மொழிபெயர்ப்பின் மூலக் கட்டுரையை இங்கே காணலாம்.

உலக சோசலிச வலைத் தளமானது, கொலம்பியா, யேல் பல்கலைக்கழகம் மற்றும் நியூயோர்க் பல்கலைக் கழகங்களில் மேற்கொள்ளப்படும் பாரிய கைதுகள் உட்பட, எதிர்ப்பு போராட்டக்காரர்களுக்கு எதிரான அரச தாக்குதல்களின் பிரமாண்டமான விரிவாக்கத்தையும், அதனை பொய்கள் மற்றும் அவதூறுகளின் அடிப்படையில் நியாயப்படுத்துவதையும் கண்டனம் செய்கிறது. ஜனநாயக உரிமைகள் மீதான இந்தத் தாக்குதலை எதிர்ப்பதற்கும், காஸாவில் இனப்படுகொலையை முடிவுக்குக் கொண்டுவருவதற்கும், அமெரிக்காவிலும் சர்வதேச அளவிலும் தொழிலாள வர்க்கத்தின் பரந்த சாத்தியமான அணிதிரட்டலுக்கு நாங்கள் அழைப்பு விடுக்கிறோம்.

கடந்த வாரத்தில், பல்கலைக்கழக வளாகங்களில் போராட்ட எதிர்ப்பு இயக்கம் வளர்ந்துள்ளது. கொலம்பியாவில் பெருமளவில் கைது செய்யப்பட்டதைத் தொடர்ந்து, நியூயோர்க் நகரம், பாஸ்டன், மிச்சிகன், ஓஹியோ, வட கரோலினா, கலிபோர்னியா மற்றும் பல இடங்கள் உட்பட நாடு முழுவதும் உள்ள டசின் கணக்கான பள்ளிகளில் இப்போது போராட்ட முகாம்கள் அமைக்கப்பட்டுள்ளன. நியூயோர்க் நகரத்தில் உள்ள கொலம்பியா பல்கலைக்கழகம் மற்றும் நியூயோர்க் பல்கலைக்கழகம் ஆகியவற்றில், ஆசிரியர்கள் வெளிப்படையாக எதிர்ப்பு போராட்டக்காரர்களுடன் தங்களை ஒருங்கிணைத்துள்ளனர்.

இதற்கு பதிலடியாக, வெள்ளை மாளிகையானது பாசிச குடியரசுக் கட்சியினருடன் சேர்ந்து, அடக்குமுறை மற்றும் அவதூறுகளின் தீய மற்றும் ஒருங்கிணைந்த பிரச்சாரத்தைத் தொடங்கியுள்ளது.

கடந்த ஞாயிற்றுக்கிழமை, அமெரிக்க ஜனாதிபதி ஜோ பைடென், காஸாவில் இஸ்ரேலின் இனப்படுகொலைக்கு அமெரிக்காவின் “இரும்புக் கவச” ஆதரவை இரட்டிப்பாக்கி ஒரு அறிக்கையை வெளியிட்டார். “எங்கள் பள்ளிகள், சமூகங்கள் மற்றும் இணைய வழிகளில் யூத-விரோதத்தின் ஆபத்தான எழுச்சி உள்ளது” என்று அவர் கூறினார். இதே போன்ற அறிக்கைகளை நியூ யோர்க் நகரத்தின் ஜனநாயக கட்சி மேயர் எரிக் ஆடம்ஸ் மற்றும் நியூயோர்க் கவர்னர் கேத்தி ஹோச்சுல் ஆகியோர் வெளியிட்டனர். இவர்கள் அனைவரும் இனப்படுகொலையை எதிர்க்கும் மாணவர்களை “யூத-எதிர்ப்பு” என்று சாடுகின்றர்கள்.

திங்களன்று, பாசிச குடியரசுக் கட்சியின் செனட்டர்களான ரொம் காட்டன் மற்றும் ஜோஷ் ஹவ்லி ஆகியோர் கொலம்பியா பல்கலைக்கழகத்தில் மாணவர் எதிர்ப்பாளர்களை ஒடுக்க தேசிய காவலரை அனுப்புமாறு பைடெனுக்கு அழைப்பு விடுத்தனர். “கொலம்பியாவில் ஆரம்பமான படுகொலைகள் இன்றோடு நிறுத்தப்பட வேண்டும்” என்று காட்டன் X இல் எழுதினார். “எரிக் ஆடம்ஸ் நியூயோர்க் நகர பொலிசையும், கேத்தி ஹோச்சுல் தேசிய காவலரையும் அனுப்பவில்லை என்றால், ஜோ பைடென் இதற்கு பொறுப்பேற்று இந்த கும்பலை உடைக்க வேண்டிய கடமை உள்ளது” என்று அவர் எழுதினார்.

இது வெறும் அப்பட்டமான பொய்கள் மற்றும் ஓர்வெல்லியன் இரட்டைப் பேச்சு ஆகும். கல்லூரி வளாகங்களில் “யூத எதிர்ப்பு எழுச்சி” இல்லை. கூடுதலாக, இனப்படுகொலைக்கு எதிரான போராட்டங்களில், அதிக எண்ணிக்கையிலான யூத மக்கள், குறிப்பாக இளைஞர்கள் ஈடுபட்டு வருகின்றனர். போராட்டங்களின் மையமாக மாறியுள்ள நியூயோர்க் நகரம், இஸ்ரேலுக்கு வெளியே உலகிலேயே அதிக யூத மக்கள் தொகையைக் கொண்டுள்ளது.

அமெரிக்காவின் மிகப்பெரிய அரசியல் யூத அமைப்புகளில் ஒன்றான, அமைதிக்கான யூத குரல், கொலம்பியா பல்கலைக்கழகம் மற்றும் பல வளாகங்களில் அதன் போர்-எதிர்ப்பு நிலைப்பாட்டிற்காக தடைசெய்யப்பட்டுள்ளது. மேலும், நூற்றுக்கணக்கான யூத மாணவர்களும் எதிர்ப்பாளர்களும் இல்லையென்றாலும் டசின் கணக்கானவர்கள் இப்போது தொடர்ந்து கைது செய்யப்பட்டு, இடைநீக்கம் செய்யப்பட்டு, அவர்களின் அரசியல் கருத்துக்களுக்காக பணிநீக்கம் செய்யப்பட்டுள்ளனர்.

ஹவ்லி மற்றும் காட்டனைப் பொறுத்தவரை, அவர்களின் சொந்த அரசியலில், உண்மையான யூத-விரோதத்தின் துர்நாற்றத்தைக் கொண்டுள்ளது. ட்ரம்பின் ஜனவரி 6 ஆட்சிக்கவிழ்ப்பின் முன்னணி ஆதரவாளராக ஹாவ்லி இருந்தார். மேலும், அவரும் இதர பாசிச குடியரசுக் கட்சியினரும் அதிதீவிர வலதுசாரி மற்றும் யூத-விரோத “பெரிய மாற்றுக் கோட்பாட்டை” ஊக்குவித்துள்ளனர். உக்ரேனில், பைடென் நிர்வாகம் அசோவ் பட்டாலியன் உட்பட நவ-நாஜிக்களின் பற்களுக்கு ஆயுதம் வழங்கியுள்ளது. நாஜி தலைமையிலான படுகொலையின் போது நூறாயிரக்கணக்கான உக்ரேனிய யூதர்களைக் கொன்றதில் சம்பந்தப்பட்ட ஒரு அமைப்பான உக்ரேனிய தேசியவாதிகளின் (OUN) பாரம்பரியத்தில் அசோவ் பட்டாலியன் பெருமையுடன் தன்னை இணைத்துக் கொள்கிறது.

தேசிய காவல்படை அல்லது இதர இராணுவ நடவடிக்கைக்கு ஹாவ்லி மற்றும் காட்டன் விடுத்த அழைப்பு ஒரு மோசமான வரலாற்று முன்னுதாரணத்தை தூண்டுகிறது: 54 ஆண்டுகளுக்கு முன்பு, மே 4, 1970ல், கென்ட் அரச பல்கலைக்கழகத்தில் கம்போடியா மீதான அமெரிக்க ஆக்கிரமிப்புக்கு எதிர்ப்பு தெரிவித்த மாணவர்களை ஒடுக்க, நிக்சன் நிர்வாகம் மற்றும் ஓஹியோ கவர்னர் ஆகியோரால் தேசிய காவல்படை அணிதிரட்டப்பட்டது. தொடர்ந்து நடந்த படுகொலையில், 13 மாணவர்கள் சுட்டுக் கொல்லப்பட்டனர், அவர்களில் 4 பேர் உயிரிழந்தனர்.

ஹவ்லியும் காட்டனும் இதைத்தான் மனதில் வைத்திருக்கிறார்களா?

40,000ம் அப்பாவி மக்களின் படுகொலைக்கு ஒப்புதல், நிதி மற்றும் உறுதுணையாக இருக்கும் அரசாங்கங்கள், தங்கள் சொந்த மக்களுக்கு எதிரான பாரிய வன்முறையை அங்கீகரிக்கும் திறன் கொண்டவை ஆகும். ரிச்சர்ட் நிக்சன் முன்னதாக மாணவர்களை “தவறு” என்று கண்டித்தார். இப்போது, “யூத-எதிர்ப்பாளர்கள்” என்று பைடெனின் அவதூறு, போரை எதிர்ப்பவர்களுக்கு எதிராக இதேபோன்ற அரச வன்முறையை சட்டப்பூர்வமாக்க வடிவமைக்கப்பட்டுள்ளது.

ஆளும் வர்க்கமானது, அதன் இஸ்ரேலுக்கான ஆதரவுக்கு மட்டுமல்ல, அது பின்பற்றிவரும் பரந்த போர்க் கொள்கைக்கும், இடம்பெற்றுவரும் எதிர்ப்பு போராட்டங்களை அச்சுறுத்தலாகக் கருதுகிறது.

இந்த வார இறுதியில், காஸாவில் இஸ்ரேலிய இனப்படுகொலை மற்றும் ஈரானுடனான இராணுவ மோதலுக்கு $26 பில்லியன் டாலர்கள் உட்பட $95 பில்லியன் டாலர்கள் கூடுதல் இராணுவ நிதியை வழங்குவதற்காக ஜனநாயகக் கட்சி, பாசிச குடியரசுக் கட்சியினருடன் இணைந்து கொண்டது. அலெக்ஸாண்டிரியா ஒகாசியோ-கோர்டெஸ் மற்றும் இல்ஹான் ஓமர் போன்ற ஜனநாயகக் கட்சியினரின் “குழு” என்று அழைக்கப்படுபவர்கள் உட்பட அனைத்து ஜனநாயகக் கட்சியினரும், உக்ரேனில் படுகொலைகளை மேற்கொள்வதற்கு மேலும் 61 பில்லியன் டாலர்கள் மற்றும் தைவானை சீனாவுடனான போருக்கான தளமாக மாற்ற $8 பில்லியனை டாலர்களை வழங்குவதற்கு ஆதரவாக வாக்களித்தனர்.

உலகெங்கிலும் உள்ள முதலாளித்துவ அரசாங்கங்களால் இதே போன்ற நடவடிக்கைகள் எடுக்கப்படுகின்றன. ஜேர்மனியில், இனப்படுகொலைக்கு எதிரான போராட்டக்காரர்கள் மீதான “யூத எதிர்ப்பு” என்ற அவதூறு, நாஜி ஆட்சியின் வீழ்ச்சிக்குப் பின்னர் அரசியல் செயல்பாட்டிற்காக யூத குடிமக்கள் அதிக எண்ணிக்கையில் கைது செய்யப்படுவதற்கு வழிவகுத்தது. கடந்த திங்களன்று, ஜேர்மன் ஜனாதிபதி ஃபிராங்க்-வால்டர் ஸ்டெய்ன்மையர் இனப்படுகொலைக்கு உடந்தையாக இருந்ததற்காக, அவரை இலக்கு வைத்து நடத்தப்பட்ட எதிர்ப்பு போராட்டத்தில் ஈடுபட்டவர்களை துருக்கிய பொலிசார் தாக்கி இடையூறு செய்தனர்.

இனப்படுகொலைக்கு எதிரான எதிர்ப்பை யூத-விரோதத்துடன் தவறாக அடையாளம் காண்பது என்பது, ஏகாதிபத்தியம் மற்றும் முதலாளித்துவத்தின் குற்றங்களுக்கு எதிரான எந்தவொரு எதிர்ப்பையும் குற்றமாக்குவதை நோக்கமாகக் கொண்டுள்ளது. அதன் இலக்கு, காஸா மீதான இனப்படுகொலையை எதிர்ப்பவர்கள் மட்டுமல்ல, அடிப்படையில், இளைஞர்கள் மத்தியில் மற்றும் எல்லாவற்றிற்கும் மேலாக தொழிலாள வர்க்கத்திற்குள்ளேயே போர் மற்றும் முதலாளித்துவத்திற்கு எதிரான ஒரு பரந்த இயக்கத்தை வன்முறையாக ஒடுக்குவதற்கு தயார்படுத்துவதும், எழுச்சியை முன்கூட்டியே தடுப்பதும், இதன் நோக்கமாகும்.

கென்ட் அரச படுகொலைக்கு இணையான ஒரு முக்கியமான பாடம் உள்ளது. அஞ்சல் மற்றும் வாகனத் தொழிலாளர்கள் உட்பட அமெரிக்க வரலாற்றில் மிகப்பெரிய வேலைநிறுத்த இயக்கங்களில் ஒன்றின் மத்தியில் இந்தப் படுகொலை நிகழ்ந்தது. பிரான்சில் பாரிய மாணவர் போராட்டங்கள் ஒரு பொது வேலைநிறுத்தத்தைத் தூண்டி, அரசாங்கத்தை வீழ்ச்சியின் விளிம்பிற்குக் கொண்டு வந்து கிட்டத்தட்ட சரியாக இரண்டு ஆண்டுகளுக்குப் பிறகு இது நடந்தது. மாணவர் போராட்டங்கள் தொழிலாளர் இயக்கத்துடன் ஒன்றிணைந்து வெளிப்படையாக சோசலிச நோக்குநிலையைப் பெற்றுவிடும் என்று பயந்த அமெரிக்க ஆளும் வர்க்கம், அவற்றை அடக்குவதற்கு கசப்பான அரச வன்முறையை பயன்படுத்துகிறது.

கடந்த ஒரு மாதமாக நடந்துவரும் எதிர்ப்பு போராட்டங்கள், தொழிலாள வர்க்கத்தின் மிகப் பரந்த போர்-எதிர்ப்பு இயக்கம் மற்றும் புரட்சிகரப் போராட்டங்களின் ஆரம்ப கட்டங்கள் என்பதை ஆளும் வர்க்கம் நன்கு அறிந்திருக்கிறது.

எவ்வாறாயினும், இனப்படுகொலைக்கு எதிரான இயக்கம் வெளிப்படையாக ஜனநாயகக் கட்சியுடன் முறித்துக் கொண்டு தொழிலாள வர்க்கத்தில் வேரூன்றாத அளவுக்கு, அது தனிமைப்படுத்தப்பட்டு, அரசியல் ரீதியாக தடம் புரளுவதுடன், அரசின் அடக்குமுறைக்கு எளிதான இலக்காக மாற்றப்படலாம்.

எனவே மாணவர்களை நாங்கள் கேட்டுக்கொள்கிறோம்: சர்வதேச தொழிலாள வர்க்கத்தின் பக்கம் திரும்புங்கள்! ஆசிரியர்கள், சுகாதாரம், வாகனம், தளவாட விநியோகங்கள் மற்றும் போக்குவரத்துத் தொழிலாளர்கள் மத்தியில் ஆதரவைத் திரட்டுங்கள்! ஜனநாயகக் கட்சியின் முதலாளித்துவ அரசியலில் இருந்து முறித்துக் கொள்ளுங்கள்!

நாங்கள் தொழிலாளர்களை வலியுறுத்துகிறோம்: மாணவர்களின் பாதுகாப்பை எடுங்கள்! அவர்களின் ஜனநாயக உரிமைகள் மீதான தாக்குதல் உங்கள் ஒட்டுமொத்த வர்க்கத்தின் மீதான தாக்குதலாகும். இந்த அரச பிரச்சாரத்தின் குறிக்கோள், பல்கலைக்கழக வளாகங்களில் மட்டுமல்ல, சமூக மற்றும் அரசியல் வாழ்வின் அனைத்து பகுதிகளிலும் பேச்சு சுதந்திரத்தை ஒழித்துக் கட்டுவதாகும். வெளிநாட்டில் இராணுவவாதத்தின் வெடிப்பு உள்நாட்டில் பேச்சு சுதந்திரத்திற்கான உரிமையுடன் பொருந்தாது. காஸாவில் இனப்படுகொலை மற்றும் உக்ரேனில் நடந்துவரும் போருக்கான ஆயுத விநியோகத்துக்கான உற்பத்தியை உடனடியாக நிறுத்துவதற்கு, தொழிற்சங்க அதிகாரத்துவங்கள் மற்றும் இரு ஆளும் வர்க்கக் கட்சிகளிலிருந்து சுயாதீனமாக அணிதிரளுங்கள்!

இனப்படுகொலை, ஏகாதிபத்தியப் போர் மற்றும் ஜனநாயக உரிமைகள் மீதான தாக்குதலுக்கு எதிரான போராட்டத்தை வர்க்கப் போராட்டத்தின் வளர்ச்சியுடன் இணைத்து தொழிலாள வர்க்கத்தில் ஒரு புரட்சிகர மார்க்சிச தலைமையை கட்டியெழுப்புவதில் இப்போது எல்லாம் தங்கியுள்ளது.

நான்காம் அகிலத்தின் அனைத்துலகக் குழுவால் ஏற்பாடு செய்யப்பட்டுள்ள இந்த ஆண்டின் சர்வதேச மே தின சர்வதேச இணையவழி கூட்டமானது, ஏகாதிபத்திய போருக்கு எதிராக ஒரு தொழிலாளர்கள் மற்றும் சோசலிச இயக்கத்தை வளர்த்தெடுப்பதில் கவனம் செலுத்தும். எங்கள் வாசகர்கள் அனைவரையும் wsws.org/mayday இல் பதிவுசெய்து, இந்தக் கூட்டத்தை முடிந்தவரை பரவலாக ஊக்குவிக்குமாறு கேட்டுக்கொள்கிறோம்.