருப்புக்கள் உள்ளடக்கிய மிகப்பெரிய அமெரிக்க கட்டளைக்கு தலைமை வகிக்கும் அக்விலினோ, அதன் இராணுவத்தை அமெரிக்க போர்த் திட்டங்களில் மேலும் ஒருங்கிணைக்க ஆஸ்திரேலியாவுக்கு சென்றிருந்தார். சீனாவால் முன்வைக்கப்படும் 'அச்சுறுத்தல்' மீதான அவரது கவனம், இந்தோ-பசிபிக் பகுதியில் ஒரு பாரிய அமெரிக்க இராணுவக் கட்டமைப்பினை நியாயப்படுத்துவதற்கும் மற்றும் பிராந்தியம் முழுவதும் நெருக்கமான கூட்டணிகள், மூலோபாய கூட்டாண்மைகள் மற்றும் அடிப்படை ஏற்பாடுகளை உருவாக்குவதற்குமான நியாயப்படுத்தலாகும்.

அக்விலினோ பைனான்சியல் டைம்ஸிடம், தைவான் அருகே அதன் 'அதிகரித்த கடல் மற்றும் வான்வழி நடவடிக்கைகளை' மேற்கோள் காட்டி, சீனா கடந்த ஆண்டில் 'தைரியத்தை' வெளிப்படுத்தியுள்ளது, சீனாவின் அணு ஆயுதக் களஞ்சியத்தில் 'மிகக் கூர்மையான அதிகரிப்பு', இந்த தசாப்தத்தில் 1,000 வெடிபொருட்களை முனையில் தாங்கும் ஏவுகணைகளை தாண்ட வைத்துவிடும் என பென்டகன் கூறியது. மேலும் கடந்த ஜூலை மாதம் ஒரு புதிய ஹைப்பர்சோனிக் ஆயுதத்தின் சோதனை ரீதியான ஏவுதலையும் செய்ய வைத்தது.

எவ்வாறாயினும், சீனாவின் இராணுவ விரிவாக்கம் அமெரிக்க ஏகாதிபத்தியத்தால் குள்ளமாக்கப்பட்டுள்ளது, அதன் இராணுவ வரவு-செலவுத் திட்டம் சீனா உட்பட உலகின் அடுத்த ஒன்பது நாடுகளை விட அதிகமாக உள்ளது. பென்டகனில் ஏற்கனவே ஆயிரக்கணக்கான அணு ஆயுதங்கள் உள்ளன, மேலும் அதன் அணு ஆயுதங்கள் மற்றும் விநியோக அமைப்புகளை மேம்படுத்த நூற்றுக்கணக்கான பில்லியன் டாலர்களை செலவழித்து வருகிறது. இது 2019 இல் ரஷ்யாவுடனான நடுத்தர அணு ஆயுத ஒப்பந்தத்தில் இருந்து வெளியேறியது மற்றும் சீன பிரதான நிலப்பகுதியை அடையும் வகையில் பசிபிக் பகுதியில் அத்தகைய ஆயுதங்களை நிலைநிறுத்தத் திட்டமிட்டுள்ளது.

கடந்த ஆண்டில், பைடென் நிர்வாகம் தைவான் மீதாக வேண்டுமென்றே சீனாவுடனான பதட்டத்தை அதிகப்படுத்தியுள்ளது, தைபேயின் சிவிலியன் மற்றும் இராணுவ அதிகாரிகளுடன் உயர்மட்ட அமெரிக்க விஜயங்களை நடத்தியது — அவை அமெரிக்க-சீன இராஜதந்திர உறவுகளின் அடிப்படையான ‘ஒரே சீனா’ கொள்கையை கேள்விக்குள்ளாக்கும் நடவடிக்கைகளாகும். சீன விமானங்கள் தைவானின் வான் பாதுகாப்பு அடையாள மண்டலத்தில் (ADIZ) -சர்வதேச சட்டத்தில் எந்த நிலையும் வகிக்காத வடிவமைப்பில்- அதிகரித்துள்ள நிலையில், பென்டகன் அதன் போர்க்கப்பல்களை தைவான் ஜலசந்தி வழியாக செல்வதையும் அத்துடன் சீனாவிற்கு அருகில் உள்ள நீர்நிலைகளில் போர் பயிற்சிகளின் அளவையும் எண்ணிக்கையையும் உயர்த்தியுள்ளது.

குறிப்பாக ஆத்திரமூட்டும் நடவடிக்கையாக ஆஸ்திரேலியாவுக்கு வருவதற்கு முன்னதாக, அக்விலினோ, சீன அதிகாரிகளுக்கு நேரடி சவாலாக தென் சீனக் கடலில் உள்ள சீனக் கட்டுப்பாட்டில் உள்ள தீவுகளுக்கு அருகில் அமெரிக்க கடற்படையின் உளவு விமானத்தில் பறந்தார். அருகிலுள்ள அமெரிக்க பிரதேசத்திலிருந்து ஆயிரக்கணக்கான கிலோமீட்டர் தொலைவில் இராணுவ விமானத்தில் பறக்கும் போது, இந்தோ-பசிபிக் தளபதி, தென் சீனக் கடலில் சீனா ஒரு 'தாக்குதல்' இராணுவத் திறனை நிறுவியதாக குற்றம் சாட்டினார்.

என்ன போலித்தனம்! முக்கியமான சீன இராணுவ தளங்களுக்கு அருகில் உள்ள மூலோபாய பகுதி வழியாக போர்க்கப்பல்கள் மற்றும் போர் விமானங்களை அனுப்புவதற்கான 'உரிமையை' அமெரிக்கா வலியுறுத்துகிறது, ஆனால் சீனா அமெரிக்க இராணுவப் படைகளின் அச்சுறுத்தலை எதிர்கொள்ள முற்படும்போது அது 'ஆக்கிரமிப்பு' நடவடிக்கைகளுக்கு தயாராகி வருவதாக குற்றம் சாட்டப்படுகிறது.

அக்விலினோவின் ஆறு நாள் ஆஸ்திரேலியா விஜயம், இது ஆஸ்திரேலிய பத்திரிகைகளில் விளம்பரப்படுத்தப்படவில்லை, சீனாவுடனான மோதலுக்கான வாஷிங்டனின் தயாரிப்புகளுடன் தெளிவாக இணைக்கப்பட்டுள்ளது. ஆஸ்திரேலிய இராணுவத் தலைவர்களுடன் கூட்டுத் திட்டமிடல் பேச்சுக்களுக்கு பல நாட்கள் கான்பெர்ராவிற்கு வருவதற்கு முன்பு, அக்விலினோ நாட்டின் வடக்கில் டார்வினில் நிறுத்தப்பட்டுள்ள அமெரிக்க கடற்படைகள் நிலைகொண்டுள்ள இடத்திற்குச் சென்றார்.

2011 ஆம் ஆண்டு ஆஸ்திரேலிய தொழிற் கட்சி பிரதம மந்திரி ஜூலியா கில்லார்ட் மற்றும் அமெரிக்க ஜனாதிபதி ஒபாமா இடையே கையெழுத்தான ஒப்பந்தத்தின் கீழ் 'சுழற்சி' அடிப்படையில் அமெரிக்க கடற்படையினர் ஆண்டுதோறும் டார்வினுக்கு அனுப்பப்படுகிறார்கள். இந்த ஆண்டு 2,200 அமெரிக்க கடற்படையினரின் குழு ஒரு மரைன் “ஆணையக உறுப்பு” மற்றும் அமெரிக்க படைப்பிரிவு மூலம் மேலும் மேம்படுத்தப்படுவது, அமெரிக்கா வடக்கு ஆஸ்திரேலியாவில் ஒரு முழுமையான செயல்பாட்டுப் பிரிவை நிலைநிறுத்த விரும்புகிறது என்பதற்கான அடையாளங்கள் ஆகும்.

பைனான்சியல் டைம்ஸ் (FT) கூறியது போல், 'அமெரிக்காவில் இருந்து அமெரிக்க நீண்ட தூர இராணுவ சக்தியின் ஆற்றலை சாத்தியமான எதிரிகளுக்கு விளக்கிக் காட்டுவதற்காக,” B-2 ஸ்டெல்த் குண்டுவீச்சு விமானத்தின் குழுவினரை சந்திக்க பிரிஸ்பேன் அருகே உள்ள ஆம்பர்லி விமானப்படை தளத்திற்கு ஆக்விலினோ பின்னர் பறந்தார். ஏமாற்றிக் குண்டுவீசும் விமானங்கள் ஆஸ்திரேலிய போர் விமானங்களுடன் 'சிக்கலான ஒருங்கிணைந்த பயிற்சியை' நடத்த உள்ளது.

அணுசக்தி திறன் கொண்ட B-2 குண்டுவீச்சு விமானம் B61 மற்றும் B83 அணுகுண்டுகள் உட்பட 18 டன் ஆயுதங்களை எடுத்துச் செல்ல முடியும். ஆக்விலினோ FT இடம் தனது இந்தோ-பசிபிக் ஆணையகமானது, சீனாவின் அச்சுறுத்தலுக்கு எதிராக ஒரு 'ஒருங்கிணைந்த தடுப்பை' வழங்க, மிகப்பெரிய அமெரிக்க அணு ஆயுதப் படைக்கலசாலையைக் கட்டுப்படுத்தும் மூலோபாய ஆணையகத்துடன் நெருக்கமாகப் பணியாற்றி வருவதாகக் கூறினார்.

அக்விலினோ கான்பெராவில் பல நாட்கள் ஆஸ்திரேலிய உயர்மட்ட இராணுவத் தலைவர்களுடன் மூடிய கதவு பேச்சு வார்த்தைகளில் ஈடுபட்டார். ஆஸ்திரேலிய கடற்படைக்கு அணுசக்தியால் இயங்கும் தாக்குதல் நீர்மூழ்கிக் கப்பல்களை வழங்குவதை உள்ளடக்கிய ஆஸ்திரேலியா, இங்கிலாந்து மற்றும் அமெரிக்கா இடையே கடந்த ஆண்டு எட்டப்பட்ட AUKUS ஒப்பந்தத்தின் மீதான விவாதங்களில் குறிப்பாக கவனம் செலுத்தப்பட்டன. ஆஸ்திரேலியாவும் அமெரிக்காவும் நீர்மூழ்கிக் கப்பல்களை விரைவில் நிலைநிறுத்த வேண்டியதன் அவசியத்தை உணர்த்தியுள்ளன. அவர்களின் முக்கிய நோக்கம் 'தற்காப்பு' அல்ல, மாறாக சீனாவுடனான எந்தவொரு போரிலும் அமெரிக்க கடற்படையுடன் இணைந்து செயல்படுவதாகும்.

தைவான் தொடர்பாக சீனாவுடன் எந்த மோதலிலும் ஆஸ்திரேலியாவும் ஜப்பானும் என்ன பங்கு வகிக்கும் என FT கேட்டதற்கு, அக்விலினோ அவர்கள் தாங்களாகவே முடிவு செய்ய வேண்டும் என்றார். உண்மையில், இரண்டு அமெரிக்க நட்பு நாடுகளும் தானாகவே சீனாவிற்கு எதிரான அமெரிக்கா தலைமையிலான போரில் ஈடுபடும்.

ஜப்பான் மிகப்பெரிய அமெரிக்க இராணுவ தளங்களையும், பாலிஸ்டிக் எதிர்ப்பு ஏவுகணை தளங்களையும் கொண்டுள்ளது, அவை அத்தகைய மோதலில் உடனடியாக செயல்படுத்தப்படும். மத்திய ஆஸ்திரேலியாவில் உள்ள பைன் கேப் தளம் உட்பட முக்கிய அமெரிக்க தகவல் தொடர்பு தளங்களுக்கு இல்லமாக ஆஸ்திரேலியா உள்ளது, இது அமெரிக்க இராணுவத்தின் மின்னணு உளவு மற்றும் இலக்கு அமைப்புகளுக்கு முக்கியமானது.