[මෙහි පලවන්නේ The international working class must fight for the eradication of COVID-19 යන මැයෙන් 2021 අගෝස්තු 25දා පලවූ ඉදිරි දර්ශන ලිපියේ පරිවර්තනයයි.]
“වසංගතය නවත්වා ජීවිත රැකගැනීමට ගෝලීය මූලෝපායක්” යන මැයෙන්, ලෝක සමාජවාදී වෙබ් අඩවියේ සත්කාරකත්වයෙන් ඉරිදා පැවැත්වුනු අන්තර්ජාල සාකච්ඡාව, කොවිඩ්-19 වෛරසය ඉවත් කොට මුලිනුපුටා දැමීමේ පිලිවෙතක් සඳහා, බරපතල හා විද්‍යාත්මක ව පාදිත කරුනු සම්පාදනය කලේ ය. මෙම අවස්ථාවේ දී කතා කල විද්‍යාඥයෝ, ආරම්භයේ සිට කල යුතු ව තිබුනු නමුත් නො කල හා දැන් කල යුතු නමුත් නො කරන්නේ කවරක්දැයි පැහැදිලි ව හා ඒත්තු යන සුලු ලෙස විස්තර කල හ.
නවසීලන්තයේ වෙලින්ටන්හි ඔටේගෝ විශ්ව විද්‍යාලයේ මහාචාර්ය මයිකල් බේකර්, කැනඩාවේ කැල්ගරි විශ්ව විද්‍යාලයේ ආචාර්ය මැල්ගෝසාටා ගැස්පෙරොවික්ස් හා එක්සත් ජනපදයේ නිව් ඉංග්ලන්ඩ් කම්ප්ලෙක්ස් සිස්ටම්ස් ආයතනයේ ආචාර්ය යනීර් බාර්-යැම් යන සාකච්ඡාවට සහභාගි වූ විද්‍යාඥයන් තිදෙනා ම, වසංගත හා අනෙකුත් බෝවන රෝග විශ්ලේෂනය කිරීමේ හා ඒවාට ප්‍රතිචාර දැක්වීමේ දශක ගනනාවක අත්දැකීම් සතු ප්‍රමුඛ විශේෂඥයෝ වෙති. සියල්ල එක් ව ගත් කල, කරුනුවලින් පිරුනු ඔවුන්ගේ ප්‍රතිපදානයන්, පසුගිය මාස දහනවය පුරා බොහෝ රටවල් විසින් අනුගමනය කරනු ලබන පිලිවෙත් පිලිබඳ බරපතල චෝදනා පත්‍රයකි.
වෙනස් පිලිවෙතක් අනුගමනය කල හැකි ව තිබුනු බව මහාචාර්ය බේකර්ගේ ඉදිරිපත් කිරීමෙන් පැහැදිලි කලේය. 2020 ජනවාරි මාසයේ, එනම් වෛරසයෙහි ගෝලීය පැතිර යාමේ ආරම්භයේ දී ම, වසංගතය නවත්වනු නො ලැබුවහොත්, “භූගෝලය පුරා පුද්ගලයන් මිලියන 30කට වැඩි පිරිසක්” මිය යනු ඇතැයි ඔහු කල “දල ඇස්තමේන්තුව” ඔහු යලි විස්තර කලේ ය. වෛරසය පාලනය කිරීමේ දී චීනයේ සාර්ථකත්වය ගෙනහැර දක්වමින් සහ වෛරසය බැහැර කිරීමේ හා මුලිනුපුටා දැමීමේ පිලිවෙතක් ක්‍රියාවට දැමිය හැකි ව තිබුනු බව පෙන්නුම් කරමින්, ගෝලීය මරන සංඛ්‍යාව 3,000ට අඩු වූ, 2020 පෙබරවාරියේ ලෝක සෞඛ්‍ය සංවිධානයේ වාර්තාවකට ඔහු අවධානය යොමු කලේ ය.
එහෙත්, විශේෂයෙන් ම එක්සත් ජනපදය හා යුරෝපයේ ප්‍රධාන රටවල්, විද්‍යාඥයන් විසින් නිර්දේශ කරන ලද පියවරයන් ප්‍රතික්ෂේප කල හ. “ලොව පුරා රටවල් එම උපදේශය (මුලිනුපුටා දැමීමේ ප්‍රවිෂ්ටයක්) අනුගමනය කරනු ඇතැයි මම උපකල්පනය කලා ... ඒත් බොහෝ රටවල් ඒ පිලිබඳ ව කිසිවක් කලේ නහැ” යි ආචාර්ය බේකර් කීවේ ය.
වසංගතය ආරම්භයේ දී ක්‍රියාවට දමන හදිසි හා සම්බන්ධීකෘත ක්‍රියාවකට, සාපේක්ෂ ව කෙටි කාලයක් ඇතුලත වෛරසය සාර්ථක ව මුලිනුපුටා දැමිය හැකි ව තිබුනු බව, ආචාර්ය ගැස්පෙරොවික්ස් ඇයගේ ප්‍රතිපදානයේ දී පෙන්වා දුන්නා ය. අගුලු දැමීම්, සංචරන සීමා, විශ්වීය පරීක්ෂන හා බෝවූවන් හඳුනා ගැනීම සහ ආසාදිතයන් හුදකලා කිරීම යන ආක්‍රමනශීලී මහජන සෞඛ්‍ය පියවරවලට, එන්නත්කරනයෙන් පවා තොර ව, දවස් 37ක් ඇතුලත නව ආසාදන ශූන්‍යය කරා ගෙන ආ හැකි ව තිබුනු බව ඇයගේ දත්ත පෙන්වා දුනි. 2020 මුල දී එවන් පියවරයන් ක්‍රියාත්මක කර තිබුනේ නම්, ගෝලීය මරන සංඛ්‍යාව ගනන් කරනු ඇත්තේ මිලියන ගනන්වලින් නො ව දහස් ගනන්වලිනි.
එහෙත්, විද්‍යාත්මක ව අවශ්‍ය පියරවයන් ක්‍රියාවට නො දැමුනු අතර, එහි භයංකර විපාක ලොව පුරා දක්නට ලැබේ. නිල සංඛ්‍යාලේඛනවලට අනුව, ආසන්න වසයෙන් මිලියන 4.5ක් දැන් මියගොස් ඇති අතර, දෛනික ව එම සංඛ්‍යාවට තවත් 10,000ක් එකතු වේ. “දීර්ඝ කොවිඩ්” වසංගතයේ තවමත් අවබෝධ කර නො ගත් විපාකවලින් ගනන් නැති මිලියන ගනන් දෙනා පීඩා විඳිනු ඇත. වඩා පහසුවෙන් බෝවනසුලු ඩෙල්ටා ප්‍රභේදයේ පැතිරීම සමගින්, රෝහල්ගත කිරීම් හා මරන යලිත් ඉහල යමින් තිබේ. දෛනික ව මරන 1,000ක් හා ආසන්න වසයෙන් නව ආසාදන 150,000ක් සමගින්, එක්සත් ජනපදය යලි වතාවක් ගෝලීය වසංගතයේ කේන්ද්‍රය බවට පත් ව ඇත.
වඩාත් භයංකර ලෙස, වෛරසයේ නව පීඩාව ලාබාල ජනයා මත උග්‍ර ලෙස බලපාමින් තිබෙන්නේ, රෝගීන්ට හා මිය යමින් සිටින්නන්ට ප්‍රතිකාර කිරීමට අවශ්‍ය දැඩි සත්කාර ඇඳන් හිඟ වෙමින් ලමා රෝහල් පිරී ඉතිරී යද්දී ය.
එහෙත්, දැන් පවා, හදිසි ක්‍රියාවකට බියකරු රෝගය පාලනය කල හැකි බව, ප්‍රතිපදානයන් පැහැදලි කලේ ය. බලගතු එන්නත්වල සහාය ද සමගින්, ආක්‍රමනශීලී මහජන සෞඛ්‍ය පියවරවලට මාස දෙකක කාල පරාසයක් ඇතුලත වෛරසය මුලිනුපුටා දැමිය හැකි බව, ආචාර්ය ගැස්පෙරොවික්ස් විස්තර කලාය. එහෙත් එන්නත් පමනක් ප්‍රමානවත් නො වේ. “ඩෙල්ටා ප්‍රභේදය අපේ ඇස් අරවන සංඥාවයි” යි ඇය කීවා ය. “එය නවත්වා, මන්දනය කිරීමට අපේ ආම්පන්න මල්ලේ සෑම දෙයක් ම තිබීම අවශ්‍ය යි.”
නමුත්, මහජන සෞඛ්‍ය පියවරවල “ආම්පන්න මල්ල” විවෘත නො කරන ප්‍රධාන ආන්ඩු, අනුගමනය කර ඇති අප්‍රමානවත් පියවරයන් පවා ආපසු හරවමින් සිටිති. අගුලු දැමීම් හා අනෙකුත් සමාජ දුරස්ථකරන පියවරයන් ක්‍රියාවට දමනු වෙනුවට, කොරෝනා වෛරසය බෝවී පතුරුවන බවට ම තහවුරු කරන, පිරී ඉතිරී ගිය පන්ති කාමර තුලට ලමුන් යවමින් පාසල් යලි විවෘත කරමින් තිබේ.
රැස්වීමේ දී, එක්සත් ජනපදයේ, බ්‍රසීලයේ හා ඕස්ට්‍රේලියාවේ ගුරුවරුන්ගේ ප්‍රතිපදාන, ලොව පුරා අධ්‍යාපනඥයන් මුහුන දෙන බියකරු තෝරාගැනීම් පිලිබඳ ඍජු විස්තර සම්පාදනය කලේ ය. “පසුගිය වසරට වෙනස් ව, ශීත ඍතු නැගීමේ නරක ම ගනන් නව ආසාදන විසින් පසුකර යාම ආරම්භ කර තිබෙන තතු තුල, පීඨ, කාර්ය මන්ඩල, ශිෂ්‍යයන් හා ප්‍රජාව ආසාදනය වීමෙන් වැලැක්වීමට සැලසුම් හෝ පිලිවෙත් නැහැ” යි ටෙනිසි ප්‍රාන්තයේ ඩොන්නාහි ගුරුවරයෙක් විස්තර කලේ ය. “සහෝදර කම්කරුවන් සමග මගේ සාකච්ඡාවල දී, ඉස්මතු වන පොදු තේමාවන් වන්නේ අපේක්ෂා භංග වීම, විඳවීම හා කෝපය යි.”
“මුලුමනින් ම පාහේ ම්ලේච්ඡ ආකාරයකට බ්‍රිතාන්‍ය ජනයා මත කරන මෙම පරීක්ෂනය” ලෙස මහාචාර්ය බේකර් විස්තර කල එක්සත් රාජධානියේ ව්‍යසනකාරී තත්ත්වය, මවක් වන ලීසා විසින් පැහැදිලි කලා ය. හුදෙක් පාසල් යලි විවෘත කරමින් තිබෙනවා පමනක් නො ව, මුහුනු ආවරන පැලඳිය නො හැකි බව ලමුන්ට කියනු ලබන අතර, ලමුන් පෙරලා පාසල් කරා එවන්නේ නැත්නම්, දඩ ගසන බව හා බන්ධනාගාරගත කරන බව පවා කියමින් දෙමව්පියන්ට තර්ජනය කරනු ලැබේ. “එංගලන්තයේ පන්ති කාමර තුල ශමනය කිරීමක් නැතැයි කියන විට, මා අදහස් කරන්නේ එහි කිසිවක් නැති බව යි. මුහුනු ආවරන නැහැ, සමාජ දුරස්ථකරනයක් නැහැ, සුදුසු වාතාශ්‍රයක් නැහැ, වායු පෙරහන් නැහැ” යි ලීසා කීවා ය.
ලෝක සමාජවාදී වෙබ් අඩවියේ සාකච්ඡාවේ දී විද්‍යාඥයන් විසින් සම්පාදනය කරනු ලබන තොරතුරු හා දැනුම, ඕනෑ ම වෛෂයික ප්‍රමිතියකින් සලකන කල, සෑම පුවත්පතක ම මුල් පිටුවේ පලවෙමින් හා ලොව පුරා රූපවාහිනී වැඩසටහන් තුල ඉදිරිපත් කරනු ලැබිය යුතු ය. එහෙත්, ලෝසවෙඅ සාකච්ඡාවට ලඟා වන කිසිවක් ප්‍රධාන ධාරාවේ මාධ්‍ය තුල නො පවතී.
ධනපති දේශපාලකයින්ට අනුව මුහුනු ආවරන පැලඳීම වැනි අතිමූලික මහජන සෞඛ්‍ය පූර්වෝපායන් පවා ප්‍රතික්ෂේප කිරීමක් හැඟවෙන, “රංචු ප්‍රතිශක්තිය” සහ එන්නත්කරනය, මුහුනු ආවරන පැලඳීම හා අනෙකුත් පියවරයන් සහිතව පාසල් සහ ආර්ථිකය විවෘත කිරීම ප්‍රවර්ධනය කරන්නන්ගේ සීමාව තුල ජනමාධ්‍යයේ නිල විවාද පවතියි. මේ දෙගොල්ලන් ම පාදක වන්නේ, වෛරසය පැතිර යාම අවුරා එය මුලිනුපුටා දැමීම සඳහා විද්‍යාඥයන් විසින් අවශ්‍ය යයි කියන, අගුලු දැමීම් හා පාසල් වැසීම් ප්‍රතික්ෂේප කිරීමක් මත ය.
එක්සත් ජනපදය තුල, ඩිමොක්‍රටික් පක්ෂය හා බයිඩන් පරිපාලනය වෙනුවෙන් කතා කරන නිව් යෝක් ටයිම්ස් පත්‍රය, පාසල් යලි විවෘත කිරීමක් සඳහා ආක්‍රමනශීලී ව උද්ඝෝෂනය කරමින් සිටී. රිපබ්ලිකන් පක්ෂය පාලනය කරන ප්‍රාන්ත ලමුන් මුහුනු ආවරන පැලඳීමේ අවශ්‍යතාව පවා තහනම් කිරීමට උත්සාහ දරද්දී, ජාතික සෞඛ්‍ය ආයතනයේ අධ්‍යක්ෂ ෆ්‍රැන්සිස් කොලින්ස් අඟහරුවාදා මෙසේ කීවේ ය: “අපට අවශ්‍ය නො වන්නේ අගුලු දැමීම්, වසා දැමීම් හා පාසල් වැසීම් ය.”
“මොන ම අයුරකින් හෝ නව අගුලු දැමීමක් වැලැක්වීම ව්‍යාපාරික සංවිධානවලට අවශ්‍ය යි” යි ස්විට්සර්ලන්තයේ පලවන ටේගස් ඇන්සයිගර් නමැති දෛනික පුවත්පතේ අඟහරුවාදා සංස්කරනයෙහි ප්‍රධාන සිරස්තලය කීවේ ය.
සීමාකිරීම් ක්‍රියාවට දැමීම වැලැක්වීම සදහා, ආර්ථික ක්‍රියාකාරීත්වය සීමා පැනවීම තීරනය කිරීම පිනිස කොරෝනා වෛරස් ආසාදන රේට්ටු විශ්ලේෂනය නවත්වන බව, ජර්මනියේ චන්සලර් ඇන්ජලා මර්කෙල්ගේ ආන්ඩුව නිවේදනය කලේ ය. “ක්‍රියාකාරී ආර්ථිකයක් පවත්වාගෙන යාම සඳහා, කිසිදු ආකාරයකින් තවත් අගුලු දැමීමක් වැලැක්විය යුතු ය” යි සමාජ ප්‍රජාතන්ත්‍රවාදී පක්ෂයේ ආර්ථික ඇමති වොල්ෆ්ගැං ටීෆෙන්සී ප්‍රකාශ කලේ ය.
එන්නත් ලැබීමට සුදුසු ජනගහනයෙන් (මෙයට ලමුන් ඇතුලත් නො වේ) සියයට 70 ඉලක්කය කරා රට ලඟා වූ විට, වෛරසයේ ක්ෂනික පැතිරී යාම නැවැත්වීමට කිසිදු සීමාවක් පැනවීම අවසන් කල යුතු බව, ඕස්ට්‍රේලියානු අගමැති ස්කොට් මොරිසන් සඳුදා සඳහන් කලේ ය. “අපි එය සමග ජීවත් විය යුතු යි; නැත්නම් අපිට සිදුවන්නේ සදාකාලික ව කූඩු වී සිටින්නයි.”
මෙම කියාපෑම් ව්‍යාජයක් බව ඉරිදි සාකච්ඡාවේ ප්‍රතිපදානයන් පැහැදිලි කලේ ය. ආරම්භයේ දී අවශ්‍ය පියවර ගත්තේ නම්, වර්තමාන ව්‍යසනය වැලැක්විය හැකි ව තිබුනි. ලොව පුරා තවත් මිලියන ගනනක් වන ජනතාවගේ ජීවිත ආරක්ෂා කිරීමටත්, වසංගතය නැවැත්වීමටත් පවතින එක ම මාවත වන්නේ, දැන් එම පියවරයන් ක්‍රියාවට දැමීම යි. වෛරසය ඉවත් කොට මුලිනුපුටා දැමිය හැකි හා එසේ කල යුතු අතර, ඒ සඳහා එන්නත්කරනය පමනක් ප්‍රමානවත් නො වේ.
විද්‍යාව අවශ්‍ය බව කියන දේ හා ආන්ඩු විසින් මුලුමනින් ම පාහේ ක්‍රියාවට දමනු ලබන දේ අතර පැහැදිලි පරස්පරය අවබෝධ කරගත හැක්කේ, අතිමූලික කරුනුවලට සම්බන්ධ කිරීමෙන් පමනි. “මෙහි කියා ඇති සෑම දෙයක් ම, වෛරසය ඉවත් කිරීමේ හා මුලිනුපුටා දැමීමේ පිලිවෙතක බලගතු හා බරපතල අවශ්‍යතාව පැහැදිලි කර තිබෙනවා” යි ඉරිදා සාකච්ඡාවේ දී ඉදිරිපත් කල අවසන් අදහස් දැක්වීමේ දී ලෝසවෙඅ ජාත්‍යන්තර කර්තෘ මන්ඩල සභාපති ඩේවිඩ් නෝර්ත් සටහන් කලේ ය.
“ජ්‍යාමිතික සිද්ධාන්ත ද්‍රව්‍යමය අවශ්‍යතා උල්ලංඝනය කලේ නම්, ඒවා ඛන්ඩනය කිරීමට උත්සාහයක් දැරෙනු ඇත’ යි පැරනි කියමනක් තිබෙනවා. දැන් ඉතා පැහැදිලි ව හා බරපතල ලෙස ඉදිරිපත් කරන ලද විද්‍යාත්මක සත්‍යය තිබෙනවා, එම නිසා මෙම පිලිවෙත් ක්‍රියාත්මක කිරීම වලක්වා ඇති බලගතු ද්‍රව්‍යමය සමාජ හා ආර්ථික අවශ්‍යතා පවතින බව හඳුනා ගැනීමට යමෙකුට බල කෙරෙනවා” යි නෝර්ත් වැඩි දුරටත් කීවේ ය.
සෑම බලවත් ප්‍රශ්නයක් හා බලවත් අර්බුදයක් සමග -ගෝලීය කොරෝනා වෛරස් වසංගතය බලවත් ම ඒවා අතරට වැටේ- පන්ති ප්‍රශ්න ඉස්මතු වේ. වසංගතයට තාර්කික හා විද්‍යාත්මක ප්‍රවිෂ්ටයක් ගැනීම වලක්වමින් සිටින සමාජ බලවේගය වන්නේ ධනපති පාලක ප්‍රභූව යි. වසංගතය විසින් නිෂ්පන්න කරනු ලබන අනවශ්‍ය පීඩාව අවසානයක් කරා ගෙන ඒමට සංවිධානය කල යුතු හා බලමුලුගැන්විය යුතු සමාජ බලවේගය වන්නේ, අධ්‍යාපනඥයන්, දෙමව්පියන්, මෝටර් රථ කම්කරුවන්, ප්‍රවර්ධන කම්කරුවන්, සෞඛ්‍යාරක්ෂන කම්කරුවන් ඇතුලු සමස්ත ජාත්‍යන්තර කම්කරු පන්තිය යි.
“වසංගතය නැවැත්විය හැකි එක ම ක්‍රමය නම් කොවිඩ්-19 මුලිනුපුටා දැමීමයි” නමැති ඉදිරි දර්ශන ලිපිය තුල, ලෝසවෙඅ මෙසේ සඳහන් කලේ ය:
මුලිනුපුටා දැමීමේ මූලෝපායට මඟ පෙන්වන මූලික මූලධර්ම පදනම් වී ඇත්තේ විද්‍යාව සහ ලොව පුරා කොවිඩ්-19 මුලිනුපුටා දැමීම සඳහා වැය කල යුතු මුදලට සීමාවක් තිබිය නොහැකි බව අවධාරනය කිරීම මත ය. ලොව පුරා සිටින මිනිසුන්ගේ සමාජ අවශ්‍යතා විද්‍යාත්මක සත්‍යය සමඟ බලවත් ලෙස අන්තර් ඡේදනය වෙයි.
මෙම මූලෝපාය සාර්ථක වීමට නම්, සෑම රටකම එහි ආධාරකරුවන් වසංගතය පිලිබඳ ගැඹුරු විද්‍යාත්මක අවබෝධයක් ලබා ගත යුතුය. කම්කරු පන්තිය විද්‍යාඥයින්ගේ සහයෝගය අගය කරමින් ඒ මත විශ්වාසය තබන අතර, කොවිඩ්-19 මුලිනුපුටා දැමීම සඳහා අවශ්‍ය විද්‍යාත්මක ක්‍රියා මාර්ගය ක්‍රියාත්මක කල හැක්කේ විශාල ජනතාවක් මෙම අරගලය භාර ගන්නා තාක් පමනි.
ඉරිදා පැවැත්වූ ලෝසවෙඅ සාකච්ඡාව මෙම ඉදිරි දර්ශනය ප්‍රායෝගික ව ප්‍රදර්ශනය කලේ ය. ඒ සඳහා සටන් වැදීමට, කම්කරු පන්තියේ බලගතු ජාත්‍යන්තර හා ඒකාබද්ධ මහජන ව්‍යාපාරයක් වර්ධනය කිරීම හරහා එය ඉදිරියට ගෙන යනු ලැබිය යුතු ය.