(මෙය The NATO-Russia War in Ukraine enters its second year මැයෙන් 2023 පෙබරවාරි 24දා පල කෙරුනු ලිපියේ පරිවර්තනය යි.)
2022 පෙබරවාරි 24දා, රුසියාව යුක්‍රේනය ආක්‍රමනය කල තැන් පටන් වසරක් ගතවීම අද දින සලකුනු කෙරෙයි. එක්සත් ජනපද හා යුරෝපීය අධිරාජ්‍යවාදයේ ගෝලීය භූ-දේශපාලනික හා ආර්ථික අවශ්‍යතා නැටෝව විසින් අනවරත ව ප්‍රසාරනය කිරීම මගින් අවුලුවන ලද යුද්ධය, ව්‍යසනකාරී විපාක සහිත තුන්වැනි ලෝක යුද්ධයක් බවට පුපුරා යමින් තිබේ.
සෑම යුද්ධයක ම පාහේ ආරම්භක අදිරයන්හි දී, ආන්ඩු කියාපාන්නේ ස්වයං-ආරක්ෂාව තකා ක්‍රියාත්මක වන බව සහ “පලමු වෙඩිල්ල” තැබුවේ කවුද යන කරුන මත අවධානය යොමු කරන බව යි. හතුරා යක්ෂාරෝපනය කිරීම ඉලක්ක කරගන්නා අනවරත අපරාධ ප්‍රචාරනය මෙයට පසුව සාමාන්‍යයෙන් පැමිනේ. එහෙත්, අනිවාර්යයෙන් ම, මරන ගොඩගැසෙද්දී හා දෙපාර්ශවයේ ම ආරම්භක අපේක්ෂාවන් නිෂ්ඵල බවට පත්වෙද්දී, වඩා ගැඹුරු හේතු හා ගාමක සාධකයන් හෙලිදරව් වේ. යුක්‍රේනය අරබයා වන යුද්ධය සම්බන්ධ තත්ත්වය මෙය යි.
එහි දෙවැනි වසරට ඇතුල් වෙද්දී, එක්සත් ජනපද හා යුරෝපීය අධිරාජ්‍යවාදය එහි නැටෝ සහචර රාජ්‍යයන් සමග රුසියාවට එරෙහි ව ගෙන යන, අප්‍රකාශිත නමුත් විවෘත යුද්ධයක් බවට, මෙම ගැටුම පරිනාමය වී ඇත. බොරු හෙලිදරවු වෙමින් පවතී. නො පවතින යුක්‍රේනියානු “ප්‍රජාතන්ත්‍රවාදය” ආරක්ෂා කිරීම පසෙක තැබුවත්, මෙම යුද්ධය යුක්‍රේනයේ ආරක්ෂාව පිලිබඳ එකක් නො වේ. එය වනාහි, රුසියාව මිලිටරිමය ලෙස පරාජය කර, එහි ආන්ඩුව ඉවත් කොට, රූකඩ පාලන තන්ත්‍රයක් පැටවීම ඉලක්කය වන අධිරාජ්‍යවාදී යුද්ධයකි. රුසියාවේ යෝධ ස්වාභාවික සම්පත්, එක්සත් ජනපද හා යුරෝපීය සංගතවල ඍජු පාලනය යටතේ තබා, යුරේසියානු භූ-ස්කන්ධය මත එක්සත් ජනපද අධිරාජ්‍යවාදයෙහි ආධිපත්‍යය ස්ථාපනය කරමින්, චීනය සමග යුද්ධයට මාවත විවෘත කිරීම, මෙම ප්‍රතිඵලයෙහි අභිප්‍රායය යි.
මෙම ඉලක්ක ලුහුබැඳීමේ දී, එක්සත් ජනපදය හා නැටෝව, ඔවුන් කලින් ප්‍රකාශයට පත් කල සියලු “රතු ඉරි” හරහා යමින් සිටිති. 2023 වසරෙහි පලමු මාස දෙක තුල පමනක්, එක්සත් ජනපදය හා යුරෝපීය බලයන් යුද ටැංකි, දිගු දුර මිසයිල හා සටන් යුද යානා දිගේලි කිරීම හෝ දිගේලි කිරීම පිලිබඳ සැලසුම් නිවේදනය කර ඇත.
මේ සතියේ කියෙවු හා වෝර්සෝ වෙත කල සංචාරයෙ දී, යුද්ධයෙහි අරමුන වන්නේ රුසියාව මූලෝපායික පරාජයකට ලක්කිරීම බව බයිඩන් අවධාරනය කලේ ය. සටන් විරාමයක් සාකච්ඡාවට ගැනීමට හෝ රුසියාවට කිසිවක් ප්‍රදානය කෙරෙන කොන්දේසි මත ගැටුම අවසන් කිරීමට එක්සත් ජනපද ආන්ඩුව උනන්දු නැත. පසුබැසීමක් තිබිය නො හැකි තත්ත්වයක් බයිඩන් පරිපාලනය විසින් නිර්මානය කර ඇත්තේ, එසේ කිරීම එහි කීර්ති නාමයට හා විශ්වාසවන්ත භාවයට ප්‍රකෘතිමත් කල නො හැකි ලෙසින් වලකපනු ඇති නිසා සහ නැටෝවෙහි බිඳවැටීමට තුඩු දෙනු ඇති නිසා ය. මෙම යුද්ධයෙන් ලබන ජයග්‍රහනය, ඇමරිකානු අධිරාජ්‍යවාදයට පැවැත්ම පිලිබඳ ප්‍රශ්නයක් බවට පත් වී තිබේ.
වැදගැම්මකට නැතැයි සැලකී ඇති යුක්‍රේන මහජනයාගේ තත්ත්වය ප්‍රගාඪ ලෙස ඛේදනීය වේ. සටන් බිම මත යුක්‍රේනයෙහි ප්‍රධාන ඉදිරි පියවරයන් පිලිබඳ සියලු කියාපෑම් තිබියදී, මෙම පරගැති රාජ්‍යෙයහි මහජනයාගේ රීරී මාංසය සූරාගැනෙමින් පවතියි. පැහැදිලි සාක්ෂියකින් තොර ව, රුසියානු මරන ගැන එක්සත් ජනපදයේ මාධ්‍ය කයිවාරු ගසන අතර ම, යුක්‍රේනියානු ජීවිත හානි වල ගොරතර පරිමානය ගැන මුලුමනින් ම පාහේ පරිපූර්න නිශ්ශබ්දතාවක් පවතී. යුක්‍රේනියානු සොල්දාදුවන් 150,000ත් 200,000ත් අතර සංඛ්‍යාවක් ඝාතනය වුනු බවට වන විශ්වාසවන්ත වාර්තා පවතී. බයිඩන් පරිපාලනය තුල සිටින නව කන්සවේටිව්වාදී යුදකාමීන් විසින් යුක්‍රේනියානු තරුන පරම්පරාවක් කැපකරනු ලබමින් තිබේ.
යුක්‍රේනියානු පාලන තන්ත්‍රය උත්කර්ෂයට නැංවීමට දරන සියලු ප්‍රචාරන ප්‍රයත්නයන් නො තකා, හිටපු විකට ශිල්පී සෙලෙන්ස්කි යනු, රට පාලනය කරන දූෂිත කතිපයාධිකාරීන් සහ මිලිටරිය තුල සිටින නව-නාසිවාදීන් වෙනුවෙන් පෙරමුනේ සිටින පුද්ගලයෙක් මිස වෙනකෙක් නො වේ. යෝධ පරිමානයෙන් මුදල් හා ආයුධ පොම්ප කිරීම නො වන්නට, තව සතියක් වත් මෙම පාලන තන්ත්‍රය නො නැසී නො සිටිනු ඇත.
වඩා දියුනු ආයුධ නැව්ගත කිරීම සඳහා වන අනවරත කැඳවීම් පිලිබිඹු කරන්නේ, අපේක්ෂිත රුසියානු ප්‍රහාරය යුක්‍රේනියානු හමුදාව හා පාලන තන්ත්‍රය පූර්න පරිමානයෙන් බිඳවට්ටවනු ඇති බවට වර්ධනය වන භීතීන් ය. යුක්‍රේනය මුහුන දෙන තත්ත්වය, හුදෙක් යුද ටැංකි හා ගුවන් යානා සමගින් පමනක් විසඳනු ලැබිය හැකි එකක් නො වේ. නැටෝ භටයන් දිගේලි කරනු ලැබීම අවශ්‍ය ය. බයිඩන්ගේ සංචාරයෙහි ඉලක්කය වූයේ, නැටෝව ඇතුලත පවතින බෙදීම් ජයගැනීම සහ මෙම ඊලඟ පියවර සඳහා මහජන මනෝගතිය සූදානම් කිරීම යි.
සෑමවිට ම මෙන් මෙහි දී ද අධිරාජ්‍යවාදයේ ක්‍රියාකාරකම්, බොරු හා නරුමත්වය සමගින් සාධාරනීකරනය කරනු ලැබේ. “මේ ගැටුමේ දී පරදුවට තැබී තිබෙන්නේ” “ලොව පුරා ප්‍රජාතන්ත්‍රයන්ගේ නිදහස” යයි බයිඩන් ප්‍රකාශ කලේ ය. ඔහු මෙම කතාව කලේ, නැටෝවේ නැගෙනහිර යුරෝපීය සාමාජිකයන් ඉදිරියේ වන අතර, එම සියලු රාජ්‍යයන් මත ආධිපත්‍යය දරන්නේ, දක්ෂිනාංශික හා ඒකාධිපති ආන්ඩු ය.
යුක්‍රේනියානු පාලන තන්ත්‍රය සහ එහි මිලිටරිය නව-ෆැසිස්ට්වාදීන්ගෙන් සන්තෘප්තය යන්න අවිවාදිත ය. කුප්‍රකට යුක්‍රේනියානු ජාතිකවාදීන්ගේ සංවිධානයට නායකත්වය දුන්, ෆැසිස්ට්වාදී මහා මිනීමරුවා හා හිට්ලර්ගේ තුන්වන රයිකයේ සහකරුවා වූ ස්ටෙපාන් බන්ඩේරා ජාතික වීරයෙකුගේ තත්ත්වයට ඔසවන ආඛ්‍යානයක පදනම මත යුක්‍රේනයේ ඉතිහාසය යලි ලියනු ලැබෙමින් තිබේ.
බයිඩන්ට ඔහුගේ කතාව කිරීමට ආරාධනා කල පෝලන්ත ආන්ඩුව පාලනය කරනු ලබන්නේ, පෝලන්තය රුසියාවට එරෙහි එක්සත් ජනපද ආක්‍රමනය සඳහා හතුරු ආක්‍රමනික බිමක් බවට පරිවර්තනය කරමින් සිටින අතර, පෝලන්ත යුදෙව්-විරෝධය පිලිබඳ ඓතිහාසික පර්යේෂන සහ කතා කිරීම සාපරාධීකරනය කර ඇති, අන්ත-දක්ෂිනාංශික නීතිය හා යුක්තිය පක්ෂය විසිනි. මේ සතියේ දී, [ඉශ්‍රායල් පුවත්පතක් වන] හාරෙට්ස් සමග පැවති සම්ම්ඛ සාකච්ඡාවක දී හිටපු පෝලන්ත ජනාධිපති ලෙක් වැලේසා සඳහන් කලේ, පෝලන්තය තුල ප්‍රජාතන්ත්‍රවාදයෙහි තත්ත්වය කොතරම් අසාධ්‍ය ද යත්, “බලය යොදාගැනීම සමගින් වීදිවල සිදුවන විප්ලවයක්” එයට අවශ්‍ය වනු ඇති බව යි. “...ප්‍රජාතන්ත්‍රවාදය හා නිදහස විනාශ කිරීමේ දී නීතිය හා යුක්තිය පක්ෂය එතරම් දුර ගොස් තිබෙනවා.”
ඇමරිකානු මූල්‍ය කතිපයාධිකාරයේ පුවත්පත වන වෝල් ස්ට්‍රීට් ජර්නලය, මේ සතියේ පල කල කතුවැකියක් තුල (“යුක්‍රේනය තුල ඇමරිකාවේ තෝරාගැනීම”) සැබෑ කරුනු ස්ථාපිත කලේ ය. “සාමය සඳහා වන වේගවත් ම මාවත වන්නේ පුටින් මහතා පරාජය කිරීමයි” යි ජර්නලය සඳහන් කලේ ය. “යුක්‍රේනය තුල පරදුවට තැබී ඇති දේවල් පිලිබඳ ව වඩ වඩා සංශයවාදී වෙමින් සිටින ඇමරිකානුවන්ට ඍජු ව කතා කරන ලෙසත්, විදේශ රටවල ‘ස්වෛරීත්වය’ සහ ‘ප්‍රජාතන්ත්‍රවාදය’ පිලිබඳ විල්සනියානු දෘෂ්ඨීන් නො ව, සාරභූත ජාතික අවශ්‍යතා සඳහා එක්සත් ජනපදයේ සහයෝගය පදනම් කරන ලෙසත්” ජර්නලය බයිඩන් පරිපාලනයට උපදෙස් දෙන්නේ, යුද්ධයට මහජන සහයෝගය නො පැවතීම පිලිබඳ ව හතිවැටීම නිසා ය.
එක්සත් ජනපද හා යුරෝපීය මාධ්‍යය තුල යුද්ධය පිලිබඳ සියලු සාකච්ඡා පදනම් කරනු ලබන්නේ, දුෂ්ට ව්ලැදිමීර් පුටින් හේතුවකින් තොර ව මුදා හල “ප්‍රකෝප නොකෙරුනු යුද්ධයක්” පිලිබඳ ප්‍රචාරන ආඛ්‍යානය මත යි. 2022 පෙබරවාරි 24දාට පෙර අවුරුදු හා දශක තුල සිදු වූ සියල්ල සරල ව නො තකා හරිනු ලැබේ. අන් කවරකටත් වෙනස් ව, මෙම යුද්ධයට ඓතිහාසික හේතුවක් නැත.
සත්‍ය වසයෙන් ම, රුසියාව සමග ගැටුම වනාහි, 1991 දී සෝවියට් සංගමය බිඳ විසුරුවා හල තැන් පටන්, ඇමරිකානු අධිරාජ්‍යවාදය විසින් දියත් කරන ලද, නිම නො වන යුද්ධ හා ආක්‍රමන මාලාවක අඛන්ඩ සන්තතියකි. ලෝකයේ ව්‍යවහාර මුදල ලෙස ඩොලරයේ තත්ත්වය කෙරෙහි වර්ධනය වන තර්ජන ඇතුලු සිය ගෝලීය ආර්ථික තත්ත්වයෙහි දිග්ගැස්සුනු ඛාදනයට මුහුන දෙන, අභ්‍යන්තර අර්බුදය විසින් ධාවනය කරනු ලබන එක්සත් ජනපදය, එහි ගෝලීය ආධිපත්‍යධාරී තත්ත්වය පවත්වාගෙන යාමේ ක්‍රමය ලෙස මිලිටරි බලය දැකගනී.
රුසියාව සමග ගැටුම ධාවනය කරන ලද්දේ, රුසියානු දේශසීමා දක්වා ම නැටෝව දශක ගනනාවක් තිස්සේ ප්‍රසාරනය කිරීම විසිනි. 2014 දී, රුසියානු-ගැති ආන්ඩුවක් පෙරලා දැමීම පිනිස එක්සත් ජනපදය යුක්‍රේනය තුල දක්ෂිනාංශික කුමන්ත්‍රනයක් ක්‍රියාවට දැමූ අතර, එය නැගෙනහිර කලාපය තුල අට-අවුරුදු සිවිල් යුද්ධයක් ආරම්භ කලේ ය. රුසියානු ආක්‍රමනයට පෙරාතු අට වසර තුල, ඩොලර් දස බිලියන ගනන් වටිනා මිලිටරි උපකරන සමගින් යුක්‍රේනය මුලුමනින් ම සන්නද්ධ කරන ලද්දේ, එය නැටෝ මිලිටරි සන්ධානයේ තථ්‍ය සාමාජිකයෙකු බවට හරවමිනි.
රුසියාව පාර්ශවයෙන් ගත් විට, එක් වසරකට පෙර “විශේෂ මිලිටරි මෙහෙයුම” දියත් කිරීමට ගත් තීන්දුව වනාහි, ස්ටැලින්වාදී නිලධාරී තන්ත්‍රය විසින් සෝවියට් සංගමය බිඳ විසුරුවා, ධනවාදය පුනස්ථාපනය කොට, රාජ්‍ය වත්කම් හොරකම් කිරීම සහ පුද්ගලීකරනය කිරීම මත පදනම් වන කතිපයාධිකාරී පාලන තන්ත්‍රයක් නිර්මානය කිරීමේ විනාශකාරී විපාකයන්ට දක්වන ලද මංමුලා සහගත හා ප්‍රතිගාමී ප්‍රතිචාරයක් විය.
පුටින් ආන්ඩුව සටන් කරමින් සිටින්නේ, රුසියානු මහජනයාගේ නො ව, ධනපති පාලක පන්තියේ අවශ්‍යතා වෙනුවෙනි. එය ආක්‍රමනය දියත් කලේ, රුසියානු රාජ්‍යයේ “ආරක්ෂක අවශ්‍යතා” පිලිගැනීම සහ අධිරාජ්‍යවාදී බලයන්ගේ ඍජු මැදිහත්වීමෙන් තොර ව රුසියාවේ සම්පත් කොල්ලකෑමට රුසියානු කතිපයාධිකාරයට ඉඩ ලබා දෙනු ඇති සම්මුතිවාදී සමථයකට එක්සත් ජනපදය සමග එලඹීමේ අපේක්ෂාව සහිත ව ය.
ප්‍රතිගාමී ජාතික ස්වෝත්තමවාදය ඇවිලවීම මගින් යුද්ධයට සහයෝගය ජනනය කරගැනීමට පුටින් උත්සාහ දරමින් සිටී. එහෙත් කම්කරු පන්තිය සහ තරුනයන්ගේ පලල් කොටස් අතර යුද්ධය ගැඹුරින් ම අපකීර්තිමත් ය.
යුද්ධය වනාහි සෝවියට් සංගමය බිඳ විසුරුවීමේ හා ධනවාදය පුනස්ථාපනය කිරීමේ ප්‍රතිඵලයය යන්න ගැන පලල් ව පැතිරුනු හා වේගයෙන් වර්ධනය වන දැනුවත් භාවයක් පවතී.
තුනී පාලක පන්තියක් විසින් මෙම යුද්ධය තුලට තල්ලු කරන ලද යුක්‍රේනියානු මහජනයා අතර ද එවන් මනෝගතීන් පවතී.
මෙම යුද්ධයට පිලිතුර සොයාගත යුත්තේ කවර හෝ පාර්ශවයක මිලිටරි ජයග්‍රහනය තුල නො ව, අධිරාජ්‍යවාදයට හා සියලු ධනේශ්වර ආන්ඩුවලට විරුද්ධ ව රුසියානු හා යුක්‍රේනියානු කම්කරු පන්තිය ගෙන යන ඒකාබද්ධ අරගලයක් තුල යි.
එක්සත් ජනපද හා යුරෝපීය අධිරාජ්‍යවාදයේ ඉලක්කවල අර්ථය වන්නේ, රුසියාවේ මිලිටරි පරාජයෙන් තොර ව, ගැටුමට වෙනත් කිසිදු විසඳුමක් පිලිගනු ලැබිය නො හැකි බව යි. රුසියාවට ඔබ්බේ, එලඹෙන වසර තුන ඇතුලත පුපුරා යනු ඇතැයි එක්සත් ජනපද ජනරාල්වරුන් අපේක්ෂා කරන චීනය සමග ගැටුම, ඇමරිකානු අධිරාජ්‍යවාදය විසින් දැනට මත් සූදානම් කරමින් සිටී.
ආන්ඩුව ඒවායේ පිලිවෙත් මහජනයා මත ඇති කරන බලපෑම ගැන නො තකති. දැන් අවුරුදු තුනක් වන කෝවිඩ්-19 වසංගතයෙහි ගමන් මාවත තුල, පුද්ගලයින් මිලියන 22කට අධික සංඛ්‍යාවකගේ මරනවලට තුඩු දී ඇති පිලිවෙතක් පාලක පන්තිය විසින් ක්‍රියාත්මක කර ඇත. පුද්ගලයන් 150,000ක් පමන මරා දමා ඇති තුර්කියේ හා සිරියාවේ විනාශකාරී භූ-චලනයට, එක්සත් ජනපදය හා නැටෝ බලයන් ප්‍රතිචාර දක්වා ඇත්තේ, ඒකාබද්ධ හෑල්ලුවකින් වන අතර, තමන් අත තිබෙන කර්තව්‍යයට -එනම් යුද්ධය තීව්‍ර කිරීමට- ඇති වූ ලුහුඬු බාධාවක් ලෙස ය.
එහෙත්, අධිරාජ්‍යවාදී යුද්ධයට උපත දෙන එම පරස්පර-විරෝධයන් ම, සමාජ විප්ලවය සඳහා වෛෂයික පදනම ද නිෂ්පන්න කරයි. 1917 රුසියානු ඔක්තෝබර් විප්ලවයට කොන්දේසි පලමුවන ලෝක යුද්ධය විසින් නිර්මානය කල අතර, එම යුද්ධය අවසානයකට ගෙන ආවේත් එම විප්ලවය විසිනි. අද දින, පාලක පන්තිය මානව වර්ගයා තුන්වන ලෝක යුද්ධයට ඇදගෙන යාමට උත්සාහ කරද්දී ම, ලොව පුරා විප්ලවවාදී අරගල පුපුරා යමින් පවතී.
ප්‍රන්සය තුල මිලියන ගනන් කම්කරුවෝ, විශ්‍රාම වැටුප්වලට මැක්‍රොන් ආන්ඩුව එල්ල කරන ප්‍රහාරයට විරුද්ධ ව, මහා විරෝධතාවන්ට සහභාගි වී ඇත. එක්සත් රාජධානිය තුල, ලක්ෂ ගනන් කම්කරුවෝ වැඩ වර්ජන ක්‍රියා දියත් කර තිබෙන්නේ, විරෝධය සීමා කොට මර්දනය කිරීමට, වෘත්තීය සමිති යාන්ත්‍රනය දරන ප්‍රයත්න නො තකා ය. පසුගිය වසරේ මහජන අරගල, වෛරයට පාත්‍ර ගෝඨාභය රාජපක්ෂගේ පාලන තන්ත්‍රය පෙරලා දැමීමට බලකිරීමෙන් පසුව ස්ථාපනය කරන ලද ජනාධිපති රනිල් වික්‍රමසිංහ විසින් ක්‍රියාවට දමමින් සිටින ජාමූඅ-පිටුබලය දෙන කප්පාදු පියවරයන්ට එරෙහි ව, ශ්‍රී ලංකාවේ දසදහස් ගනන් දෙනා විරෝධය දක්වා ඇත.
එක්සත් ජනපදය මත් සමාජ වෙඩිබෙහෙත් පීප්පයකි. සමාජ අසමානතාව පවතින්නේ, 1930 ගනන්වල මහා අවපාතවට පෙරාතු වසරවල පටන් දැක නො ගත් මට්ටම්වල ය. වෝල් වීදියේ සමපේක්ෂන මේනියාවට හා පාලක පන්තියේ යුද පිලිවෙතට, සමාජ හා ආර්ථික ජීවිතයේ සියල්ල යටත් කිරීම,ඔහියෝ ප්‍රාන්තයේ නැගෙනහිර පලස්තීනය නමැති නගරයේ මේ මාසයේ සිදු වූ විනාශකාරී දුම්රිය පීලිපැනීම හා පාරිසරික දූෂනය තුල හෙලිදරවු විය.
යුද්ධයට එරෙහි ව්‍යාපාරයක් ගොඩනැගීම, එහි මූලික හේතු හා එය ධාවනය කරනු ලබන සමාජ අවශ්‍යතා නිවැරදි ව හඳුනාගැනීමක් මත රඳා පවතී. යුද්ධය අවසන් කල හැකි සමාජ බලවේගය වන ජාත්‍යන්තර කම්කරු පන්තිය බලමුලුගැන්විමට එය දිශාගත කරනු ලැබිය යුතු ය.
දිරිසුන මධ්‍යම-පන්තික ලිබරලුන් හා අවමංගත රැඩිකලුන් ද විවෘත ෆැසිස්ට්වාදීන් ද අතර ප්‍රතිගාමී “වාමාංශික-දක්ෂිනාංශික සන්ධානයක්” මත පදනම් වන මධ්‍යම-පන්තික කොටස් විසින් ඉදිරියට දමනු ලැබෙමින් තිබෙන ව්‍යාජ හා ප්‍රතිගාමී “යුද-විරෝධී” ව්‍යාපාරය ලොව පුරා කම්කරුවන් හා තරුනයන් විසින් ප්‍රතික්ෂේප කල යුතු ය.
පසුගිය සති අන්තයේ පැවති “යුද යන්ත්‍රනයට එරෙහි කෝපාවිශ්ඨය” නමැති රැලියේ දී, තමන් වාමාංශික යයි කියාපාන විරෝධතාකරුවෝ, ලිබර්ටේරියන්වරුන් සහ ෆැසිස්ට් හා අර්ධ-ෆැසිස්ට් බලවේග සමග අත්වැල් බැඳගත්තේ, තුන්වන ලෝක යුද්ධයක් කරා ධාවනය නතර කරනු ලැබිය හැක්කේ එවන් සන්ධානයකට පමනක් බව කියමිනි. ෆැසිස්ට්වාදී ජර්මනිය සඳහා විකල්පය (ඒඑෆ්ඩී) පක්ෂය සමග සමීප ව වැඩ කර ඇති ජර්මනියේ වාම පක්ෂයේ සාරා වැගන්ක්නෙක්ට් ඇතුලු ව ජාත්‍යන්තර පරිමානයෙන් ද එවැනි සභාග ඉදිරියට දමනු ලැබේ.
අධිරාජ්‍යවාදයට විරුද්ධ වීම සමග කිසිදු සම්බන්ධයක් නැති මෙම “වාමාංශික-දක්ෂිනාංශික සන්ධානය” සේවය කරන්නේ, කම්කරු පන්තිය මත පදනම් වන සමාජවාදී යුද-විරෝධී ව්‍යාපාරයක් වර්ධනය වීම අවමංගත කොට එය වැලැක්වීමට යි.
අවසාන විග්‍රහයේ දී, රුසියාවට එරෙහි එක්සත් ජනපද-නැටෝ යුද්ධයට අන්ත-දක්ෂිනාංශයෙහි ප්‍රකාශිත විරුද්ධත්වය බැඳී තිබෙන්නේ, විදෙස් පිලිවෙතෙහි දිශානතිය අරබයා පාලක පන්තිය ඇතුලත පවතින බෙදීම් සමග යි.
දෙවන ලෝක යුද්ධයට පෙර අවරුදුවල දී, එවන් ප්‍රතිගාමී ප්‍රවනතා ඉදිරියට ගෙන එන ලද්දේ, සාමය වෙනුවෙන් පෙනී සිටින්නන් යයි කියාපාමිනි. එක්සත් ජනපදය තුල, එය සහගාමී වූයේ, අධිරාජ්‍ය-විරෝධී පදනමකින් වෙනුවට, ප්‍රතිගාමී ජාතිකවාදයේ හා යුදෙව්-විරෝධයේ පදනමින් රූස්වෙල්ට්ගේ පිලිවෙත්වලට විරුද්ධ වූ නාසි අනුග්‍රාහී චාල්ස් ලින්ඩ්බර්ග්ගේ “ඇමරිකාව පලමුව” ව්‍යාපාරය සමගිනි. එංගලන්තයේ දී, බ්‍රිතාන්‍ය ෆැසිස්ට්වාදී සංගමය ආරම්භ කල ඔස්වල්ට් මෝස්ලි සමග මෙම ප්‍රවනතාව අනුබද්ධ විය.
දක්ෂිනාංශික [අන් රටවල් සමඟ සබඳතා වලට නොබැඳි] හුදකලාවාදීන් සහ ෆැසිස්ට්වාදී ලින්ඩ්බර්ග් අතර සන්ධානයක් යුක්ති සහගත කල අයට විරුද්ධ ව, 1939 දී පුපුරා ගොස් තිබුනු යුද්ධය තුලට එක්සත් ජනපදය ඇතුලත් වීම වැලැක්වීම සඳහා, ඇමරිකානු ට්‍රොට්ස්කිවාදීන්ගේ ප්‍රකාශනය වූ ද මිලිටන්ට් පුවත්පත 1941 සැප්තැම්බරයේ දී මෙසේ අනතුරු ඇඟවී ය:
අධිරාජ්‍යවාදී යුද්ධයට වෛර කරන මහජනයා, රූස්වෙල්ට්ගේ යුද වැඩපිලිවෙල සැකයෙන් යුතු ව දැකගන්නා අතර, එය සාධාරන ය. එහෙත්, හුදකලාවාදීන්ගෙන් යුදකාමීන්ට පිලිතුරු සොයාගැනීමට ඔවුන්ට නො හැක.
යුද්ධයෙහි සැබෑ හේතුවට විරුද්ධ අරගලයකට හුදකලාවාදීන් නායකත්වය දෙන්නේ නැත. සත්‍ය කරුනක් ලෙස, ඔවුන් සේවය කරන්නේ, යුද්ධයට සාර්ථක ව විරුද්ධ වීම සඳහා සම්පූර්නයෙන් අවබෝධ කරගත යුතු වන යුද්ධයෙහි සැබෑ හේතුවෙන් අවධාරනය අපසරනය කිරීමට යි...
එවන් ප්‍රචාරයක් සමගින් ඔවුන්ට පසුගාමී සහ පටු-කල්පනාකාරී අවයව යුදවාදීන්ට එරෙහි ව කෝපගන්වා අවදි කල හැකි වුවත්, යුද්ධය වැලැක්වීමට හෝ ඒ මාර්ගයෙන් යුද්ධය අවසන් කිරීමට ඔවුන්ට එම අවයව බලමුලුගැන්වීම කිසිදා කල නො හැක.
යුද්ධයට පවතින එක ම පිලිතුර වන්නේ, යුද්ධයෙහි හේතුවන ධනපති ක්‍රමය විනාශ කිරීම වෙනුවෙන් පෙනී සිටින විප්ලවවාදී ජාත්‍යන්තරවාදය යි.
1941 දී ට්‍රොට්ස්කිවාදීන් නිකුත් කල අනතුරු ඇඟවීම එහි කුදුමහත් අර්ථභාරය තවමත් දරයි. යුද්ධයට එරෙහි සටන ෆැසිස්ට්වාදීන් සමග සන්ධානයක් සාධාරනීකරනය කරන්නේ යයි කියාපාන පිලිවෙත යුද්ධයට හා ෆැසිස්ට්වාදයට පමනක් තුඩු දිය හැකි ය.
යුද්ධයට එරෙහි අරගලයක් සඳහා වන සාරභූත පදනම වන්නේ, එහි හේතූන් පිලිබඳ අවබෝධයකි. ධනවාදය හා පන්ති අරගලය යන විෂයයන් වලක්වමින් යුද්ධයට විරුද්ධ වීම පිලිබඳ ව කරන සියලු සාකච්ඡා කාලය නාස්ති කිරීමකි.
න්‍යෂ්ටික යුද්ධයේ සමූලෝත්පාඨනයට මානව වර්ගයා ඇදගෙන යමින් සිටින යුද්ධයට හා අධිරාජ්‍යවාදයට එරෙහි ව්‍යාපාරයක් ගොඩනැගීමට, කම්කරු පන්තියේ සමාජවාදී, විප්ලවවාදී හා ජාත්‍යන්තරවාදී ව්‍යාපාරයක් ගොඩනැගීම අවශ්‍ය කරයි. යුද්ධයට එරෙහි සටන සූරාකෑමට, අසමානතාවට හා ධනපති ලාභ පද්ධතියට එරෙහි සටන සමග සම්බන්ධ කිරීම ඒ සඳහා අවශ්‍ය කරයි.
යුක්‍රේනය තුල යුද්ධයේ දෙවන වසරේ දී, ලොව පුරා වර්ධනය වන කම්කරුවන්ගේ ව්‍යාපාරය, සමාජවාදය සඳහා වන සවිඥානික දේශපාලන ව්‍යාපාරයක් බවට වර්ධනය කරනු ලැබිය යුතු ය. හතරවන ජාත්‍යන්තරයේ ජාත්‍යන්තර කමිටුව හා එයට අනුබද්ධ සමාජවාදී සමානතා පක්ෂ සටන් කරමින් සිටින යුද-විරෝධී ක්‍රියාමාර්ගය මෙය යි.