[මෙය Imperialist powers turn UN General Assembly into a war summit යන මැයෙන් 2024 සැප්තැම්බර් 23 පල කෙරුනු ඉදිරිදර්ශන ලිපියේ පරිවර්තනයයි.]
දෙවන ලෝක යුද්ධයේ සුන්බුන් මධ්‍යයේ, 1945 දී ආරම්භ කරන ලද එක්සත් ජාතීන්ගේ සංවිධානය ජාත්‍යන්තර ගැටුම් රාජ්‍ය තාන්ත්‍රික නිරාකරනය හරහා, තමන් “අපගේ ජීවිත කාලය තුල දෙවතාවක් මනුෂ්‍ය වර්ගයාට කියා නිම කල නොහැකි දුක්ගැටලු ගෙන දුන් යුද්ධයේ ව්‍යසනයෙන් පසු පරම්පරාවන් ගලවා ගන්නා බව” කියා සිටියේ ය.
ඇත්ත වශයෙන්ම, එක්සත් ජාතීන්ගේ සංවිධානයේ ආරම්භය, 20 වැනි සියවසේ මුල් භාගයේ ලෝක යුද්ධවලට තුඩු දුන් අත්‍යවශ්‍ය ප්‍රතිවිරෝධතා කිසිවක් විසඳුවේ නැත. ට්‍රොට්ස්කිවාදී ව්‍යාපාරය නව සංවිධානය හැඳින්වූයේ “සොරුන්ගේ නව තිප්පොල” ලෙසිනි. මෙම නාමකරනය ඊට පෙර පැවති එක්සත් ජාතීන්ගේ සංගමය පිලිබඳව ලෙනින්ගේ ගුනාංගීකරනය හා සම්බන්ද වේ. මෙය මේ සතියේ නිව්යෝර්ක් නුවර දී ආරම්භ වීමට නියමිත එක්සත් ජාතීන්ගේ රැස්වීමට සුදුසු පැහැදිලි කිරීමකි.
එක්සත් ජනපදය හා එහි අධිරාජ්‍යවාදී සගයෝ, ලොව පුරා ලේ වැකි මිලිටරි ගැටුම් අවුලුවාලීමේ අරමුන ඇතිව එක්සත් ජාතීන්ගේ මහා මන්ඩලය යුද සමුලුවක් බවට පත් කිරීමට උත්සාහ කරති.
මැද පෙරදිග දී, ඊශ්‍රායලය සහ එහි අධිරාජ්‍යවාදී ආධාරකරුවෝ දැනටමත් නිල වශයෙන්, 40,000 කට වැඩි පිරිසක් ඝාතනය කරනු ලැබ ඇති ගාසා ජන සංහාරය කලාපීය යුද්ධයක් දක්වා පුලුල් කරමින් සිටිති. අධිරාජ්‍යවාදී බලවත්තු, [යුද ආතතිය] “තීව්‍ර වීම අඩු කිරීම” අපේක්ෂා කරනවා වෙනුවට, ලෙබනනය සමග පමනක් නොව ඉරානය සමගද පුර්න පරිමාන යුද්ධයක් අවුලුවාලීමට හිතාමතා ම උත්සාහ කරති.
එක්සත් ජනපදය සහ නැටෝව නැගෙනහිර යුරෝපයේ යුක්රේනයේ සිට රුසියාවේ භූමිය තුලට නැටෝ අවිආයුධ එල්ල කිරීමක අද්දර සිටින අතර, මෙය යුද්ධය ඉහලින් ම උත්සන්න කිරීමේ පියවරකි.
රැස්වීමට පෙර, එක්සත් ජාතීන්ගේ මහලේකම් අන්ටෝනියෝ ගුටරෙස් ප්‍රකාශ කලේ, “පාලනය කර ගත නොහැකි භූ දේශපාලන බෙදීම් සහ පැන නැගෙන ගැටුම් පෙනෙන්නට ඇත” යනුවෙනි. එක්සත් ජාතීන්ගේ මහා මන්ඩල ලේඛනයට පෙර නිකුත් කරන ලද ප්‍රකාශයක් ගැන ගුටරෙස් කතා කරමින් සිටියේ,
“බොහොමයක් අපගේ තෝරා ගැනීම් හේතුවෙන් පැන නැගෙන ව්‍යසනකාරී සහ පැවැත්ම පිලිබඳ අවදානම්වලට අපි මුහුන දෙමින් සිටිනවා. සහෝදර මනුෂ්‍ය වර්ගයා දරුනු දුක් වේදනාවලට ගොදුරු වෙමින් සිටිනවා. අපි මේ තත්වය වෙනස් නොකරන්නේ නම්, නොනවතින අර්බුද සහ බිඳවැටීමේ අනාගතයකට අපි යොමු වීමේ අවදානමක් ඇත,” යනුවෙනි.
කෙසේ වෙතත්, එක්සත් ජාතීන්ගේ රැස්වීම මෙම “ව්‍යසනකාරී සහ පැවැත්ම පිලිබඳ අවදානම්වලින්” අත් මිදීමේ මාර්ගයක් සොයනු ඇතැයි යන මතය දවල් සිහිනයකි.
ඒ වෙනුවට, මහා සභාව එක්සත් ජනපද ජනාධිපති ජෝ බයිඩන්, ප්‍රංශ ජනාධිපති එමානුවෙල් මැක්‍රොන්, ජර්මානු චාන්සලර් ඔලාෆ් ෂොල්ට්ස් සහ එක්සත් රාජධානියේ අගමැති කෙයර් ස්ටාර්මර් ඇතුලු යුද අපරාධකරුවන්ගෙන් මෙන්ම ඔවුන්ගේ කුලීකාර දඩ බල්ලන් වන ඊශ්‍රායල අගමැති බෙන්ජමින් නෙතන්යාහුගේත් සහ යුක්රේන ජනාධිපති වොලොදිමීර් සෙලෙන්ස්කිගේත් දේශනවලට ඇහුම්කම් දෙනු ඇත.
තම අන පරිදි දෛනික සන්නිවේදන උපාංග දහස් ගනනක් බෝම්බ බවට පත් කරමින් පුපුරවා හැරීමට සලස්වමින් ලෙබනනයේ ලේ වැකි ත්‍රස්තවාදී ප්‍රහාරයක් එල්ල කිරීමෙන් පසු නෙතන්යාහු එක්සත් ජාතීන්ගේ මහා මන්ඩලය අමතනු ඇත. මෙම ඇමතුම සිදුවන්නේ එක්සත් ජාතීන්ගේ විශේෂ වාර්තාකරු ෆ්‍රැන්සෙස්කා ඇල්බනීස් විසින් ගාසා තීරයේ ජන සංහාරයක් සිදුවන බවටත් සහ එක්සත් ජාතීන්ගේ ආහාර අයිතිය පිලිබඳ විශේෂ වාර්තාකරු මයිකල් ෆක්රි විසින් [ඊශ්‍රායෙල් ආන්ඩුව] පලස්තීන ජනතාව හිතාමතාම සාගින්නට හෙලා ඇති බවටත් වාර්තා කර පවතින තතු යටතේය.
නෙතන්යාහු ජන සංහාරය, ම්ලේඡ්චත්වය සහ ගෝලීය අවනීතිය ආරක්ෂා කරනු ඇත. විවෘත ලේ පිපාසිතයකු ලෙස කිසිවෙකුට නෙතන්යාහු සම කල නොහැකි වුවද, ඔහුට නොදෙවැනි ලෙස යුක්රේන ජනාධිපති වොලොදිමීර් සෙලෙන්ස්කි සිටී. සෙලෙන්ස්කි යනු එක්සත් ජනපද හා යුරෝපීය අධිරාජ්‍යවාදය විසින් යුක්රේන මහජනතාව මත පිහිටුවන ලද ආඥාදායකත්වයක් යටතේ, තම ව්‍යවස්ථාපිත කාල සීමාවෙන් පිටත හදිසි නීතිය මගින් පාලනය ගෙන යන “ජනාධිපතියෙකි”.
රුසියාවට දිගු දුර ආයුධවලින් පහර දීමට යුක්රේනයට ඉඩ දෙන ලෙස එක්සත් ජනපදය හා නැටෝ බලවතුන්ගෙන් ඉල්ලා සිටිනු ඇති සෙලෙන්ස්කි, මොස්කව් සමඟ යුද්ධයට සම්බන්ධ වීමේ සියලු සීමාවන් අත්හැර දමන ලෙසද ඉල්ලා සිටිනු ඇත. සෙලෙන්ස්කි [මහා මන්ඩල සැසියේදී] “රුසියාව සම්බන්ධ ඊනියා රතු ඉරි පිලිබඳ සමස්ත බොලඳ, මිත්‍යා සංකල්පය” “කඩා වැටී ඇත” යන තම හෙලා දැකීම පුනරුච්චාරනය කරනු ඇත.
එක්සත් ජාතීන්ගේ මහා මන්ඩල සැසියේදී සෙලෙන්ස්කිගේ පෙනී සිටීම සුපරීක්ෂාකාරීව සැලසුම් කෙරෙනු ඇත්තේ එක්සත් ජනපදය සමග පෙලගැසී ඇති මාධ්‍ය තුල රුසියාවට එරෙහි යුද්ධයේ දී නැටෝ බලවතුන්ට සියලු සීමා වීම් අත්හරින ලෙස බල කරන උද්වේගකර ප්‍රචාරයකටයි.
මේවායින් වඩාත් ඝෝෂාකාරී වූයේ හිටපු එක්සත් රාජධානියේ අගමැති වූ බොරිස් ජොන්සන්ගේ ප්‍රකාශයි. ඔහු ද ස්පෙක්ටේටර් වෙත ප්‍රකාශ කලේ “යුක්රේනයට නැටෝවට බැඳීමට ඉඩ දීමට කාලය ඇවිත්” යනුවෙනි. එක්සත් රාජධානියේ මිනිසුන් 232,112 ක් බිලිගත් කොවිඩ්-19 වසංගතය ගැන ප්‍රසිද්ධියේ “මල සිරුරු ගොඩගැසීමට ඉඩ දිය” යුතුයි යනුවෙන් පැවසූ ජොන්සන්, යුද්ධයේදී ද එම ප්‍රතිපත්තිය ම ඉල්ලා සිටී.
ජොන්සන් මෙසේ ලිවීය:
“රුසියාවේ පුටින්ගේ කඳවුරුවලට එරෙහිව ස්ටෝම් ෂැඩෝ මිසයිල භාවිතා කිරීමට අවසර ලබා ගැනීමට ප්‍රමාද කරන තත්වය කුමක්ද? ‘තීව්‍ර කිරීම’ සහ පුටින් කුපිත කිරීමට ඇති ඊනියා භීතිය ගැන වෙහෙසට පත් වූ පැරනි නොවැදගත් කතා කරුනාකර අපට නතර කල හැකිද? එම තර්කය පසුගිය වසර තුන තුල සෑම අදියරකදීම නැඟී ඇති අතර, සෑම අදියරකදීම එය සිදුවීම් මගින් නිෂ්ප්‍රභා කරනු ලැබ ඇත.”
යුක්රේනය නැටෝවට බැඳෙන ලෙස ඔහු විවෘතව ඉල්ලා සිටියේ ය. “යුද්ධය අවසන් වීමටත් පෙර අපට යුක්රේනයට එක්වන ලෙස ආරාධනා කල හැකිය,” යනුවෙන් පැවසූ ඔහු “5 වැනි වගන්තිය මගින් ආරක්ෂක සහතිකයක්” සහ “තමන්ට 1991 ජාතියක් ලෙස පැවැති සමස්ථ ජාතික මට්ටමට යුක්රේනියානුවන්ට පරම අයිතිය” ඇතැයිද ඔහු පැවසී ය.
රුසියාවට එරෙහි ව සක්‍රීයව යුද්ධයක යෙදී සිටිය දී යුක්රේනයට නැටෝවට බැඳෙන ලෙස කරන කැඳවීම, රුසියාවට එරෙහිව යුද ප්‍රකාශ කිරීමට සහ නැටෝවේ යුද ඉලක්කයක් ලෙස ක්‍රිමියාව යටත් කර ගැනීම විධිමත් ලෙස සම්මත කර ගැනීම සඳහා නැටෝවට කරන කැඳවීමක්ද වේ. න්‍යෂ්ටිකව සන්නද්ධ රාජ්‍යයන් දෙකක් අතර කිසිදාක විධිමත් යුද ප්‍රකාශයක් සිදුවී නොමැත. එවැනි සිද්ධියක් සීතල යුද්ධය පුරාවට ම, තාප න්‍යෂ්ටික යුද්ධයේදී මානව ශිෂ්ටාචාරයේ අවසානය පෙන්නුම් කරන “අවසන් සංග්‍රාමය” ලෙස සලකුනු ලැබුනි.
නමුත් එකම දෙය දිගටම කතා කරන ජොන්සන්ගේ ලිපි සහ කතුවැකි ප්‍රමානයක ඔහු වඩාත්ම ආක්‍රමනශීලී විය. “රුසියාවේ මිලිටරි ඉලක්ක වෙත ඇමරිකානු මිසයිලවලින් පහර දීමට යුක්රේනයට ඉඩ දෙන්න” යනුවෙන් දි ඉකොනොමිස්ට් සඟරාව කතුවැකියක ප්‍රකාශ කල අතර වොෂින්ටන් පෝස්ට් ඉල්ලා සිටියේ “බයිඩන් යුක්රේනයට දිගු දුර විදින මිසයිල ලබා දිය යුතුය” යනුවෙනි.
අධිරාජ්‍යවාදී ප්‍රචන්ඩත්වයේ ප්‍රචන්ඩකාරී පුපුරා මතුවීම යනු, තමන් අධිකාරය දරන භූ දේශපාලන පර්යායේ ගැඹුරුවන අර්බුදයක් ලෙස ඔවුන් දකින දෙයට අධිරාජ්‍යවාදී බලවතුන් දක්වන ප්‍රතිචාරයයි. එක්සත් ජාතීන්ගේ මහා මන්ඩලය පෙරදසුන් කරමින් ලිපියක බ්ලූම්බර්ග් මාධ්‍ය අනතුරු ඇඟවූයේ, “[එක්සත් ජනපද] ආධිපත්‍යයට අභියෝග කිරීමට විරුද්ධවාදීන් කල්ලි ගැසීමේදී එක්සත් ජනපදයේ කරදර ගැඹුරු වේ” යනුවෙනි.
එය එක්සත් ජාතීන්ගේ හිටපු කෙන්යානු තානාපති සහ එන්වයියූහි ජාත්‍යන්තර සහයෝගිතා මධ්‍යස්ථානයේ අධ්‍යක්ෂ මාර්ටින් කිමානි උපුටා දක්වමින්, සඳහන් කලේ “එක්සත් ජනපද බලපෑම අඩුවෙමින් පවතින අතර එය ශීඝ්‍රයෙන් අඩුවෙමින් පවතී” යනුවෙනි. බ්ලූම්බර්ග් තවදුරටත් සඳහන් කලේ, “අනෙකුත් බලවතුන්ගේ බලපෑම වැඩිවන නිසා එක්සත් ජනපදය බොහෝ විට පසුපසට යන ආකාරය මෙම රැස්වීම අවධාරනය කිරීමට ඉඩ ඇත” යනුවෙනි.
ලිපිය වැඩිදුරටත් සඳහන් කලේ මෙසේ ය:
මේ සතියේ නිව්යෝර්ක් නුවරට බ්‍රික්ස් සංවිධානයේ [BRICS] නිලධාරීන් රැස්වනු ඇත. සමහර එක්සත් ජනපද මිත්‍ර රටවල් මෙන්ම ඉරානය සහ [බ්‍රික්ස් සංවිධානයේ] නිර්මාතෘ රුසියාව සහ චීනය ඇතුළුව බ්‍රික්ස් සංවිධානය සාමාජිකයින් නව දෙනෙකු දක්වා වර්ධනය වී ඇත. එක්සත් ජනපද ඩොලරයේ ආධිපත්‍යයට ප්‍රතිවාදීන් ඇතුලු ගෝලීය බලපෑමේ විකල්ප මධ්‍යස්ථානයක් නිර්මානය කිරීම සඳහා පැහැදිලිව ම කැඳවනු ලබන කන්ඩායමකට සම්බන්ධ වීමට තවත් රටවල් අයදුම් කරති.
සිකුරාදා පලමු වතාවට රත්‍රන්වල මිල (ඩොලරයේ අවිනිශ්චිතතාවයේ දර්ශකයක් ලෙස සැලකේ) ඩොලර් 2,600 දක්වා ඉහල යාමත් සමඟ එක්සත් ජනපද ඩොලරයේ ගැඹුරු වන අර්බුදයක් මධ්‍යයේ මෙම සමුළුව පැවැත්වේ. මේ වසර මුල දී අවුන්සයකට ඩොලර් 2,000ක් වූ එහි පෙර ඉහලම අගය බිඳ දමමින් 2024 දී රත්‍රන්වල මිල සියයට 27 කින් වැඩි වී ඇත. ඓතිහාසික වශයෙන්, ඩොලරය කෙරෙහි විශ්වාසය දුර්වල වන විට, රත්රන් සඳහා ඉල්ලුම වැඩි වන්නේ පහත වැටෙන ඩොලරයට එරෙහිව ආරක්ෂාවක් ලෙස එහි (රත්‍රන්වල) මිල ඉහල යමිනි.
තවද රත්රන් මිල ඉහල යන විට, එක්සත් ජනපද රාජ්‍ය නය ඩොලර් ට්රිලියන 35 දක්වා ලඟා වී තිබේ. මෙම නය එක්සත් ජනපදය ලොව පුරා යුද්ධ සඳහා මුදල් සපයා ඇති බැවින් විශාල වශයෙන් පුළුල් වී ඇත. ඇමරිකානු පුවත්පත් (වෝල් ස්ට්‍රීට් ජර්නලය) “එක්සත් ජනපද ජාතික නය අර්බුදයක් පැමිනේ” යනුවෙන්ද සහ (වොෂින්ටන් පෝස්ට්) “ඩොලරය මිය ගිය දිනය එනවා. මොකක්ද සැලැස්ම?” වැනි සිරස්තල පල කරයි.
අධිරාජ්‍යවාදී බලවතුන්ගේ “සැලැස්ම” ගෝලීය යුද්ධයයි. ගැඹුරු වන ආර්ථික අර්බුදය විසින් එක්සත් ජනපදයේත් සහ එහි අධිරාජ්‍යවාදී සගයින්ගේත් ආධිපත්‍යය සුරක්ෂිත කර ගැනීම සඳහා ගෝලීය යුද්ධයක් මෙහෙයවමින් පවතී. ඔවුන්ගේ කොල්ලකාරී යුද අරමුනු සාක්ෂාත් කර ගැනීම සඳහා, ඔවුන් ජන සංහාරයේ සිට, සිවිල් ජනතාවට එරෙහි මහා ත්‍රස්තවාදයේ සහ න්‍යෂ්ටික යුද්ධයේ තර්ජනයේ සිට සියලු ආකාරයේ සමාජ ම්ලේච්ඡත්වය සාමාන්‍යකරනය කරමින් සිටිති.
එක්සත් ජාතීන්ගේ සංවිධානය සහ ජාත්‍යන්තර උසාවි ඇතුලු ධනේශ්වර පාලනයේ කිසිදු ආයතනයකට මෙම ම්ලේච්ඡත්වය කරා පිරිහීම නැවැත්වීමට හැකියාවක් නැත.
එහෙත් අධිරාජ්‍යවාදී යුද්ධයේ පිපිරුම නිෂ්පාදනය කරන එම අර්බුදයම ලෝකය පුරා කම්කරුවන්ගේ වැඩ වර්ජන හා අරගල රැල්ලකට උත්තේජනය සපයමින් පවතී. මෙවර න්‍යෂ්ටික අවි සමග ඒකාබද්ධව, 20 වැනි සියවසේ ම්ලේච්ඡත්වයට යලි යාම වැලැක්වීම, ඉටු කල හැක්කේ, කම්කරු පන්තිය තුල බලගතු යුද විරෝධී ව්‍යාපාරයක් ගොඩනැගීම තුලින් පමනි. කම්කරුවන් අරගලයට උත්තේජනය කරන සමාජ ඉල්ලීම්, සමාජවාදී ඉදිරිදර්ශනයක් මත පදනම් වූ බලගතු යුද විරෝධී ව්‍යාපාරයක් ගොඩනැගීම තුල, යුද්ධයට එරෙහි සටන සමග ඒකාබද්ධ කල යුතුය.