மொழிபெயர்ப்பின் மூலக் கட்டுரையை இங்கே காணலாம். 

திங்களன்று மிச்சிகனில் பேசிய பில் கிளின்டன், காஸாவில் அமெரிக்க-இஸ்ரேலிய இனப்படுகொலையை நியாயப்படுத்தி, அப்பாவி மக்களை இலக்கு வைப்பது, போரில் ஈடுபடாதவர்களுக்கு எதிராக கூட்டுத் தண்டனை கொடுப்பது இரண்டுமே போர்க்குற்றங்கள் என்று வெளிப்படையாக வாதிட்டார்.

“மிச்சிகனில் உள்ள அரபு அமெரிக்கர்கள் நிறைய பேர் இறந்துவிட்டதாக நினைக்கிறார்கள், அதை விமர்சிப்பவர்கள் அடிப்படையில் சொல்கிறார்கள் ... பழிவாங்கும் வகையில் நீங்கள் எத்தனை பேரைக் கொன்றீர்கள் என்று பாருங்கள். அவர்கள் செய்த கொடூரமான செயல்களுக்காக அவர்களைத் தண்டிக்க நீங்கள் எத்தனை பேரைக் கொன்றால் போதும்? என்று கிளங்டன் கூறினார்.

மேலும், “ஒரு நாள் அவர்கள் உங்களுக்காக வந்து உங்கள் கிராமத்தில் உள்ளவர்களைக் கொன்றுவிட்டால் நீங்கள் என்ன செய்வீர்கள், நீங்கள் சொல்வீர்கள் ... நான் அந்த மதிப்பெண்ணை வைக்கவில்லை. ... எத்தனை பேரைக் கொல்ல வேண்டியிருந்தது என்பது முக்கியமல்ல” என்று கிளிண்டன் கூறினார்.

நெதன்யாகு அரசாங்கம் காஸா மக்களை திட்டமிட்டு பட்டினி போடவும், வடக்கு காஸா முழுவதையும் இனச்சுத்திகரிப்பு செய்யவும், எஞ்சியிருக்கும் ஒவ்வொருவரையும் படுகொலை செய்யவும் ஒரு திட்டத்தை ஏற்று நடைமுறைப்படுத்துகையில் கிளின்டன் இதனைக் குறிப்பிட்டார். உத்தியோகபூர்வ புள்ளிவிபரங்களின்படி, அக்டோபர் 7 இல் இருந்து காஸாவில் 13,000 குழந்தைகள் உட்பட 43,000 க்கும் அதிகமானவர்கள் இஸ்ரேலால் கொல்லப்பட்டுள்ளனர். கிட்டத்தட்ட ஒட்டுமொத்த மக்களும் வீடற்ற, பட்டினியால் வாடும் அகதிகளாக மாற்றப்பட்டுள்ளனர்.

இஸ்ரேலிய இனப்படுகொலையை கிளிண்டன் நியாயப்படுத்துவது குற்றவியல் சட்டம் மற்றும் சர்வதேச சட்டம் இரண்டையுமே அப்பட்டமாக மீறுகிறது. இந்த இரண்டு சட்டங்களுமே நிராயுதபாணியான மக்களை படுகொலை செய்வதை நியாயப்படுத்த “பழிவாங்கலை” அனுமதிக்கவில்லை.

குற்றவியல் சட்டத்தில், பழிவாங்கும் வகையில் யாராவது கொலை செய்தால், அவர் மீது கொலை வழக்கு தொடரப்படும். இது சர்வதேசச் சட்டத்திற்கும் இது பொருந்தும். கிளிண்டனுக்கு ஒரு மறுப்பு தெரிவிப்பதாக தோன்றும் வார்த்தைகளில், காஸா போர் மீதான ஐ.நா. விசாரணை ஆணையம், கடந்த மாதம் அறிவித்தது, “ஒரு சிலரின் நடவடிக்கைகளுக்காக ஒட்டுமொத்த மக்கள் மீதான கூட்டுத் தண்டனை” “சர்வதேச மனிதாபிமான சட்டத்தை [சர்வதேச மனிதாபிமான சட்டத்தின்] தெளிவாக மீறுவதாகும்.”

உண்மையில், “பழிவாங்கும்” விதி என்பது, இரண்டாம் உலகப் போரின் போது, ஐரோப்பாவில் நாஜி ஜேர்மனி நடத்திய கொடூரமான ஆக்கிரமிப்புக்கு எதிரான எதிர்ப்பு நடவடிக்கைகளுக்கு விடையிறுப்பாக அதனால் பின்பற்றப்பட்ட கொள்கையாக இருந்தது. முன்னணி நாஜி ரெய்ன்ஹார்ட் ஹெய்ட்ரிச் படுகொலை செய்யப்பட்ட பிறகு, நாஜிக்கள் கண்மூடித்தனமாக செக் கிராமமான லிடிஸ் இல் குடிமக்களை படுகொலை செய்தனர். மார்ச் 1944ல் ரோமில் ஜேர்மனிய துணைப் பொலிஸ் பிரிவுகள் மீது நடந்த ஒரு குண்டுத் தாக்குதலைத் தொடர்ந்து, நாஜி ஆக்கிரமிப்பாளர்கள் கொல்லப்பட்ட ஒவ்வொரு பொலிஸ்காரருக்கும் 10 குடிமக்கள் என்ற விகிதத்தில் கொல்லப்பட வேண்டும் என்று உத்தரவிட்டனர். ஆர்டிடீன் குகைகள் படுகொலை என்று பின்னர் அறியப்பட்ட ஒன்றில், அவர்கள் 335 இத்தாலிய குடிமக்களை தலையில் சுட்டுக் கொன்றனர். அவர்களில் யாருக்கும் தாக்குதலுடன் எந்த தொடர்பும் இல்லை.

இஸ்ரேலிய போர்க் குற்றங்களை பகிரங்கமாக பாதுகாத்து பேசிய கிளிண்டன், காஸாவில் அப்பாவி மக்கள் கொல்லப்பட்டது ஒரு பொருட்டல்ல என்று அறிவித்தார். “ஏனென்றால் அவர்கள் அப்பாவி பொதுமக்களால் பாதுகாக்கப்படுவதை ஹமாஸ் உறுதி செய்கிறது. நீங்கள் உங்களைப் பாதுகாத்துக் கொள்ள விரும்பினால் பொதுமக்களைக் கொல்லும்படி அவர்கள் உங்களை வற்புறுத்துவார்கள்” என்று அவர் மேலும் குறிப்பிட்டார்.

முதலாவதாக, 1967 இல் இருந்து காஸாவை சட்டவிரோதமாக ஆக்கிரமித்தும், பாலஸ்தீன மக்களுக்கு எதிராக தன்னை “பாதுகாத்துக் கொள்ளவும்” இஸ்ரேலுக்கு எந்த உரிமையும் இல்லை. கிளிண்டன் பேசிய அதே நாளில் ஒரு பத்திரிகையாளர் கூட்டத்தில் சர்வதேச நீதிமன்ற நீதிபதி நவநீதம் பிள்ளை அறிவித்ததைப் போல, இஸ்ரேலுக்கும் பாலஸ்தீனத்திற்கும் இடையில் “நீங்கள் வேறுபடுத்திப் பார்க்க வேண்டும்”, ஏனென்றால் “ஒருவர் ஆக்கிரமிப்பாளர், மற்றவர் ஆக்கிரமிப்புக்கு உள்ளானவர்.”

காஸா உலகின் மிக அடர்த்தியான மக்கள்தொகை கொண்ட நகர்ப்புற பகுதிகளில் ஒன்றாகும், கடந்த ஆண்டில் இஸ்ரேல் பல அணுகுண்டுகளுக்கு சமமான கட்டளைகளை வீசியுள்ளது. நெதன்யாகு அரசாங்கம் காஸாவை தரைமட்டமாக்குவதில் பாரிய 2,000 பவுண்டு எடையுள்ள குண்டுகளைப் பெருமளவில் பயன்படுத்தியுள்ளது. ஏனென்றால் பாலஸ்தீனத்தை இனரீதியில் சுத்திகரித்து அதை “அகன்ற இஸ்ரேலில்” இணைக்கும் அதன் மூலோபாயத்திற்கு ஏற்ப, இறப்பு எண்ணிக்கையை அதிகரிப்பதே அதன் நோக்கமே தவிர குறைப்பது அல்ல.

பாலஸ்தீனிய மக்கள் படுகொலை செய்யப்பட்டு வருவதையும், பாலஸ்தீனியப் பகுதியை சட்டவிரோதமாக இணைத்துக்கொள்ளும் இஸ்ரேலிய நோக்கங்களையும் பாதுகாத்துவரும் கிளின்டன், விவிலியத்தில் கூறப்பட்டுள்ள டேவிட் மன்னர் என்ற கட்டுக்கதையை கையிலெடுத்தார். பாலஸ்தீன மக்கள் மத்தியில் உரையாற்றிய கிளிண்டன் பின்வருமாறு அறிவித்தார்:

சரி, அவர்களுக்கான செய்தி என்னிடம் உள்ளது. அவர்கள் (இஸ்ரேலியர்கள்) தங்கள் நம்பிக்கை (இஸ்லாம்) இருப்பதற்கு முன்பே அங்கு இருந்தனர். அவர்கள் டேவிட் ராஜாவின் காலத்தில் அங்கே  இருந்தார்கள், தெற்கே இருந்த பழங்குடியினர் யூதேயா (Judea ) மற்றும் சமாரியாவைக் (Samaria) கொண்டிருந்தனர்.

முதலாவதாக, டேவிட் என்ற அரசர் லெவண்டில் ( Levant ) ஆட்சி செய்தார் என்பதற்கு எந்தத் தொல்பொருள் ஆதாரமும் இல்லை, அவருடைய ராஜ்யம் என்று கூறப்படுவது இப்போது மேற்குக் கரை என்று அழைக்கப்படும் பகுதியையும் உள்ளடக்கியிருந்தது. ஆனால், வெண்கல யுகத்தில் என்ன நடந்திருக்கலாம் அல்லது நடக்காமலும் இருக்கலாம் என்பது தற்கால சர்வதேச சட்டத்துடன் துல்லியமாக பூஜ்ஜிய தொடர்பைக் கொண்டுள்ளது. அதன் மிக உயர்ந்த அமைப்பான சர்வதேச நீதிமன்றம் இந்த ஆண்டு மேற்குக் கரை அல்லது ஆக்கிரமிக்கப்பட்ட பாலஸ்தீனிய பிராந்தியங்களின் வேறு எந்தப் பகுதியிலும் இஸ்ரேலுக்கு எந்த உரிமையும் இல்லை என்று திட்டவட்டமாக தீர்ப்பளித்தது.

எல்லாவற்றிற்கும் மேலாக, அமெரிக்க ஏகாதிபத்தியத்திடம் இருந்து அது பெற்றுள்ள நிபந்தனையற்ற ஆதரவினால்தான் இஸ்ரேலினால் இந்த இனப்படுகொலையை நடத்த முடிகிறது. பாலஸ்தீன பிரச்சினையின் “இறுதி தீர்வை” வாஷிங்டன் ஈரானை இலக்கு வைத்துள்ள ஒரு பிராந்தியந்தழுவிய போருக்கான அதன் தயாரிப்பின் ஒரு முக்கிய கூறுபாடாக பார்க்கிறது. இது கடந்த வாரம் தெஹ்ரான் மீது இஸ்ரேலின் அமெரிக்க ஆதரவு ஏவுகணைத் தாக்குதலுடன் ஒரு படி மேலே சென்றது. அமெரிக்க ஏகாதிபத்தியம் உலகப் போரைத் தொடர்வதில், குறிப்பாக கிழக்கு ஐரோப்பாவில் ரஷ்யாவிற்கு எதிராகவும், ஆசிய-பசிபிக் பகுதியில் சீனாவிற்கு எதிராகவும், அதன் பெயரளவிலான போட்டியாளர்கள் மற்றும் நட்பு நாடுகளுக்கு எதிராகவும், அதன் உலகளாவிய மேலாதிக்கத்தை வலுப்படுத்த மத்திய கிழக்குப் போர், அதன் திட்டமிடப்பட்ட போர் முனைகளில் ஒன்றாக இருக்கிறது.

போர் மற்றும் இனப்படுகொலை ஆகியவை அமெரிக்க அரசியல் ஸ்தாபனத்திற்குள் இரு கட்சி ஆதரவை அனுபவிக்கின்றன. பாலஸ்தீனியர்கள் மீதான இனப்படுகொலைக்கு கிளிண்டன் இத்தகையதொரு வெளிப்படையான பாதுகாப்பை வழங்கினார் என்ற உண்மை இதை நிரூபிக்கிறது மற்றும் முழு அரசியல் ஸ்தாபகமும் எவ்வளவு தூரம் வலது நோக்கி நகர்ந்துள்ளது என்பதையும் வெளிப்படுத்துகிறது.

கிளின்டன் தன்னுடைய அரசியல் வாழ்க்கை முழுவதிலும் பாலஸ்தீனிய மக்களுக்கு கடுமையான எதிரியாகவே இருந்து வந்துள்ளார். பாலஸ்தீனத்தின் மீதான இனப்படுகொலை மற்றும் இனச்சுத்திகரிப்பு ஆகியவற்றை அவர் பகிரங்கமாக ஆதரிப்பது, அவர் தனது ஜனாதிபதி பதவிக்காலம் முழுவதும் பாலஸ்தீனிய தலைவர்களுடன் முற்றிலும் கெட்ட எண்ணத்துடன் பேச்சுவார்த்தை நடத்தினார் என்ற உண்மையை அம்பலப்படுத்துகிறது. உண்மையில், 2000 இல் காம்ப் டேவிட்டில் நடந்த பேச்சுவார்த்தைகள் கால் நூற்றாண்டு கால இஸ்ரேலிய படுகொலை மற்றும் ஒடுக்குமுறைக்கு மட்டுமே வழி வகுத்ததுடன், இப்போது பாலஸ்தீனிய பிரச்சினைக்கான “இறுதி தீர்வாக” கட்டவிழ்ந்து வருகிறது.

இனப்படுகொலைக்கான அவரது பாதுகாப்பு, அமெரிக்க ஏகாதிபத்தியத்தின் உண்மையான குரலைக் கொண்டிருக்கிறது. அமெரிக்க ஏகாதிபத்தியமானது, நெதன்யாகு, கேலன்ட் மற்றும் இஸ்ரேலிய படைகளுக்கு பல பில்லியன் டாலர்களை அதிக சக்தி வாய்ந்த ஆயுதங்களுடன் ஒரு வருடத்திற்கும் மேலாக ஆண்களையும் பெண்களையும் குழந்தைகளையும் படுகொலை செய்ய வழங்கியுள்ளது. நவம்பர் 5 தேர்தலில் ட்ரம்ப் வெற்றி பெற்றால் ஒரு பாசிசவாத சர்வாதிகாரத்தைக் கட்டியெழுப்புவதற்கான அவரது நோக்கத்தை பகிரங்கமாக அறிவிக்கின்ற அதேவேளையில், ஹாரிஸும் ஜனநாயகக் கட்சியினரும் அவருக்கு எதிராக மக்கள் எதிர்ப்பை அணிதிரட்டுவதைத் தவிர்ப்பதற்காக இந்த அச்சுறுத்தலைப் புறக்கணிக்கின்றனர். அதேவேளையில், பாலஸ்தீனர்கள் மீதான பாசிசவாத நிர்மூலமாக்கலை அங்கீகரிக்கின்றனர்.

அமெரிக்க காங்கிரஸின் கூட்டு அமர்வில் ஜூலை மாதம் இஸ்ரேலிய பிரதம மந்திரியுடன் ஒரு சந்திப்பை நடத்துவதன் மூலம் நெதன்யாகுவின் இனப்படுகொலையின் குண்டர் பாதுகாப்புக்கு ஹாரிஸ் பதிலளித்தார். அதன்பின்னர் ஊடகங்களுக்கு உரையாற்றிய அவர், ஈரான், ஹமாஸ், ஹிஸ்புல்லா மற்றும் ஹவுதி உட்பட ஈரானிய ஆதரவிலான போராளிகள் குழுக்களை எதிர்த்துப் போரிட ஜெருசலேமுக்கு அவசியமான இராணுவ உபகரணங்களை வாஷிங்டன் வழங்கும் என்று சூளுரைத்தார். தேர்தல் பிரச்சார பாதையில், ஹாரிஸ் வெள்ளை மாளிகையில் அவரது பிரதான நோக்கம் அமெரிக்கா “உலகின் மிகவும் ஆபத்தான இராணுவ சக்தியை” பராமரிப்பதை உறுதிப்படுத்துவதாக இருக்கும் என்ற அறிவிப்புடன் இந்த சூளுரையை அடிக்கோடிட்டுக் காட்ட முற்பட்டுள்ளார்.

முதலாளித்துவ வர்க்கம் அதன் பொருளாதார மற்றும் புவிசார் மூலோபாய நலன்களைப் பின்தொடர்வதில் பாசிசவாத வன்முறையை ஆதரிப்பது அமெரிக்காவுடன் மட்டுப்பட்டதல்ல. ஜேர்மனிய வெளியுறவு மந்திரி அன்னலெனா பேயர்பொக் அக்டோபர் மாதம் பாராளுமன்றத்தில் கூறினார்.

ஹமாஸ் பயங்கரவாதிகள் மக்களுக்குப் பின்னால், பள்ளிகளுக்குப் பின்னால் ஒளிந்து கொள்ளும்போது, நாம் மிகவும் கடினமான நீரில் நம்மைக் காண்கிறோம். ஆனால், நாங்கள் இதிலிருந்து பின்வாங்கப் போவதில்லை. பயங்கரவாதிகள் இந்த நிலையை துஷ்பிரயோகம் செய்வதால்தான், பொதுமக்கள் தளங்கள் அவற்றின் பாதுகாக்கப்பட்ட அந்தஸ்தை இழக்க நேரிடும் என்று ஐக்கிய நாடுகள் சபையில் நான் தெளிவுபடுத்தினேன். ஜேர்மனி அதைத்தான் குறிக்கிறது—இஸ்ரேலின் பாதுகாப்பு என்று நாம் குறிப்பிடும்போது அதைத்தான் நாங்கள் அர்த்தப்படுத்துகிறோம்.

இருபதாம் நூற்றாண்டின் முதல் பாதியில் இருந்து பார்த்திராத முதலாளித்துவ காட்டுமிராண்டித்தனத்தின் மீளெழுச்சி, ஏகாதிபத்திய சக்திகளுக்கு இடையே உலகின் ஒரு புதிய மறுபங்கீட்டின் வெடிப்புடன் பிணைந்துள்ளது. கடந்த காலத்தின் பாசிச சர்வாதிகாரங்களில் இருந்து வெளிவேடத்திற்கு ஜனநாயக ஆட்சிகளைப் பிரித்ததாகக் கூறப்பட்ட சிவப்புக் கோடுகள் அனைத்தும் மூலப்பொருட்கள், சந்தைகள் மற்றும் புவிசார் அரசியல் செல்வாக்கிற்கான போராட்டத்தில் துடைத்தெறியப்பட்டுவிட்டன. இந்தப் போராட்டம், உலக முதலாளித்துவத்தின் சமரசப்படுத்த முடியாத முரண்பாடுகளாலும், தேசிய-அரசு மற்றும் பூகோள உற்பத்திக்கும், உற்பத்தி சாதனங்களின் தனியுடைமைக்கும் மற்றும் உற்பத்தி நிகழ்ச்சிப்போக்கின் பாரிய சமூக குணாம்சத்திற்கும் இடையிலான முரண்பாடுகளால் உந்தப்படுகிறது.

காஸா இனப்படுகொலை ஒவ்வொரு ஏகாதிபத்திய நாட்டின் தலைவர்களையும் போர்க் குற்றவாளிகளின் ஒரு கூட்டமாக அம்பலப்படுத்தியுள்ளது. ஆனால், அவர்களின் குற்றகரத்தன்மை ஒட்டுமொத்த முதலாளித்துவ சமூக ஒழுங்கமைப்பின் திவால்நிலையையும் சீரழிவையும் வெளிப்படுத்துகிறது. இதுவே, ஏகாதிபத்திய போர் மற்றும் சமூக காட்டுமிராண்டித்தனத்திற்கான இறுதி காரணமாகும்.