இந்த மொழிபெயர்ப்பின் மூலக் கட்டுரையை இங்கு காணலாம்.

ஞாயிறன்று இரவு நியூ யோர்க் நகரின் மாடிசன் சதுக்க தோட்டத்தில் (Madison Square Garden) குடியரசுக் கட்சி ஜனாதிபதி வேட்பாளர் டொனால்ட் ட்ரம்புக்காக நடத்தப்பட்ட பேரணி, முன்பினும் பகிரங்கமாக ஒரு பாசிசவாத குணாம்சத்தைப் பெற்று வருகின்ற ஒரு அரசியல் இயக்கத்தின் வெளிப்படையான முகத்தை வெளிப்படுத்தியது.

ஊடக வர்ணனையாளர்கள், ட்ரம்ப் கட்டியெழுப்பும் இயக்கத்தை விவரிக்க பாசிசம் என்ற சொல்லைப் பயன்படுத்தியுள்ளனர். ஆனால், அவர்கள் பாசிசத்தின் சில அம்சங்களை (வன்முறை, அச்சுறுத்தல், தீவிர தேசியவாதம் மற்றும் இனவெறி ஆகியவற்றிற்கு பாரம்பரிய தேர்தல் முறைகளைத் தகர்ப்பது உட்பட) அடையாளம் காணும் அதே வேளையில், அதன் மிக அத்தியாவசியமான உள்ளடக்கமான முதலாளித்துவ எதிர்ப்புரட்சியை ஒதுக்கிவிடுகிறார்கள்.

சில வர்ணனையாளர்கள் மாடிசன் சதுக்க தோட்டத்தில் இடம்பெற்ற பேரணிக்கு விடையிறுக்கையில், ட்ரம்ப் வாக்குகளை இழக்கக்கூடும் என்று குறிப்பிட்டனர். நியூ யோர்க்கில் நடந்த காட்சிப்படுத்தல், ட்ரம்பின் பாசிச அசுத்தத்தால் நேரடியாக இலக்கில் வைக்கப்பட்ட மக்கள் மத்தியில் மட்டுமல்ல, மக்களின் பரந்த பிரிவுகளிடையே வெறுப்புணர்வைத் தூண்டும் என்பதில் எந்த சந்தேகமும் இல்லை.

ஆனால், அதிகாரத்திற்கான ட்ரம்பின் திட்டம் முறையான தேர்தல் நடைமுறைகளை அடிப்படையாகக் கொண்டிருக்கவில்லை. மாறாக, உள்நாட்டு யுத்த முறைகளை அடிப்படையாகக் கொண்டது. ட்ரம்பும் குடியரசுக் கட்சியினரும் ஒரு பாசிசவாத நாடகப் புத்தகத்தின் அடிப்படையில் செயல்பட்டு வருகின்றனர்.

ஞாயிற்றுக்கிழமை இரவு கூறப்பட்டவற்றில் இது தெளிவாகத் தெரிந்தது. உலகின் ஊடகத் தலைநகரான நியூ யோர்க் நகரில், குடியரசுக் கட்சி பேச்சாளர்கள் இனவெறி மற்றும் புலம்பெயர்ந்தோர்-விரோத கருத்துக்களை அலட்சியமாக அள்ளி வீசினர். 1 மில்லியன் நியூ யோர்க் மக்கள் உட்பட சுமார் 6 மில்லியன் அமெரிக்கர்களின் மூதாதையர்களின் தாயகமான போர்ட்டோ ரிக்கோவை ஒரு பேச்சாளர் “குப்பைகளில் மிதக்கும் தீவு” என்று குறிப்பிட்டார். ட்ரம்பின் ஆலோசகர் ஸ்டீபன் மில்லர் “அமெரிக்கா அமெரிக்கர்களுக்கானது மற்றும் அமெரிக்கர்களுக்கு மட்டுமே” என்று கூச்சலிட்டார். இந்த சுலோகம், யூத இனப்படுகொலையில், யூதர்கள் மீதான பாரிய படுகொலையை நியாயப்படுத்த பயன்படுத்தப்பட்ட நாஜி மந்திரமான “ஜேர்மன் ஜேர்மனியர்களுக்கு மட்டுமே (Deutschland ist nur für Deutsche)” என்பதிலிருந்து நேரடியாக மொழிபெயர்க்கப்பட்ட ஒரு சுலோகமாகும்.

ட்ரம்ப், தனது பங்கிற்கு, தனது வெற்றியுடன் “நமது நாட்டின் புலம்பெயர்ந்தோர் படையெடுப்பு முடிவடைந்து, நம் நாட்டின் மறுசீரமைப்பு தொடங்குகிறது” என்றும், தேர்தல் நாள் “விடுதலை நாளாக” இருக்கும் என்றும் அறிவித்தார். “வெளிநாட்டு மாசுபாட்டை” வெல்லும் “தேசிய மறுமலர்ச்சி” நீண்டகாலமாக பாசிசவாத இயக்கங்களின் பிரதான அங்கமாக இருந்து வருகிறது. குடியரசுக் கட்சியின் அரங்கில் 11 மில்லியன் ஆண்கள், பெண்கள் மற்றும் குழந்தைகளைச் சுற்றி வளைத்து நாடுகடத்துவதற்கான உறுதிமொழியும் அடங்கியுள்ளது. இந்த சாதனையை ஒரு பொலிஸ் அரசு மூலமாக மட்டுமே அடைய முடியும். மாடிசன் சதுக்கத் தோட்டத்தில் கோடிட்டுக் காட்டப்பட்டிருப்பது தொழில்துறை ரீதியான வன்முறை அடக்குமுறையின் ஒரு மூலோபாயமாகும். ட்ரம்ப் என்ன வாக்குறுதியளிக்கிறாரோ, அது இறுதியில் பாரிய படுகொலைக்கு வழிவகுக்கும்.

வன்முறை முதலில் அரசியல் எதிர்ப்பாளர்களுக்கு எதிராக, ட்ரம்ப் எதை “உள்ளே இருக்கும் எதிரி” என்று அழைக்கிறாரோ அவர்களுக்கு எதிராக இயக்கப்படும். காங்கிரஸின் குடியரசுக் கட்சி தலைமை பார்த்துக் கொண்டிருக்கையில், ட்ரம்பும் அவரது கூட்டாளிகளும் மீண்டும் அவர்களின் எதிரிகளுக்கு எதிராக பழிவாங்கும் இரத்தம் தோய்ந்த சத்தியப்பிரமாணங்களை சூளுரைத்தனர். நான்கு ஆண்டுகளுக்கும் சற்று குறைவான காலத்திற்கு முன்னர் அவரது ஆதரவாளர்கள் துணை ஜனாதிபதி மைக் பென்ஸ் மற்றும் பிரதிநிதிகள் சபை சபாநாயகர் நான்சி பெலோசி ஆகியோரை பகிரங்கமாக கொல்வதற்கு சில கஜ தூரத்திற்குள் வந்திருந்தனர் என்ற நிலையில், இந்த அச்சுறுத்தல்கள் மரண கதியிலான உண்மையாக பார்க்கப்பட வேண்டும். ஜனநாயகக் கட்சியின் ஜனாதிபதி வேட்பாளர் கமலா ஹாரிஸை பேச்சாளர்கள் “கிறிஸ்துவிற்கு எதிரி” மற்றும் “பிசாசு” என்று குறிப்பிட்டனர். மற்றொருவர் அனைத்து ஜனநாயகக் கட்சியினரையும் “சீரழிந்தவர்கள், கீழ்த்தரமானவர்கள், யூத-வெறுப்பாளர்களின் ஒரு கூட்டம்” என்று குறிப்பிட்டார்.

ட்ரம்ப் தனது வாய்வீச்சை இரட்டிப்பாக்கி, தனது எதிரிகளை உள்நாட்டு எதிரிகள் என்று அழைத்தார், “அவர்கள் புத்திசாலிகள், அவர்கள் வக்கிரமானவர்கள், நாம் அவர்களை தோற்கடிக்க வேண்டும்,” என்பதையும் சேர்த்துக் கொண்டார். “அவர்கள் இந்த நாட்டிற்கு மிகவும் மோசமான விடயங்களைச் செய்துள்ளனர். உண்மையில் அவர்கள் உள்ளிருந்து வரும் எதிரிகள்” என்று அவர் கூறினார்.

இந்த மூலோபாயம் அடுத்த செவ்வாய்க்கிழமை இடம்பெற இருக்கும் வாக்கெடுப்பில் மாற்றப்படாது. ட்ரம்பும் குடியரசுக் கட்சியினரும் நான்கு ஆண்டுகளுக்கு முன்னர் அவர்கள் செய்ததைப் போலவே தேர்தல் முடிவுகளை சவால் செய்ய மாநில அரசாங்கங்கள் மற்றும் பொலிஸ் படைகள் மீதான அவர்களின் கட்டுப்பாட்டைப் பயன்படுத்தி, அவர்களுக்கு எதிராக செல்லும் எந்தவொரு முடிவையும் எதிர்க்க சட்டவிரோத மற்றும் அரசியலமைப்பிற்கு முரணான வழிமுறைகளைப் பயன்படுத்த தயாரிப்பு செய்து வருகின்றனர். இந்தப் பேரணிக்கு அடுத்த நாள், வாஷிங்டன் மற்றும் ஓரிகானில் வாக்குப் பெட்டிகள் தீ வைப்பதற்காக இலக்கு வைக்கப்பட்டன. இது என்ன வரவிருக்கிறது என்பதற்கான ஒரு சிறிய அறிகுறியாகும்.

ட்ரம்புக்குப் பின்னால் பெருநிறுவன மற்றும் நிதியியல் செல்வந்த தட்டுக்களின் கணிசமான பிரிவுகள் உள்ளன. அவர்கள் “உள்ளே இருக்கும் இறுதி எதிரி” தொழிலாள வர்க்கமே என்பதை புரிந்து கொண்டுள்ளனர். உலகின் மிகப்பெரிய பணக்காரரான எலான் மஸ்க், முசோலினியால் உருவாக்கப்பட்ட இயக்கத்தின் பாரம்பரிய சீருடையான கருப்பு நிற உடையில் மாடிசன் சதுக்க தோட்டத்தில் தோன்றினார். ட்ரம்ப்பின் தேர்தல் பிரச்சாரத்திற்கு மஸ்க் 118 மில்லியன் டாலர்களை நன்கொடையாக அளித்துள்ளார்.

ஏனைய பில்லியனர்களும் தலைமை நிர்வாக அதிகாரிகளும், கடந்த திங்களன்று பிரசுரிக்கப்பட்ட வாஷிங்டன் போஸ்ட் கட்டுரையின் வார்த்தைகளில் கூறுவதானால், “அவர்கள் தங்களைப் பாதுகாத்துக் கொள்கிறார்கள்.” இதில், உலகின் இரண்டாவது பெரிய பணக்காரரும் மற்றும் போஸ்டின் உரிமையாளருமான ஜெஃப் பெசோஸ் அடங்குவர். அவர், ஹாரிஸை ஆதரிப்பதிலிருந்து வாஷிங்டன் போஸ்ட் தடுத்தார். தேர்தலில் தங்கள் நடுநிலையை அறிவிக்கும் தன்னலக்குழுக்களில் பெர்க்ஷயர் ஹாத்வேயின் தலைமை நிர்வாக அதிகாரி வாரன் பஃபெட், ஓரக்கிள் நிறுவனத்தின் நிறுவனர் லாரி எலிசன், மெட்டாவின் மார்க் ஜுக்கர்பேர்க் மற்றும் கூகுள் நிறுவனத்தின் சுந்தர் பிச்சை ஆகியோர் உள்ளடங்குவர்.

அமெரிக்காவின் ஐந்து செல்வந்தர்கள் ஒட்டுமொத்தமாக 1 ட்ரில்லியன் டாலர் செல்வத்தைக் கட்டுப்பாட்டில் கொண்டுள்ளனர். அவர்கள் அனைவரும் இப்போது ட்ரம்பை ஆதரித்துள்ளனர் அல்லது இரண்டு வேட்பாளர்களுக்கும் இடையிலான அவர்களின் அலட்சியத்தை தெரிவித்துள்ளனர். 1933ல் ஹிட்லருடன் தங்கள் ஜேர்மன் சகாக்கள் உடன்படிக்கை செய்து கொண்டதைப் போல, 2024ல் ட்ரம்புடன் உடன்படிக்கை செய்ய அமெரிக்காவின் முதலாளிகள் தயாராக உள்ளனர்.

ஜனநாயகக் கட்சி ட்ரம்பின் சதிகளுக்கு ஒரு தடையாக இல்லை, மாறாக உடந்தையாக உள்ளது. ஜனநாயகக் கட்சி அதே நிதியியல் உயரடுக்கின் நலன்களையும், அத்துடன் நடுத்தர வர்க்கத்தின் மிகவும் வசதியான பிரிவுகளின் நலன்களையும் வெளிப்படுத்துகிறது என்பதோடு, பணக்கார நன்கொடையாளர்களிடம் இருந்து பணத்தை பெறும் போரில் “வென்று வருகிறது”.

அவர்களின் பகிரங்க அறிக்கைகளை வைத்து நம்ப வேண்டும் என்றால், ஓய்வுபெற்ற ஜெனரல்களான மார்க் மில்லி மற்றும் ஜோன் கெல்லி ஆகியோரின் அறிக்கைகளைத் தொடர்ந்துதான், அப்பாவி குழந்தைகளான ஜனநாயகக் கட்சியினர், கடந்த வாரம் ட்ரம்பின் பாசிசத்தைப் பற்றி திடீரென்று அறிந்து கொண்டனர். எப்படியோ, ஜனவரி 6, 2021 அன்று அரசாங்கத்தை ட்ரம்ப் கவிழ்க்க முயற்சித்த போதிலும், அவர்கள் இதற்கு முன் இந்த போக்கை கவனித்ததில்லை.

உண்மையில், ட்ரம்ப் மற்றும் அவரது MAGA (அமெரிக்காவை மீண்டும் சிறந்ததாக்கு) இயக்கத்தின் எப்பொழுதும் வெளிப்படையான பாசிச பரிணாம வளர்ச்சி மீதான ஜனநாயகக் கட்சியின் மௌனம், தொழிலாள வர்க்கத்தின் மீது, முதலாளித்துவ இரு கட்சி அமைப்பின் அரசியல் பிடியை நிலைநிறுத்துவதற்கான அதன் அர்ப்பணிப்பால் தீர்மானிக்கப்பட்டது. அதனால்தான் பைடென், ஜனவரி 6 ஆட்சிக் கவிழ்ப்புக்கு பதிலளித்து ஒரு வலுவான குடியரசுக் கட்சிக்கு தனது ஆதரவை அறிவித்தார். மேலும், ஜனவரி 6 ஆட்சிக் கவிழ்ப்பை விசாரிப்பதற்கான அதன் தடுமாற்ற முயற்சிகள் முழுவதும், ஜனநாயகக் கட்சியினர் குடியரசுக் கட்சியையும் அதன் உச்ச நீதிமன்ற கூட்டாளிகளையும் பாசிச சதியில் சிக்க வைப்பதைத் தவிர்க்க முயன்றனர்.

இன்றும் கூட, ஹாரிஸின் பிரச்சாரத்தின் முக்கிய குறிக்கோள் நியாயமான குடியரசுக் கட்சியினர் என்று அழைக்கப்படுபவர்களை சென்றடைவதே ஆகும். ட்ரம்ப் பிரதிநிதித்துவப்படுத்தும் ஆபத்தை அவர்கள் குறிப்பிடும் அளவிற்கு, அவர்கள் அவரை அதிகாரத்திற்காக ஒரு தனி நபராக மட்டுமே காட்டுகிறார்கள். ஆனால், முதலாளித்துவ தன்னலக்குழுக்களின் கணிசமான ஆதரவுடன் முதலாளித்துவ ஆளும் உயரடுக்கின் இரண்டு கட்சிகளில் ஒன்றின் தலைவராக அல்ல.

பாசிசத்தை வலுப்படுத்துகின்ற அதே நிலைமைகள் —வெளிநாட்டில் முடிவில்லா போர், கொடிய சமூக சமத்துவமின்மை மட்டங்கள் மற்றும் பொலிஸ் அரசு ஒடுக்குமுறை— ஜனநாயகக் கட்சியால் ஊட்டி வளர்க்கப்படுகின்றன.

பாசிசம் என்பது முதலாளித்துவக் கட்சிகளின் தவறான கொள்கைத் தேர்வு அல்ல, அதிலும் தனிநபர்களின் தவறான கொள்கைத் தேர்வு அல்ல. நாசிசத்தின் எழுச்சிக்கு விடையிறுக்கும் வகையில், ட்ரொட்ஸ்கி தொடர்ச்சியான அற்புதமான எழுத்துக்களில் விளக்கியது போல், பாசிசம் என்பது முதலாளித்துவத்தின் முரண்பாடுகளின் சுமையின் கீழ் முதலாளித்துவ ஜனநாயகத்தின் வீழ்ச்சியின் வெளிப்பாடாகும்.

நடுத்தர வர்க்கத்தின் மிகவும் பிற்போக்குத்தனமான பிரிவினரையும், மனச்சோர்வடைந்த தொழிலாளர்களின் பின்தங்கிய பிரிவினரையும் அடிப்படையாகக் கொண்டு ஒரு வெகுஜன இயக்கத்தை பாசிசம் அணிதிரட்டுகிறது. மேலும், பாசிசம் என்பது முதலாளித்துவத்தின் கொடூரமான வடிகட்டுதலாக —அதாவது இலாபத்திற்காக உள்நாட்டிலும் வெளிநாட்டிலும் தொழிலாள வர்க்கத்தின் மீதான அப்பட்டமான வன்முறை மேலாதிக்கமாக இருக்கிறது.

அமெரிக்க அனுபவம் இதை உறுதிப்படுத்துகிறது. கடந்த நூற்றாண்டில் கு க்ளக்ஸ் கிளான் Ku Klux Klan, சில்வர் ஷர்ட்ஸ், ஜேர்மன் அமெரிக்கன் பண்ட், அமெரிக்கா முதல் கமிட்டி மற்றும் ஜோன் பிர்ச் சொசைட்டி போன்ற பிற பாசிச அரசியல் அமைப்புகளும் இருந்தன. Huey Long, Father Coughlin, Charles Lindbergh, Joe McCarthy மற்றும் George Wallace உட்பட பல முக்கிய பாசிச அரசியல்வாதிகள் உள்ளனர். ஹென்றி ஃபோர்ட், ஹோவர்ட் ஹியூஸ் மற்றும் வில்லியம் ராண்டால்ஃப் ஹெர்ஸ்ட் உட்பட ஏராளமான பாசிச எண்ணம் கொண்ட முதலாளிகள் இருந்திருக்கிறார்கள்.

அமெரிக்காவில் பாசிசத்தின் எழுச்சி இந்த இழிவார்ந்த வலதுசாரி முன்னோடிகளுக்கும் மற்றும் அவர்கள் ஆதரித்த நச்சுத்தனமான யூத-எதிர்ப்பு, புலம்பெயர்ந்தோர்-விரோத மற்றும் இனவாத அரசியலுக்கும் ஏதோவொரு வகையில் கடமைப்பட்டிருக்கிறது. குறைந்த பட்சம் அமெரிக்க தாராளவாதம் மற்றும் தொழிற்சங்க அதிகாரத்துவத்திற்கு இது கடமைப்பட்டிருக்கிறது. 20 ஆம் நூற்றாண்டில் கம்யூனிச எதிர்ப்பை ஒரு அரசு மதமாக உயர்த்துவதற்கு அனைவரும் கைகோர்த்தனர். இதன் விளைவாக, உத்தியோகபூர்வ அமெரிக்க அரசியல் மற்றும் கலாச்சாரத்தில் இருந்து சமூக யதார்த்தத்தை கட்டமைப்பதில் வர்க்க மேலாதிக்கம் பற்றிய எந்த புரிதலும் இல்லை. முதலாளித்துவ வர்க்கம் அதிகாரத்தை ஒப்படைக்க வேண்டிய அவசியத்தை உணராவிட்டாலும், இந்த உலகில் தீவிர வலதுசாரிகள் எப்போதும் வரவேற்கப்பட்டனர்.

உள்நாட்டுப் போர் முறைகளை நாடாமல், பாரம்பரிய ஜனநாயக நடைமுறைகளின் கட்டமைப்பிற்குள் வர்க்க முரண்பாடுகளைக் கட்டுப்படுத்துவதற்கு அமெரிக்க முதலாளித்துவம் போதுமான பின்னடைவைத் தக்கவைத்துக் கொள்ளும் அளவிற்கு, ஆளும் வர்க்கம் அதன் பாசிசப் பிரிவைத் கட்டுக்குள் வைத்திருந்தது. ஆனால் அது இனி சாத்தியமில்லை.

கடந்த முப்பது ஆண்டுகளில், முதலாளித்துவ அமைப்பு தொடர்ச்சியான பெரிய பொருளாதார அதிர்ச்சிகளுக்கு உள்ளாகியுள்ளது. 2008 நிதி நெருக்கடி, அமெரிக்க முதலாளித்துவத்தை சரிவின் விளிம்பிற்கு கொண்டு வந்தது. இது ஒபாமா நிர்வாகத்தால் ஏற்பாடு செய்யப்பட்ட வங்கிகள் மற்றும் பெருநிறுவனங்களின் பாரிய பிணையெடுப்பால் மட்டுமே தவிர்க்கப்பட்டது. மேலும், வோல் ஸ்ட்ரீட்டில் ஒரு புதிய சரிவைத் தூண்டிய கோவிட் பெருந்தொற்றுநோய், வங்கிகள் மற்றும் பெருநிறுவனங்களின் கருவூலங்களுக்கு இலவசப் பணத்தை மாற்றுவதைத் தீவிரப்படுத்தியது. கடந்த பதினைந்து ஆண்டுகளில், தேசியக் கடன் பாரியளவில் ஏறத்தாழ $35 டிரில்லியனாக அதிகரித்துள்ளது.

அடிப்படைப் பொருளாதார நெருக்கடியுடன் இணைந்து, அமெரிக்காவின் உலகளாவிய நிலையும் நீடித்த சரிவைச் சந்தித்துள்ளது. 1991 இல் சோவியத் யூனியன் கலைக்கப்பட்டதைத் தொடர்ந்து, “புதிய உலக ஒழுங்கின்” வரம்பற்ற மற்றும் சவால் செய்ய முடியாத அமெரிக்க மேலாதிக்கத்தின் கற்பனைகள், எல்லாவற்றிற்கும் மேலாக, சீனாவில் இருந்து அமெரிக்க மேலாதிக்கத்திற்கு பெரும் சவால்கள் தோன்றியதன் மூலம் சிதைந்தன.

அமெரிக்க ஆளும் வர்க்கம் சீனாவுடனான இராணுவ மோதல் தவிர்க்க முடியாதது என்பதை சாதாரணமாக எடுத்துக் கொள்கிறது. “மொத்த போர்” பற்றிய குறிப்புகள் கொள்கை இதழ்களிலும், முன்னணி அரசியல் பிரமுகர்களின் அறிக்கைகளிலும் பொதுவானதாகி வருகிறது. இது சம்பந்தமாக, குடியரசுக் கட்சியினரை விட ஜனநாயகக் கட்சியினர் இன்னும் ஆக்ரோஷமாக உள்ளனர்.

சீனாவுடனான இராணுவ மோதல் தவிர்க்க முடியாதது என்பதை அமெரிக்க ஆளும் வர்க்கம் சாதாரணமாக எடுத்துக் கொள்கிறது. “மொத்தப் போரைப்” பற்றிய குறிப்புகள் கொள்கைப் பத்திரிகைகளிலும், முன்னணி அரசியல் பிரமுகர்களின் அறிக்கைகளிலும் பொதுவானதாகி வருகிறது. இது சம்பந்தமாக, குடியரசுக் கட்சியினரை விட ஜனநாயகக் கட்சியினர் இன்னும் ஆக்ரோஷமாக உள்ளனர்.

ஜனநாயகக் கட்சி, சிக்கன நடவடிக்கை மற்றும் போரைத் தவிர வேறு எதையும் வழங்கவில்லை - உண்மையில், உக்ரேனில் உள்ள அசோவ் பட்டாலியன்கள், காஸா மற்றும் மேற்குக் கரையில் “பாலஸ்தீனப் பிரச்சனைக்கான இறுதித் தீர்வைச்” செயல்படுத்தும் இஸ்ரேலியப் படைகள் உட்பட, அமெரிக்க ஏகாதிபத்தியத்தின் நீண்ட, இரத்தம் தோய்ந்த கோலங்களாகச் செயல்படும் உலகெங்கிலும் உள்ள பாசிஸ்டுகளுக்கு ஊதியம் மற்றும் ஆயுதங்கள் வழங்கப்படுகின்றன.

நிதி, பொருளாதார நெருக்கடி மற்றும் அமெரிக்க ஏகாதிபத்தியத்தின் உலகளாவிய கட்டாயங்களின் அபாயகரமான கலவையானது ஆளும் வர்க்கத்தை தொழிலாள வர்க்கத்திற்கு எதிரான போரை நோக்கி உந்தித் தள்ளுகிறது. தன்னலக்குழுவின் தன்மையைப் பெற்றுள்ள ஆளும் வர்க்கம், தொழிலாள வர்க்கத்தின் வாழ்க்கைத் தரங்கள் மீதான அதன் தாக்குதலைத் தீவிரப்படுத்த வேண்டிய கட்டாயத்தில் உள்ளது.

ட்ரம்ப் உடனான ஜனநாயகக் கட்சியினரின் பிரதான கவலை என்னவென்றால், அவரது வெற்றி ரஷ்யாவுடனான போருக்கான மிக முன்னேறிய திட்டங்களில் தலையிடக்கூடும் என்பதாகும். இருகட்சி முறையின் முறிவு குறித்தும், இருகட்சி முதலாளித்துவ அரசின் கட்டமைப்பு குறைமதிப்பிற்கு உட்படுத்தப்படுவது குறித்தும் அவர்கள் அஞ்சுகின்றனர். ட்ரம்ப் பிரதிநிதித்துவம் செய்யும் அபாயத்தை அம்பலப்படுத்துவது அடிமட்டத்திலிருந்து ஒரு பாரிய இயக்கத்தை உருவாக்கும் என்று அவர்கள் கவலை கொண்டுள்ளனர். உண்மையில், நியூ யோர்க்கில் ட்ரம்பின் பேரணிக்கு விடையிறுப்பாக, போலியான நியூ யோர்க் சோசலிஸ்ட் பிரதிநிதி அலெக்ஸாண்ட்ரியா ஒக்காசியோ-கோர்ட்டெஸ் உட்பட ஜனநாயகக் கட்சி அதற்கு எதிராக எந்த எதிர்ப்பையும் திரட்டவில்லை.

இந்த சூழ்நிலையில் “குறைந்த தீமை” பற்றி பேசுவது அரசியல்ரீதியாக அர்த்தமற்றது. இது 2000 ஆம் ஆண்டில் இருந்து உலக சோசலிச வலைத் தளம் செய்து வந்துள்ள பகுப்பாய்வை சரியென நிரூபிக்கிறது. அப்போது வன்முறை ஆர்ப்பாட்டங்கள் புளோரிடாவில் வாக்கு எண்ணிக்கையை நிறுத்திவிட்டன. சர்ச்சைக்குரிய புஷ்-கோர் தேர்தல் முடிவை வலதுசாரி தலைமை நீதிமன்ற பெரும்பான்மை குடியரசுக் கட்சிக்கு அளித்தது. அந்த முடிவு, ஆளும் வர்க்கத்தில் ஜனநாயகத்திற்கான எந்தவொரு உண்மையான தளமும் இல்லை என்பதை வெளிப்படுத்துகிறது என்று நாங்கள் எச்சரித்தோம். இப்போது, ஏறத்தாழ கால் நூற்றாண்டுக்குப் பின்னர், ஜனநாயக விதிகளின் வடிவங்கள் கூட ஒதுக்கித் தள்ளப்படுகின்றன.

இந்த அரசியல் எழுச்சிகளுக்கு மத்தியில், ஒரு இன்றியமையாத உண்மையை வலியுறுத்தியாக வேண்டும். சர்வாதிகாரத்தை நோக்கிய ஆளும் உயரடுக்கின் இயக்கம் பெருகிய முறையில் தொழிலாள வர்க்க இயக்கத்திற்கு நேரெதிரான எதிர்ப்பைக் கொண்டுள்ளது. கடந்த ஆண்டு, காஸாவில் இனப்படுகொலைக்கு எதிராக, மிருகத்தனமான ஒடுக்குமுறை மற்றும் அவதூறுகளுக்கு முகம்கொடுத்த நிலையில், இளைஞர்கள் மற்றும் தொழிலாளர்களின் பாரிய போராட்டங்களைக் கண்டது. சிக்கன நடவடிக்கைகள், சுரண்டல், வறுமை மற்றும் சமூக சமத்துவமின்மைக்கு தொழிலாள வர்க்கத்தில் எதிர்ப்பு அதிகரித்து வருகிறது, இது நாடெங்கிலும் நடக்கும் தொடர்ச்சியான வேலைநிறுத்தங்களில் பகுதியளவில் மட்டுமே வெளிப்படுகிறது — போயிங் வேலைநிறுத்தத்தில் நடந்து வரும் வேலைநிறுத்தம் உட்பட, அங்கு தொழிலாளர்கள் தொழிற்சங்கத்தால் திருப்பிக் கொண்டு வரப்பட்ட இரண்டு ஒப்பந்தங்களை நிராகரித்துள்ளனர்.

முதலாளித்துவ தன்னலக்குழுக்களின் சதித்திட்டங்களுக்கு எதிரான ஒரு இயக்கத்தை அபிவிருத்தி செய்வதற்கு அங்கே ஒரு சக்திவாய்ந்த புறநிலை அடிப்படை உள்ளது.

இந்த இயக்கத்திற்கு அதன் நலன்களை வெளிப்படுத்தக்கூடிய, முதலாளித்துவ எதிர்ப்பு மற்றும் சோசலிச வேலைத்திட்டத்தை வழங்குவதே பணியாகும். தேசிய பேரினவாதம், இனவாதம் மற்றும் குடியேற்ற எதிர்ப்பு வெறி ஆகியவற்றின் விஷத்தை, தொழிலாள வர்க்கத்தின் சர்வதேச ஐக்கியத்துக்கான போராட்டத்துடன் எதிர்கொள்ள வேண்டும். அமெரிக்க தொழிலாள வர்க்கம், அதன் ஜனநாயக உரிமைகள் மற்றும் சமூக நலன்களைப் பாதுகாப்பது உலகெங்கிலும் உள்ள அதன் வர்க்க சகோதர சகோதரிகளுடன் கூட்டணியில் மட்டுமே சாத்தியம் என்பதை அங்கீகரிக்க வேண்டும்.

இந்த தேர்தல் நிகழ்ச்சிப்போக்கு முழுவதிலும், முழு அமெரிக்க அரசியல் அமைப்பு முறையின் சீரழிவை அம்பலப்படுத்தி வந்த உலக சோசலிச வலைத் தளமும் சோசலிச சமத்துவக் கட்சியும் தொழிலாள வர்க்கம், இளைஞர்கள் மற்றும் அனைத்து முற்போக்கு பிரிவு மக்களுக்கும் நெருக்கடியின் அளவு குறித்து எச்சரிக்கை செய்ய முயன்றன. அடுத்த செவ்வாய்கிழமை இடம்பெறவுள்ள தேர்தலின் உடனடி முடிவு என்னவாக இருந்தாலும், அரசியல் அமைப்பின் நெருக்கடி தீவிரமடையும். மேடிசன் சதுக்கத்தில் இடம்பெற்ற பேரணிக்குப் பிறகு, ஒரு அமெரிக்க பாசிச இயக்கத்தின் வளர்ச்சி மற்றும் ஒரு முதலாளித்துவ இராணுவ-பொலிஸ் சர்வாதிகாரத்தை உருவாக்குவதால் ஏற்படும் ஆபத்தை மறுக்க முடியாது. தொழிலாள வர்க்கம் எதிர்கொள்ளும் மாற்றீடானது சோசலிசத்தை நிறுவுவதற்கு அதிகாரத்தை கைப்பற்ற வேண்டும் அல்லது பாசிச காட்டுமிராண்டித்தனம் மற்றும் உலகப் போரை எதிர் கொள்ள வேண்டும்.

இந்த ஆபத்தை அங்கீகரிக்கும் அனைவரும் தேவையான அரசியல் முடிவை எடுக்க வேண்டும். ஆகவே, சோசலிச சமத்துவக் கட்சியில் சேர்ந்து தொழிலாள வர்க்கத்தின் புரட்சிகர இயக்கத்தை கட்டியெழுப்ப முன்வர வேண்டும்.