Clairoix தொழிலாளர்கள் கமிட்டியின் ஒரு உறுப்பினரான Christian Lahargure குறிப்பிட்டார்: "தொழிற்சாலை மூடல் உடன்பாட்டில் இருந்து வெளியேறும் விதத்தில், தொழிலாளர்களை மனச் சிதைவிற்கு எவ்வளவு செய்ய முடியுமோ அவற்றை அவர்கள் செய்கின்றனர்''

கொன்டினென்டலின் திட்டம் ஒரு வெட்கம் கெட்ட ஆத்திரமூட்டல் நடவடிக்கையாகும். இது முழுத் தொழிலாள வர்க்கத்தையும் தங்கள் பணியிடங்களில் தொழிலாளர்கள் என்ன நடவடிக்கை எடுத்தாலும் அவர்கள் தோற்கடிக்கப்படுவர் என்ற நினைப்பில் தள்ளும் ஒரு மிரட்டல் முயற்சி ஆகும். நிறுவனங்கள் தங்கள் வேலைகளை எப்பொழுதும் ஏழை நாடுகளில் உள்ள பயிற்சிபெற்ற தொழிலாளர்களுக்கு குறிப்பாக பிரான்சின் முன்னாள் குடியேற்றங்களில் மிகக் குறைந்த ஊதியத்தில் கொடுக்க முயற்சிக்கின்றன.

இந்த வாதத்தை முன்வைக்கையில், ஆளும் வர்க்கம் தொழிற்சங்க அதிகாரத்துவங்களின் வர்க்க ஒத்துழைப்பை முக்கியமாக நம்பியுள்ளது. உலகப் பொருளாதார நெருக்கடி வெடித்ததில் இருந்து அரசாங்கத்தின் ஒப்புதலுடன் நடைபெற்ற தொடர்ச்சியான ஆலை மூடல்களில் கொன்டினென்டல் மூடப்பட்டதும் ஒரு பகுதியாகும். ஒரு ஆலை மூடப்படுவதற்கு இலக்கு கொள்ளப்பட்டபின், தொழிற்சங்கங்கள் ஆலையைத் தனிமைப்படுத்தி தொழிலாளர்கள் பணிநீக்கத்திற்கான ஒரு நிதியை ஏற்க திட்டத்தை முன்வைப்பர். தொழிலாளர்கள் தோற்றவுடன், நிர்வாகமும், நீதிமன்றங்களும் பணித் துண்டிப்புப் பொதியின் விவரங்களை முடிவு செய்துவிடும்.

மிக அதிக விளம்பரப்படுத்தப்பட்ட, தனியார் துறையில் ஆலை மூடல்களுக்கு எதிரான வேலை நிறுத்தங்களை பிரான்ஸ் கண்டுள்ளது. குறிப்பாகக் கொன்டினென்டல், குட் இயர், மோலெக்ஸ் மற்றும் New Fabrics ஆகியவையாகும். இவற்றைத் தொடர்ந்து நிர்வாகிகள் கடத்தப்படுதல், ஆலைகள் தகர்க்கப்படும் என்ற அச்சுறுத்தல்களும் வெளிவந்தன. இந்த நடவடிக்கைகளுக்கு பரந்த மக்கள் ஆதரவு இருந்தது. ஏனெனில் அரசாங்கத்திற்கும் வங்கி பிணை எடுப்புகளுக்கும் மக்களின் விரோதப் போக்கு அந்த அளவு இருந்தது. மிகப் பரந்து இருந்த நிலைமை தடையற்ற சந்தைமுறை ஆதரவாளரும் முன்னாள் சோசலிசக் கட்சி வேட்பாளராக 2007 ஜனாதிபதித் தேர்தலில் நின்றவருமான செகோலின் ரோயால் ஏப்ரல் 2009ல் பகிரங்கமாக ஏன் தொழிலாளர்கள் இத்தகைய நடவடிக்கையை எடுக்கின்றனர் என்று தன்னால் புரிந்து கொள்ள முடிகிறது என்று அறிவித்தார்.

Clairoix, Hanover ஆலைகளில் இருந்த தொழிலாளர்கள் கடந்த ஆண்டு கொன்டினென்டலின் ஆலை முடல்களுக்கு எதிராகக் கூட்டு எதிர்ப்புக்களை நடத்தினர். Clairoix ல் பல மாதங்கள் போராட்டத்திற்கு பின்னர், வேலை நிறுத்தங்கள், ஆலை ஆக்கிரமிப்புக்களும் நடந்தன. போராட்டம் இறுதியில் தொழிற்சங்கங்களால் தனிமைப் படுத்தப்பட்டு, தோற்கடிக்கப்பட்டன.

பரந்த வர்க்கப் போராட்டங்கள் வெடிப்பதை தடுக்கும் பணி தொழிற்சங்கங்களுக்கு கொடுக்கப்பட்டுள்ளது. இவை ஆலைகளின் நடவடிக்கைகளை தனிமைப்படுத்துகின்றன. தொழிலாளர்களின் போராட்டங்கள் வெடிக்கக்கூடும் என்ற அவர்களுடைய அச்சங்களை தவிர, முதலாளித்துவத்தின் இலக்கான பொருளாதார நெருக்கடியை தீர்ப்பதன் பேரில், முழுச்சுமைகளையும் தொழிலாளர்களின் முதுகில் கட்டியடிப்பதற்கு தொழிற்சங்கங்கள் உடன்பாடு கொண்டிருக்கிறது. கொன்டினென்டலை பொறுத்தவரை, அதன் நிர்வாகம் சுட்டிக்காட்டியது போல், "பணிநீக்கங்களுக்கான பொருளாதார உந்துதல்கள் தொழிற்சங்க பிரதிநிதிகளாலேயே நன்கு உணரப்பட்டன" என்பதாகும்.

இந்த ஆண்டு முழு நனவுடன் தனியார் துறைகளில் நடந்துவரும் வேலைநிறுத்தங்களை நாசப்படுத்தும் போக்கு தொடர்கிறது. பெப்ருவரி மாதம் Total எண்ணெய் சுத்திகரிப்புத் தொழிலாளர்கள் டன்கிர்க் சுத்திகரிப்பு தொழிலாளர்களுடன் ஒற்றுமையுடன் வேலைநிறுத்தம் செய்தனர். டோட்டல் நிரந்தர மூடலை அறிவித்ததால் ஏராள பணி நீக்கங்களை தொழிலாளர்கள் எதிர்கொண்டிருந்தனர். ஆறு நாட்களுக்கு பின்னர் தொழிற்சங்கங்கள் வேலைநிறுத்தத்தை முடிவிற்கு கொண்டுவந்தன. இதன்பின்பு, டன்கிர்க் தொழிலாளர்கள் தனிமைப்படுத்தப்பட்டு விற்கப்பட்டுவிட்டனர்.

அரசியல் நிலைமையைக் கட்டுப்படுத்தும் பணி --தொழிலாளர்களை வலுவின்மையாக்கி தொழிற்சங்கங்கள் மற்றும் அரசாங்கத்திற்கு பின்னே தள்ளும் பணி-- முன்னாள் இடது அமைப்புக்களின் காட்டிக் கொடுப்போரிடம் உள்ளது. அதாவது ஸ்ராலினிச கம்யூனிஸ்ட் கட்சி (PCF), LO எனப்படும் தொழிலாளர் போராட்டம் அமைப்பு, ஒலிவியே பெசன்ஸநோவின் புதிய முதலாளித்துவ எதிர்ப்புக் கட்சி (NPA) ஆகியவற்றிடம் உள்ளது.

கொன்டினென்டல் மூடலுக்கு, இக்கட்சிகளின் இழிந்த சொற்றொடர் தேடும் முயற்சிக்கு உதாரணம் PCF செயலர் Marie Geroge Buffet இடமிருந்து வந்தது. "தவறான உறுதிமொழிகள் பலவற்றைக் கொடுத்து, குற்றம் சார்ந்த முதலாளிகள் கூட்டத்தை விரும்பியதை செய்வதற்கு அனுமதித்த அரசாங்கம் இப்பொழுது இந்த அனுமதிக்கப்பட முடியாத விவகாரத்தில் தலையிடுவதற்குக் கடமைப்பட்டுள்ளது" என்று அவர் கூறினார்.

இது அவருடைய வாசகர்களுடைய அறிவை அவமதிப்பதாகும். ஜனாதிபதி நிக்கோலோ சார்க்கோசியின் அரசாங்கத்திற்கு ஏற்றம் கொடுக்கும் நயமற்ற முயற்சி ஆகும். டஜன் கணக்கான ஆலைகள் மூடலுக்கு பின்னர் Buffet, அரசாங்கம் தொழிலாளர்களை ஏமாற்றியது என்று கூறியுள்ளார். எவரேனும் இந்த ஆலைத் தொழிலாளர்களுக்கு உதவ சார்க்கோசி "கடமைப்பட்டுள்ளார்" என்றால் நம்புவார்களா?

கடந்த ஆண்டு New Fasbris போராட்டம் நடந்தபோது, NPA பல பணியிடங்களில் நடக்கும் போராட்டங்கள் தனிமைப்படுத்தப்பட்டது பற்றி குறிப்பிட்டு எழுதியது: "இன்று தொழிலாளர்களே உருப்படியான முன்னோக்குகளை விவாதித்து, முன்வைப்பதற்கான வாய்ப்பு ஆகும். ஆனால் அத்தகைய கூட்டம் வெறும் ஆணைப்படி நடத்தப்பட முடியாது... மூடப்படும் ஆலைகள் என்ற பாதிப்பிற்கு பிரான்சில் உட்பட்டுள்ள 15 அல்லது அதற்கு அதிகமான நிறுவனங்களின் பிரதிநிதிகளை ஒன்றாகக் கொண்டுவந்து ஒரு 'NPA முறையீட்டை' முன்வைக்க இயலும். ஆனால், அது அப்படி நடந்து கொள்ளுவது இல்லை."

தொழிலாள வர்க்கத்தின் பாதுகாப்புக்காக அவர்களைத் திரட்ட முற்படும் ஒரு கட்சிக்கும், முன்னாள் இடதுகளுக்கும் இடையே உள்ள வேறுபாடு பற்றி இதைவிடத் தெளிவான அறிக்கை இருக்க முடியாது.