மொழிபெயர்ப்பின் மூலக் கட்டுரையை இங்கே காணலாம்.

கடந்த வியாழன் இரவு அமெரிக்க ஜனாதிபதி ஜோசப் பைடெனுக்கும், முன்னாள் ஜனாதிபதி டொனால்ட் டிரம்புக்கும் இடையே நடந்த ஜனாதிபதிக்கான விவாதமானது, அமெரிக்க “அரசியல் கலாச்சாரத்தின்” தரம் தாழ்ந்து, சீரழிவு, பிற்போக்கு மற்றும் முட்டாள்தனத்தின் காட்சியாக இருந்தது.

இது வெறுமனே பைடெனின் பைத்தியக்காரத்தனத்தின் விஷயம் அல்ல, அதை இனி மறுக்க முடியாது. ட்ரம்பின் குண்டர் ஆளுமையும் சந்தேகத்திற்கு இடமில்லாதது. முழு ஆளும் வர்க்கத்தின் மிகவும் முன்னேறிய வீழ்ச்சி ஜூன் 27, 2024 அன்று மாலை முழு உலகத்தின் முன் அம்பலமானது.

அமெரிக்க முதலாளித்துவம், அதன் இரண்டு முன்னணி பேச்சாளர்களை, குறிப்பாக, காஸாவில் இஸ்ரேலின் இனப்படுகொலை வெறியாட்டம் மற்றும் ரஷ்யாவிற்கு எதிரான வரம்பற்ற போருக்கு ஆதரவாக இருக்கும் முதுமையான போர்வெறியர் பைடென் மற்றும் 2021 ஜனவரி 6 அன்று சதிப்புரட்சியை பாதுகாக்க விவாதத்தைப் பயன்படுத்திய பாசிச திமிர்பிடித்தவரான டிரம்ப் ஆகியோர்களை மேடையில் நிறுத்தியது.

இதுவே 2024 ஜனாதிபதித் தேர்தலில் அமெரிக்க அரசியல் வழங்கும் “தேர்வு” இதுவாகும்.

நியூயோர்க் டைம்ஸ் தலைமையிலான பல முக்கிய ஊடகங்கள் பைடெனின் ராஜினாமாவிற்கு அழைப்பு விடுத்தது. பைடெனின் பேரழிவுகரமான விவாத நிகழ்ச்சியின் மீது ஊடகங்கள் ஏறக்குறைய நடன ஒற்றுமையில் கவனம் செலுத்தின. “புரியாத”, “புரிந்துகொள்ள முடியாத”, “தடுமாறும்” மற்றும் “பொருத்தமற்ற” வார்த்தைகளால் செய்திகள் சேர்க்கப்பட்டிருந்தன. முழு வாக்கியங்களில் பேசவும், முழு எண்ணங்களில் சிந்திக்கவும், எந்தவொரு விஷயத்தின் நூலைப் பிடித்து வைத்திருக்கவும் அல்லது ஒரு புதிய யோசனையை வழங்கவும் பைடென் போராடினார். இது ஒட்டுமொத்த ஜனநாயகக் கட்சிக்கும் பொருத்தமான அடைமொழியாகும்.

உண்மையில், கால் அழுகி நாற்றம் கண்டிருக்கும் அமெரிக்க அரசியல் அமைப்பின் சரியான உருவகம் பைடென் ஆவர்.

அது உண்மைதான், ஜனாதிபதியால் தெளிவாகப் பேச முடியாது. மேலும் அவர் பேசாதவராக இருக்கலாம். ஆனால் டைம்ஸ் அவருக்கு என்ன சொல்ல விரும்புகிறது? அவர் என்ன கொள்கைகளை உருவாக்க வேண்டும்? அவர் என்ன சாதனைகளை முன்னிலைப்படுத்த முடியும்? சுதந்திர உலகின் ஜனாதிபதியாகவும் சுயமாக அறிவிக்கப்பட்ட தலைவராகவும் நாட்டை எங்கு வழிநடத்த அவர் முன்மொழிகிறார்? ஒவ்வொரு கேள்விக்குமான ஒரே பதில் - போர்.

பைடெனின் அரை-தெளிவான சில தருணங்கள், அவர் எப்போதும் இருந்து வருகின்ற இராணுவ உளவுத்துறை எந்திரத்தின் உயிரினம் என்பதை வெளிப்படுத்திக் காட்டியது. காசாவில் பாலஸ்தீனியர்களை இஸ்ரேல் பெருமளவில் படுகொலை செய்ததற்கு தனது அலாதியான ஆதரவை மீட்டெடுக்க சிஎன்என் விவாதம் நடத்துபவர்களால் தூண்டப்பட்டபோது பைடெனால் இறுதியாக புரிந்துகொள்ளக்கூடிய ஒன்றைச் சொல்ல முடிந்தது.

“நாங்கள் இஸ்ரேலுக்கு தேவையான அனைத்து ஆயுதங்களையும் அவர்களுக்குத் தேவைப்படும்போது வழங்குகிறோம்” என்று பைடென் அறிவித்தார்.

இந்தக் கொள்கையின் கீழ், ஒன்பது மாதங்களில் இரக்கமற்ற குண்டுவீச்சில் சுமார் 40,000 பொதுமக்கள் படுகொலை செய்யப்பட்டனர். ஆனால், இந்த விஷயத்தில் பைடெனின் “தெளிவு” இனப்படுகொலையை வெறுக்கும் பாரிய தொழிலாளர்கள் மற்றும் இளைஞர்களிடையே அவருக்கு சிறிய ஆதரவையும் பெற்றுக் கொடுக்காது.

அணு ஆயுத பேரழிவு பூமியை அச்சுறுத்தி வருகின்ற, உக்ரேனில் ரஷ்யாவிற்கு எதிரான நேட்டோவின் போரை தீவிரப்படுத்த வேண்டும் என்ற கோரிக்கையில், பைடென் அதேபோன்று தெளிவாக இருந்தார். பைடென் ரஷ்ய ஜனாதிபதியைப் பற்றிய, உத்தியோகபூர்வ பிரச்சாரக் கதையை மீண்டும் கூறினார்:

புட்டின் ஒரு விஷயத்தை தெளிவுபடுத்தியுள்ளார்: அவர் சோவியத் பேரரசின் ஒரு பகுதியாக இருந்ததை மீண்டும் நிறுவ விரும்புகிறார், ஒரு துண்டு மட்டுமல்ல, உக்ரேன் முழுவதையும் அவர் விரும்புகிறார். அதைத்தான் அவர் விரும்புகிறார். பின்னர் அவர் அங்கேயே நிறுத்திக் கொள்வார் என்று நினைக்கிறீர்களா? அவர் உக்ரேனை எடுத்துக் கொண்டால் - அவர் நிறுத்துவார் என்று நினைக்கிறீர்களா? போலந்துக்கு என்ன நடக்கிறது என்று நினைக்கிறீர்கள்? பெலாரஸ் பற்றி நீங்கள் என்ன நினைக்கிறீர்கள்? இந்த நேட்டோ நாடுகளுக்கு என்ன நடக்கும் என்று நீங்கள் நினைக்கிறீர்கள்?

பைடெனின் நிலைப்பாடு என்னவென்றால், ரஷ்யாவை இராணுவ ரீதியாக தோற்கடிக்க வேண்டும், “அது எவ்வளவு காலம் எடுக்கும், எவ்வளவு செலவாகும்” என்பதை அவர் பலமுறை கூறியிருக்கிறார். இந்த போரைத் தூண்டும் அச்சுறுத்தல் பூமியில் வாழும் ஒவ்வொரு குடிமகனுக்கும் அவசரமான விஷயமாக உள்ளது. வாஷிங்டன், அதன் நேட்டோ நட்பு நாடுகளுடன் சேர்ந்து, ஏற்கனவே அணு ஆயுதம் ஏந்திய ரஷ்யாவிற்கு எதிராக அறிவிக்கப்படாத போரில் ஈடுபட்டுள்ளது என்பது கண்கள் உள்ள எவருக்கும் தெளிவாகத் தெரியும்.

யூகிக்கக்கூடிய வகையில், CNN தொகுப்பாளர்களான ஜேக் டேப்பர் மற்றும் டானா பாஷ் இந்த முக்கியமான கேள்வியை பின்தொடரவில்லை. அதேபோல், மதிப்பீட்டாளர்கள் COVID-19 தொற்றுநோயைப் பற்றி எந்தக் கேள்வியும் கேட்கவில்லை. அதன் கட்டுப்பாடற்ற பரவல், டிரம்ப் மற்றும் பைடென் இருவராலும் ஊக்குவிக்கப்பட்டு மில்லியன் கணக்கானவர்கள் கொல்லப்படுவதற்கு அனுமதிக்கப்பட்டது. தொற்றுநோயியல் நிபுணர்கள் மற்றும் பொது சுகாதார வல்லுநர்கள் எச்சரிக்கைகளை தீவிரமாக ஒலித்தாலும், புதிதாக வளர்ந்து வரும் H5N1 பறவைக் காய்ச்சல் வைரஸ் தொடர்பாக மிகவும் குறைவான எச்சரிக்கைகளே உள்ளன. “நான்காவது தூணாக” இருக்கும் ஊடகமும் வெகு தொலைவில் உள்ளது.

டிரம்பின் பாசிச அச்சுறுத்தல்களில் ஒன்றிற்கு பைடெனால் திறம்பட பதிலளிக்க முடியவில்லை என்பது அவரது வயது மற்றும் முதுமையின் காரணமாக மட்டுமல்ல, அவரது பைத்தியக்காரத்தனமான பொய்களும் ஒருபுறம் இருக்கின்றன. ஏனெனில், அடிப்படையில், அவர் குடியரசுக் கட்சி வேட்பாளராகக் கருதப்படுபவர்களுக்கு மாற்றாக எதையும் வழங்கவில்லை.

டிரம்ப், விவாதத்தின் பெரும்பகுதியை புலம்பெயர்ந்தோருக்கு எதிராக செலவிட்டார். அவர், புலம்பெயர்ந்த தொழிலாளர்களே தொடர்ச்சியான குற்றங்களுக்கு காரணம் என்றும், (பூர்வீகமாக பிறந்த அமெரிக்கர்களை விட புலம்பெயர்ந்தோர் வன்முறைக் குற்றங்களைச் செய்வதற்கான வாய்ப்புகள் குறைவு என்று தரவுகள் காட்டுகின்றன) புலம்பெயர்ந்தோர் “எங்கள் பள்ளிகள், மருத்துவமனைகள் ஆகியவற்றைக் கைப்பற்றுகிறார்கள்” என்றும், அவர்கள் “சமூகப் பாதுகாப்பைக் கைப்பற்றப் போகிறார்கள்” என்றும் மீண்டும் மீண்டும் கூறினார். காங்கிரஸின் பட்ஜெட் அலுவலகம் சமீபத்தில் மீண்டும் ஒருமுறை உச்சரித்தபடி, அமெரிக்க வரித் தளத்திற்கு குடியேறியவர்களே நிகர பங்களிப்பாளர்களாக உள்ளனர். பெரும் பணக்காரர்களில் ட்ரம்பின் சகோதரர்கள்தான் நாட்டை வரண்டுபோகச் செய்கிறார்கள்.

டாப்பரிடமிருந்து வந்த ஒரே சவாலான கேள்விக்கு ட்ரம்ப் தந்திரமாக நகர்ந்தார். டாப்பர் பின்வருமாறு கேட்டார்:

ஜனாதிபதி டிரம்ப், இன்னும் குடியேற்றம் விஷயத்தில், நீங்கள் “அமெரிக்க வரலாற்றில் மிகப்பெரிய உள்நாட்டுக்குள் நாடு கடத்தல் நடவடிக்கையை” மேற்கொள்ளப் போவதாக கூறினீர்கள். இதற்கு, அமெரிக்காவில் உள்ள அனைத்து ஆவணமற்ற குடியேற்றவாசிகளையும் நீங்கள் நாடு கடத்துவீர்கள் என்று அர்த்தமா? வேலைகள் உள்ளவர்கள், அவர்களின் மனைவிகள் குடிமக்கள் உட்பட? மற்றும் பல தசாப்தங்களாக இங்கு வசிப்பவர்கள் உட்பட? அப்படியானால், நீங்கள் அதை எப்படி செய்வீர்கள்?

ட்ரம்ப் மில்லியன் கணக்கான புலம்பெயர்ந்தோரை-தொழிலாளர் வர்க்க ஆண்கள், பெண்கள் மற்றும் குழந்தைகளை எவ்வாறு அழிப்பார் என்பதை விளக்கவில்லை. ஆனால், மிக விரைவாக முழு தொழிலாள வர்க்கத்துக்கும் எதிராக இயக்கப்படும் வன்முறையான பொலிஸ் அரசு முறைகளால் மட்டுமே இவ்வளவு பெரிய நாடுகடத்தலை அவரால் மேற்கொள்ள முடியும் என்பது வெளிப்படையானது. அத்தகைய கொள்கையானது, அமெரிக்க ஜனநாயகத்தில் எஞ்சியிருப்பவற்றை அழிப்பதோடு, டாம் பெயின் கூறியது போல், குடியேறியவர்களின் தேசம் மற்றும் “மனிதகுலத்திற்கான புகலிடமான” அமெரிக்காவின் தேசிய நம்பிக்கையை முற்றிலும் மாற்றியமைப்பதை உள்ளடக்கியது.

குடியேற்றம் தொடர்பாக ட்ரம்புக்கு பைடென் சவால் விடவில்லை அல்லது அவரால் முடியவில்லை. ஒருவேளை, டிரம்ப் இப்போது அணிதிரட்டப்போவதாக அச்சுறுத்தும் அதே போலீஸ் அரச உள்கட்டமைப்பை உருவாக்குவதற்கு, அவரும் அவருடைய ஜனநாயகக் கட்சியின் முன்னோடியான பராக் ஒபாமாவும் பொறுப்பேற்றிருக்கலாம். உள்நாட்டுப் பாதுகாப்புச் செயலர் அலெஜான்ட்ரோ மயோர்காஸின் வார்த்தைகளில், “முந்தைய நிர்வாகத்தின் நான்கு ஆண்டுகளில் இருந்ததை விட அதிகமான மக்களை” நாடு கடத்தியதாக பைடென் நிர்வாகம் வெளிப்படையாகப் பெருமை பேசுகிறது. ஒபாமா, தனது பங்கிற்கு, முந்தைய அனைத்து நிர்வாகங்களையும் விட அதிகமான புலம்பெயர்ந்தோரை நாடு கடத்தினார். கடந்த வாரம் தான், அமெரிக்க குடிமக்கள் தங்கள் புலம்பெயர்ந்த கணவன் மற்றும் மனைவிகளுடன் வாழ்வதைத் தடுக்க, நிர்வாகக் கிளையின் மீறப்படாத உரிமையை வலியுறுத்தும் உச்ச நீதிமன்ற வழக்கில் பைடென் வெற்றி பெற்றார்.

ஆனால், பைடெனின் வலதுசாரிக் கொள்கைகள் ஜனநாயகக் கட்சி ஸ்தாபனத்தையும், ஆளும் வர்க்கத்தின் பிரிவுகளையும் வியப்பில் ஆழ்த்தவில்லை - வோல் ஸ்ட்ரீட், உளவுத்துறை எந்திரம், இராணுவ உயர் அதிகாரிகள் மற்றும் சிலிக்கான் பள்ளத்தாக்கு போன்றவை. எல்லாவற்றிற்கும் மேலாக இந்த அடுக்குகள் அஞ்சுவது என்னவென்றால், பைடெனின் சரிவு மற்றும் டிரம்ப்பின் வெற்றி ரஷ்யாவிற்கு எதிரான போர்க் கொள்கையை மாற்றிவிடும் என்பதாகும். என்றாலும் கூட, ட்ரம்ப் அதன் அணு ஆயுதங்கள் உட்பட அமெரிக்க இராணுவத்தை கட்டவிழ்த்து விடுவதற்கான தனது விருப்பத்தை மறைக்கவில்லை.

பைடெனின் வீழ்ச்சி அமெரிக்க ஆளும் வர்க்கத்திற்கு வளர்ந்து வரும் நெருக்கடியின் ஒரு தருணத்தில் வருகிறது. நூறாயிரக்கணக்கான உக்ரேனிய மற்றும் ரஷ்ய உயிர்களை பலி கொடுத்து வாஷிங்டனின் உக்ரேனிய கைப்பாவை ஆட்சி போரை இழந்து வருகிறது. பிரிட்டன் மற்றும் பிரான்சில் விரைவில் தேர்தல்கள் நடைபெற இருக்கின்றன. வாஷிங்டனின் முக்கிய கூட்டாளிகளாக அதன் தலைவர்கள் குறைந்த பட்சம், பைடெனை விட மதிப்பிழந்தவர்களாக இருக்கின்றனர். ஜூலை 9-11 முதல், பைடென் வாஷிங்டனில் ஒரு நேட்டோ போர் கவுன்சிலை மேற்பார்வையிடுவார் என்று எதிர்பார்க்கப்படுகிறது. அது உக்ரேனில் தீவிரமான தலையீட்டிற்கு அழுத்தம் கொடுக்கும்.

இதற்கிடையில், உக்ரேன் மற்றும் இஸ்ரேல் போர்களுக்கு முடிவில்லாத நிதியுதவி மற்றும் பணவீக்கத்தை எதிர்த்து அமெரிக்க தொழிலாள வர்க்கத்தை தண்டிக்க அதிக வட்டி விகிதங்கள் ஆகியவற்றின் காரணமாக, அமெரிக்க இறையாண்மைக் கடன் கிட்டத்தட்ட $35 டிரில்லியனாக டொலர்களாக உள்ளது மற்றும் வேகமாக உயர்ந்து வருகிறது. இது கடனை அதிக விலைக்கு மாற்றும் விளைவைக் கொண்டுள்ளது. அமெரிக்க முதலாளித்துவத்தின் அரசியல் திவால்நிலை, உண்மையில் அதன் நிதி திவால்நிலையை பிரதிபலிக்கிறது.

இந்த நிலைமைகளின் கீழ்தான் டைம்ஸ் பைடெனை டிக்கெட்டில் இருந்து நீக்கும் நோக்கத்தில் பிரச்சாரத்தை முன்னெடுத்து வருகிறது. அத்தகைய அணுகுமுறை அதன் சொந்த ஆபத்துக்களைக் கொண்டுள்ளது. ஜனநாயகக் கட்சியில் உண்மையான தேசிய அந்தஸ்து கொண்ட, இழிவற்ற அரசியல்வாதிகள் யாரும் இல்லை (டிரம்ப் பதவி நீக்கம் செய்யப்பட்டால் குடியரசுக் கட்சியினர் இதேபோன்ற சிக்கலை எதிர்கொள்வார்கள்). ஜனநாயகக் கட்சியின் உயர்-நடுத்தர வர்க்கத் தளமானது பல்வேறு அடையாள அடிப்படையிலான தொகுதிகளால் ஆனது, அவர்கள் பைடெனின் இடத்தில் தங்கள் “சொந்தமானவை” முன்வைக்கப்பட வேண்டும் என்று கோருவார்கள், இது ஜனநாயகக் கட்சியினரிடையே கன்னைப் போரை அச்சுறுத்துகிறது. இதற்கும் அடிப்படை அரசியல் வேறுபாடுகளுக்கும் எந்த தொடர்பும் இருக்காது. எந்தவொரு மாற்றீடும் ஒரு புதிய முகம் மற்றும் புதிய பெயருக்குப் பின்னால் பைடெனின் போர்க் கொள்கைகளை மீண்டும் கடத்துவதைக் குறிக்கும்.

இறுதிப் பகுப்பாய்வில், பைடெனின் வீழ்ச்சி அரசியல் ஒழுங்கையும் அவர் பிரதிநிதித்துவப்படுத்தும் முதலாளித்துவ ஆளும் வர்க்கத்தையும் பிரதிபலிக்கிறது. இந்த நடுக்கம்கண்ட ஆட்சி, அதன் அதிகாரத்திற்கு எந்த சவாலையும் பொறுத்துக்கொள்ள மாட்டாது.

இந்த நிலைமைகளின் கீழ், பரந்த அரசியல் சாத்தியங்கள் குறிப்பாக தொழிலாள வர்க்கத்திற்கு திறக்கப்படுகின்றன. இதனால்தான் காசா இனப்படுகொலைக்கு எதிரான பல்கலைக் கழக வளாகப் போராட்டங்களை பைடென் அடக்கியதோடு, ஜனநாயகக் கட்சி மூன்றாவது இடத்திலுள்ள கட்சிகளை வாக்கெடுப்பில் இருந்து விலக்கத் தீவிரம் காட்டி வந்தது. இந்தக் கட்சிகளில் சோசலிச சமத்துவக் கட்சியும் (SEP) உள்ளது.

ஒரு அறிக்கையில், சோசலிச சமத்துவக் கட்சியின் ஜனாதிபதி வேட்பாளர் ஜோ கிஷோர் பின்வருமாறு கருத்துத் தெரிவித்தார்:

இந்த விவாதம், நிதி மூலதனத்தின் மையமும், ஏகாதிபத்திய போர் திட்டமிடலின் தலைமையும் ஆக இருக்கும் அமெரிக்காவில் ஏற்பட்டுள்ள நாற்றம்கண்ட அரசியலை வெளிப்படுத்தியது. இந்த நெருக்கடியானது ஆழ்ந்த புறநிலைக் காரணிகளின் வெளிப்பாடாகவே புரிந்து கொள்ளப்பட வேண்டும்.

நிகழ்வுகளின் சரியான போக்கைக் கணிக்க முடியாவிட்டாலும், ஒரு விஷயம் முற்றிலும் நிச்சயமானது. உலக அளவில் தொழிலாள வர்க்கம் ஒரு சோசலிச வேலைத்திட்டத்தின் அடிப்படையில் ஒரு சர்வதேச சக்தியாக ஒன்றுசேரும் வரை இந்த நெருக்கடிக்கு முற்போக்கான தீர்வு எதுவும் இருக்காது.